Abaefeso 6:1-24 LGCB2014 - Bible AI

¹Abaana, muwulirenga bazadde bammwe mu Mukama waffe, kubanga bwe mukola mutyo, mukola kituufu.

²ⓓ “Kitaawo ne nnyoko obassangamu ekitiibwa,” eryo lye tteeka erisooka eririmu okusuubiza nti:

³ⓔ Bwʼonoobanga obulungi, era nʼowangaala ku nsi.

⁴Nammwe abazadde, temunyigirizanga baana bammwe, wabula mubakuze nga mubagunjula era nga mubayigiriza ebya Mukama waffe.

⁵Abaddu, muwulirenga bakama bammwe abʼomu mubiri nga mubatya era nga mubawa ekitiibwa ngʼomutima gwammwe mumalirivu, nga bwe mwamalirira mu Kristo.

⁶Ekyo temukikola lwa kulabibwa, abantu balyoke babasiime, wabula mukolenga ngʼabaddu ba Kristo nga mukola nʼomutima gwammwe gwonna, nga Katonda bwʼayagala.

⁷Muweerezenga nʼomutima omulungi ngʼabakolera Mukama waffe so si ngʼabakolera abantu,

⁸nga mumanyi ngʼekirungi kyonna omuntu kyʼakola, oba muddu oba wa ddembe, Mukama alimusasula empeera ennungi.

⁹Era nammwe bakama bʼabaddu, muyisenga bulungi abaddu bammwe nga temubatiisatiisa, nga mumanyi nti Mukama waabwe, ye Mukama wammwe, ali mu ggulu era ye tasosola mu bantu.

¹⁰Ekyʼenkomerero, mubenga nʼamaanyi mu Mukama waffe ne mu buyinza obwʼamaanyi ge.

¹¹Mwambale ebyokulwanyisa byonna ebya Katonda, mulyoke musobole okwolekera enkwe za Setaani.

¹²Kubanga tetumeggana na mubiri wadde musaayi, wabula tulwanyisa abafuzi, nʼabʼobuyinza, nʼamaanyi agʼensi agʼekizikiza, nʼemyoyo emibi egyʼomu bifo ebya waggulu.

¹³Noolwekyo mwambalenga ebyokulwanyisa byonna ebya Katonda, mulyoke musobole okwaŋŋanga omulabe ku lunaku olwʼakabi, era bwe mulimala okukola byonna, mulyoke musigale nga muli banywevu.

¹⁴Muyimirire nga muli banywevu, ngʼamazima lwe lukoba lwammwe lwe mwesibye mu kiwato kyammwe, ate ngʼobutuukirivu kye kyʼomu kifuba,

¹⁵nga mwambadde nʼengatto mu bigere byammwe nga mugenda okubuulira Enjiri eyʼemirembe.

¹⁶Era ku ebyo byonna okukkiriza kwammwe kubeerenga engabo eneebasobozesanga okuzikiza obusaale bwonna obwʼomuliro obulasibwa omubi.

¹⁷Obulokozi bubafuukire enkuufiira gye mwambadde, nʼekigambo kya Katonda kibabeerere ekitala ekyʼOmwoyo,

¹⁸nga musabiririranga mu ssaala zonna nga mwegayiririranga mu mwoyo buli kiseera. Mwekuumenga nga mugumiikirizanga, era nga mwegayiririranga abatukuvu, be bantu bonna aba Katonda.

¹⁹Era nange munsabirenga bwe nnaabanga njogera mpeebwe ebyʼokwogera, era mbyogerenga nʼobuvumu nga ntegeeza abantu ekyama kyʼEnjiri.

²⁰Ndi mubaka wa Njiri ali mu njegere. Munsabire ndyoke ngibuulire abantu nʼobuvumu nga bwe kinsaanira.

²¹Tukiko, owooluganda omwagalwa era omuweereza omwesigwa mu Mukama waffe, alibategeeza byonna mulyoke mutegeere ebinfaako ne bye nkola.

²²Mmutumye gye muli, mulyoke mumanye nga bwe tuli era abagumye emitima gyammwe.

²³Emirembe nʼokwagala awamu nʼokukkiriza ebiva eri Katonda Kitaffe ne Mukama waffe Yesu Kristo, bibeerenga nʼabooluganda.

²⁴Ekisa kya Katonda kibeerenga nʼabo bonna abaagala Mukama waffe Yesu Kristo nʼokwagala okutaggwaawo.