Abaefeso 4:1-32 LGCB2014 - Bible AI

¹Ngʼomusibe wa Mukama waffe, mbakuutira mubeere nʼempisa ezisaanira obulamu bwe mwayitirwa okutambuliramu.

²Mubeerenga bakkakkamu, abawombeefu era abagumiikiriza, nga mugumiikirizagana mu kwagala.

³Munyiikirenga okukuuma obumu obwʼOmwoyo mu kwegatta awamu okwʼemirembe.

⁴Omubiri nga bwe guli ogumu, nʼOmwoyo omu, nʼessuubi liri limu eryʼokuyitibwa kwammwe.

⁵Mukama waffe ali omu, nʼokukkiriza kumu nʼokubatizibwa kumu.

⁶Katonda ali omu, era ye Kitaawe wa bonna, afuga byonna, akolera mu byonna era abeera mu byonna.

⁷Buli omu ku ffe yaweebwa ekisa ngʼokugera kwa Kristo bwe kuli.

⁸ⓐ Ebyawandiikibwa kyebiva bigamba nti,

⁸“Bwe yalinnya mu ggulu, nʼatwala omunyago, nʼawa abantu ebirabo.”

⁹Okugamba nti Yalinnya, kitegeeza ki? Kitegeeza nti Yasooka kukka mu bitundu ebya wansi wʼensi.

¹⁰Oyo Kristo eyakka, ye wuuyo ddala eyalinnya ewala ennyo, nʼayisa waggulu wʼeggulu lyonna, alyoke ajjule obwengula bwʼensi yonna.

¹¹Era yʼomu oyo eyawa abamu okuba abatume, nʼabalala okuba bannabbi, nʼabalala okuba ababuulizi bʼenjiri, nʼabalala okuba abasumba, nʼabalala okuba abayigiriza.

¹²Ekyo yakikola olwʼokutendeka abantu ba Katonda olwʼomulimu ogwʼobuweereza, okuzimba omubiri gwa Kristo.

¹³Ekyo kijja kutwongera okugenda mu maaso, okutuusa ffenna lwe tulibeera nʼokukkiriza kumu, nʼokumanyira ddala Omwana wa Katonda nga tukulidde ddala mu mwoyo okutuuka ku kigera ekyʼokubeera nga Kristo bwʼali.

¹⁴Tuteekwa okulekeraawo okweyisa ngʼabaana abato, nga tuyuuguumizibwa amayengo nga tutwalibwa buli muyaga ogwʼokuyigiriza okwʼabantu abakuusa, mu nkwe olwʼokugoberera enteekateeka eyʼobulimba.

¹⁵Tube ba mazima mu kwagala, tulyoke tukulire mu Kristo mu byonna, nga tweyongera okuba nga ye, Omutwe gwʼEkkanisa.

¹⁶Mu ye omubiri gwonna mwe gugattirwa obulungi awamu, ne guyungibwa mu buli nnyingo, nga gukola ngʼekigera kya buli kitundu bwe kuli, nga gukula era nga gwezimba mu kwagala.

¹⁷Ngʼomugoberezi wa Mukama waffe, mbalagira okulekeraawo okutambula ngʼabatamanyi Katonda bwe batambulira mu birowoozo byabwe ebyʼobusirusiru.

¹⁸Amagezi gaabwe gajjudde ekizikiza. Tebalina mugabo mu byʼobulamu bwa Katonda, kubanga bajjudde obutamanya era emitima gyabwe mikakanyavu.

¹⁹Tebakyalina nsonyi, beemalidde mu bya buwemu, na mululu gwa kukola bya bugwenyufu ebya buli ngeri.

²⁰Kyokka mmwe si bwe mwayigirizibwa ku bya Kristo.

²¹Obanga ddala mwamuwulira, era ne muyigirizibwa mu ye ngʼamazima bwe gali mu Yesu,

²²kale mwambulemu obulamu obwʼomuntu owʼedda, avunda olwʼokwegomba okwʼobulimba.

²³Mufuuke baggya olwʼOmwoyo afuga ebirowoozo byammwe,

²⁴era mwambale omuntu omuggya, eyatondebwa mu kifaananyi kya Katonda mu butuukirivu ne mu kutukuzibwa okwʼamazima.

²⁵Mulekeraawo okulimba, mwogerenga amazima buli muntu ne munne, kubanga tuli bitundu bya mubiri gumu.

²⁶ⓑ “Bwe musunguwalanga mwekuume muleme kwonoona.” Temuzibyanga budde nga mukyasunguwadde.

²⁷Temuwanga Setaani bbanga.

²⁸Abadde omubbi alekeraawo okubba, wabula anyiikirenga okukola ebyʼomugaso ngʼakola nʼemikono gye, alyoke afune kyʼagabirako nʼabo abeetaaga.

²⁹Mwekuume mulemenga okwogera ebigambo ebitasaana, wabula mwogerenga ebyo byokka ebizimba nga buli muntu bwe yeetaaga, biryoke bigase abo ababiwulira.

³⁰Era temunakuwazanga Mwoyo Mutukuvu wa Katonda, eyabateekako akabonero akalaga nga mwanunulibwa.

³¹Okunyiiga, nʼobusungu, nʼobukambwe, nʼokukaayana, nʼokuvuma, na buli kibi kyonna, biremenga kubeera mu mmwe.

³²Mubenga ba kisa, buli omu alumirwenga munne, era musonyiwaganenga, nga Katonda bwe yabasonyiwa mu Kristo.