Abaebbulaniya 8:1-13 LGCB2014 - Bible AI

¹Ekigambo ekikulu ekiri mu bye twogedde kye kino nti, Tulina Kabona Asinga Obukulu, atudde ku mukono ogwa ddyo, ogwʼentebe ya Katonda eyʼobwakabaka mu ggulu,

²omuweereza wʼebitukuvu, era owʼeweema eyʼokusisinkanirangamu eyʼamazima, etaazimbibwa bantu wabula Mukama.

³Kubanga Kabona Asinga Obukulu yenna alondebwa olwʼomulimu ogwʼokuwaayo ebirabo ne ssaddaaka, bwe kityo nʼoyo kyamugwanira okuba nʼekintu kyʼawaayo.

⁴Singa yali ku nsi, teyandibadde kabona kubanga waliwo bakabona abawaayo ebirabo ngʼamateeka bwe galagira.

⁵ⓨ Kye bakola kifaananako bufaananyi era kisiikirize kyʼebyo ebikolebwa mu ggulu. Musa kyeyava alabulwa, bwe yali ngʼanaatera okumaliriza weema, Mukama nʼamugamba nti, “Bwʼoba ngʼozimba, goberera entegeka yonna eyakulagirwa ku lusozi.”

⁶Naye kaakano omulimu Yesu gwe yaweebwa, gusinga nnyo ogwa bali obukulu, kubanga nʼendagaano gyʼalimu ngʼomutabaganya yʼesinga obulungi, nʼebisuubizo kwʼenyweredde, bye bisinga obulungi.

⁷Singa endagaano eyasooka teyaliiko kyakunenyezebwa, tewandibaddewo kyetaagisa yaakubiri.

⁸ⓩ Kubanga bwʼabanenya ayogera nti,

⁸“Laba ennaku zijja,” bwʼayogera Mukama, “ndiragaana endagaano empya nʼennyumba ya Isirayiri, awamu nʼennyumba ya Yuda.

⁹Endagaano eno empya terifaanana nʼeri gye nalagaana ne bajjajjaabwe lwe nabakwata ku mukono okubaggya mu nsi yʼe Misiri. Olwʼokubanga tebaagoberera ndagaano yange, nange ssaabassaako mwoyo,”

⁹bwʼayogera Mukama.

¹⁰“Eno yʼendagaano gye ndiragaana nʼennyumba ya Isirayiri, oluvannyuma lwʼennaku ezo, bwʼayogera Mukama. Ndissa amateeka gange mu birowoozo byabwe era ndiwandiika amateeka gange ku mitima gyabwe, nange nnaabeeranga Katonda waabwe, nabo banaabeeranga bantu bange.

¹¹Era tewaliba nate muntu ayigiriza munne oba muliraanwa we, oba muganda we ngʼagamba nti, ‘Manya Mukama,’ Kubanga okuva ku muto okutuuka ku mukulu bonna balimmanya.

¹²Era ndibasaasira, nʼebibi byabwe siribijjukira nate.”

¹³Katonda bwʼayogera ku ndagaano empya, olwo ngʼandibizza eyʼedda; nʼeyo gyʼadibizza nʼokukaddiwa nʼekaddiwa, eriggwaawo.