Abaebbulaniya 4:1-16 LGCB2014 - Bible AI

¹Noolwekyo ngʼekisuubizo ekyʼokuyingira mu kiwummulo kye, bwe kikyaliwo, twerinde, omuntu yenna ku mmwe aleme kulabika nga takituuseemu.

²Kubanga naffe tubuuliddwa Enjiri, nga nabo bwe baagibuulirwa. Kyokka baalema okukkiriza ekigambo kye baawulira, era tebaalina kye baagasibwa.

³ⓝ Kubanga ffe abakkiriza, ffe tuyinza okuyingira mu kiwummulo kye, nga bwe yayogera nti, Omulimu gwe gwaggwa ku kutondebwa kwʼensi.

³“Nasunguwala ne ndayira nti, ‘Tebaliyingira mu kiwummulo kyange.’ ”

⁴ⓞ Kubanga waliwo wʼayogerera nti, “Katonda bwe yamala okukola emirimu gye gyonna nʼawummulira ku lunaku olwʼomusanvu.”

⁵Ayongera nʼagamba nti, “Tebaliyingira mu kiwummulo kyange.”

⁶Kyaterekerwa abamu okuyingiramu, ate ngʼabo abaasooka okubuulirwa Enjiri, tebaayingira olwʼobujeemu.

⁷ⓟ Katonda kyeyava ateekateeka nate olunaku, nʼalutuuma leero, bwe yayogerera mu Dawudi, oluvannyuma lwʼekiseera ekiwanvu nti,

⁷“Leero bwe munaawulira eddoboozi lye, Temukakanyaza mitima gyammwe.

⁸Kubanga singa Yoswa yabatwala mu kifo ekyʼokuwummula, Katonda teyandiyogedde ku lunaku olulala olwʼokuwummula.”

⁹Naye Katonda atusuubizza olunaku olwa Ssabbiiti lwe tuliwummula, newaakubadde nga terunnatuuka.

¹⁰Kubanga oyo ayingira mu kiwummulo kya Katonda, awummula emirimu gye nga Katonda bwe yawummula ngʼamaze emirimu gye.

¹¹Noolwekyo tufubenga okuyingira mu kiwummulo ekyo, omuntu yenna alemenga kugoberera ekyokulabirako ekibi ekyʼabajeemu.

¹²Ekigambo kya Katonda kiramu era kikola. Kisala okusinga ekitala ekyʼobwogi obubiri, era kiyitamu ne kituukira ddala ku mmeeme nʼomwoyo, nʼennyingo nʼobusomyo, era kyawula ebirowoozo nʼokufumiitiriza kwʼomutima.

¹³Katonda amanyi ebintu byonna, so tewali kitonde na kimu ekikwekeddwa amaaso ge. Alaba buli kintu, era tulyogera mazima nga tumutegeeza buli kimu.

¹⁴Noolwekyo nga bwe tulina Kabona Asinga Obukulu, eyagenda mu ggulu, ye Yesu, Omwana wa Katonda, tunyweze okukkiriza kwe twayatula.

¹⁵Tulina Kabona Asinga Obukulu alumirwa awamu naffe mu bunafu bwaffe, eyakemebwa mu byonna nga ffe, kyokka nʼatakola kibi kyonna.

¹⁶Kale tusembererenga entebe ya Katonda eyʼobwakabaka eyʼekisa nʼobuvumu, tufune okusaasirwa nʼekisa tubeerwe mu kwetaaga kwaffe.