1Nze Pawulo ne Timoseewo abaddu ba Kristo Yesu tuwandiikira abatukuvu bonna mu Kristo Yesu abali mu Firipi, awamu nʼabalabirizi nʼabadiikoni;
2ekisa nʼemirembe ebiva eri Katonda Kitaffe ne Mukama waffe Yesu Kristo, bibeerenga nammwe.
3Nneebaza Katonda wange buli lwe mbajjukira,
4era buli lwe mbasabira mwenna nsaba nga nzijudde essanyu.
5Kubanga okuviira ddala ku lunaku olwasooka nʼokutuusiza ddala kaakano mwetaba wamu nange mu njiri.
6Nkakasiza ddala nti oyo eyatandika omulimu omulungi mu mmwe, aligutuukiriza okutuusa ku lunaku lwa Kristo Yesu.
7Kino kituufu okubalowoozaako bwe ntyo mwenna, kubanga mundowoozaako mu kusibibwa kwange ne mu kulwanirira Enjiri, ne mu kuginyweza, nga mwenna mwetaba wamu nange mu kisa.
8Katonda ye mujulirwa wange nga mwenna bwe mbaagala nʼokwagala okuva eri Kristo Yesu.
9Mbasabira nti okwagala kwammwe kweyongerenga, era mujjule amagezi nʼokutegeera,
10mulyoke mulonde ekisinga obulungi, olunaku lwa Kristo bwe lulituuka lubasange nga muli balongoofu abataliiko kamogo,
11nga mujjudde ekibala ekyʼobutuukirivu ku bwa Yesu Kristo, olwʼokuweesa Katonda ekitiibwa nʼokumutendereza.
12Abooluganda, njagala mmwe mutegeere kaakano nti ebimu ebyambaako byongera bwongezi kubunyisa Njiri,
13nʼokusibibwa kwange kulyoke kulabise Kristo eri olusiisira lwonna olwʼabaserikale ba kabaka nʼeri abalala bonna.
14Nʼabooluganda mu Mukama waffe abasinga obungi beeyongedde okuguma olwʼokusibibwa kwange, era nga bamaliridde okwaŋŋanga okubuulira nga tebatya.
15Weewaawo abamu bategeeza abantu Kristo lwa buggya na kuvuganya, naye abalala bakikola mu mwoyo mulungi.
16Bano bakikola lwa kwagala, kubanga bamanyi nga nalondebwa lwa kulwanirira Njiri.
17Naye bali bategeeza Kristo lwa kuvuganya, so si mu mazima, nga balowooza nti Banaayongera okunnakuwaza mu busibe bwe ndimu.
18Naye nze nfaayo ki? Kristo bwʼabuulirwa, mu buli ngeri, oba za bukuusa oba za mazima, nze nsanyuka busanyusi.
19Kubanga mmanyi nti Olwʼokunsabira nʼolwʼamaanyi gʼOmwoyo wa Yesu Kristo, ndifuna okulokolebwa kwange.
20Neesiga era nsubirira ddala nti Sijja kuswala mu nsonga nʼemu, wabula ne kaakano nzija kuguma nga bulijjo, Kristo agulumizibwe mu mubiri gwange, oba okuyita mu bulamu oba okuyita mu kufa.
21Nze mba mulamu lwa Kristo era ne bwe nfa mba ngobolodde.
22Naye obanga bwe mba omulamu mu mubiri ngʼekyo kibala kyʼokufuba kwange, simanyi kye nnaalondawo.
23Nkwatiddwa buli luuyi; nneegomba okuva mu bulamu buno ŋŋende mbeere ne Kristo, kubanga ekyo kisingako obulungi.
24Naye okusigala mu mubiri kye kisinga okwetaagibwa ku lwammwe
25Ekyo nkikakasa era nkimanyi nti Nzija kuba nga nkyaliwo mbeere na mmwe, mulyoke mweyongere okusanyuka nʼokukula mu kukkiriza,
26bwe ndikomawo gye muli mulyoke mweyongere okwenyumiririza mu Kristo ku lwange.
27Naye kirungi obulamu bwammwe bubeerenga nga bwe kisaanira Enjiri ya Kristo; ne bwe ndijja oba ne bwe sirijja kubalaba, mpulire nti Muli banywevu era mwegasse mu mwoyo gumu, nga mulwanirira okukkiriza okwʼenjiri nʼemmeeme emu.
28Temutyanga abo ababawakanya kubanga ke kabonero akakakasa nti balizikirizibwa, naye mmwe mulirokolebwa, era ekyo kiva eri Katonda.
29Kubanga mwaweebwa omukisa, ku lwa Kristo, si mu kumukkiriza kyokka, naye nʼokubonaabona ku lulwe.
30Olutalo lwe mwalaba nga nnwana, era lwe muwulira lwe ndiko kaakano, nammwe lwe muliko.