Abaebbulaniya 6:1-20 LGCB2014 - Bible AI

¹Noolwekyo tulekeraawo okuyiga ebintu bya Kristo ebisookerwako, tukule mu byʼomwoyo. Tulekeraawo okwogera ku bisookerwako byokka, ngʼokwenenya ebikolwa ebireeta okufa, byʼebikolwa ebyʼobulombolombo, naye tuteekwa nʼokuba nʼokukkiriza mu Katonda.

²Tulekeraawo okuyigiriza obulombolombo obwʼokubatizibwa, nʼobwʼokussibwako emikono, nʼenjigiriza eyʼokuzuukira kwʼabafu, nʼokusalirwa omusango ogwʼolubeerera.

³Katonda nga bwʼasiima, tukule mu mwoyo.

⁴Kizibu okuzza mu kwenenya abo abaamala okufuna ekitangaala ne balega ku birungi ebyʼomu ggulu, ne bafuuka abassa ekimu mu Mwoyo Omutukuvu,

⁵ne bamanya obulungi bwʼekigambo kya Katonda, ne balega ku maanyi agʼemirembe egigenda okujja,

⁶naye ne bava ku Katonda. Baba bakomerera Omwana wa Katonda omulundi ogwokubiri, ne bamuswaza mu lwatu.

⁷Ettaka ligasa omulimi, bwe lifuna obulungi enkuba, ne lisigibwamu ensigo era ne muvaamu ebibala ebirungi. Ne Katonda aliwa omukisa.

⁸Naye bwe libaza amatovu, nʼamaggwa, ettaka eryo teriba lya mugaso liba kumpi nʼokukolimirwa. Ku nkomerero, ebimezeeko byokebwa.

⁹Naye abaagalwa, newaakubadde twogera bwe tutyo mmwe tetubabuusabuusa. Tumanyi nga mulina ebintu ebirungi era mukola ebintu ebiraga nti muli mu kkubo eryʼobulokozi.

¹⁰Kubanga Katonda mwenkanya tayinza kwerabira mulimu gwammwe omunene bwe gutyo, nʼokwagala kwe mwagala erinnya lye, era amanyi bwe mwaweereza abantu be, era bwe mukyeyongera okubaweereza.

¹¹Era twagala buli omu ku mmwe yeeyongere okulaganga obunyiikivu obwo okutuusiza ddala ku nkomerero, lwe mulifuna ekyo kye musuubira.

¹²Tetwagala mube bagayaavu, wabula mube ngʼabo abakkiriza era abagumiikiriza ne bafuna ekyasuubizibwa.

¹³ⓢ Katonda bwe yasuubiza Ibulayimu, nga bwe wataali mulala gwʼayinza kwerayirira amusinga, yeerayirira yekka.

¹⁴ⓣ Yalayira ngʼagamba nti, “Ndikuweera ddala omukisa, era nʼokukwaza nnaakwazanga.”

¹⁵Bwʼatyo Ibulayimu bwe yalindirira nʼobugumiikiriza, nʼaweebwa ekyasuubizibwa.

¹⁶Abantu balayira omuntu abasinga obukulu, ku nkomerero kye balayidde kye kisalawo.

¹⁷Ne Katonda bwʼatyo, kyeyava ateekawo ekirayiro ngʼayagala okukakasiza ddala abasika bʼekisuubizo nti Talijjulula ekyo kye yasuubiza.

¹⁸Katonda yakikola bwʼatyo, okutulaga ebintu bibiri ebitajjulukuka, nti akuuma ekisuubizo kye awamu nʼekirayiro kye. Talimba. Noolwekyo ffe abaddukira gyʼali okutulokola, tusaana okuba abagumu kubanga talirema kutuwa ebyo bye yasuubiza.

¹⁹Essuubi eryo lye linywereza ddala emmeeme zaffe ngʼennanga bwʼenyweza eryato. Essuubi eryo lituyingiza munda wʼeggigi.

²⁰Yesu eyatusooka yo, eyo gye yayingira ku lwaffe, bwe yafuuka Kabona Asinga Obukulu owʼemirembe gyonna, ngʼolubu lwa Merukizeddeeki bwe luli.