Abafiripi 2:1-30 LGCB2014 - Bible AI

¹Kale bwe wabaawo okubazaamu endasi kwonna mu Kristo, oba okusanyusa kwonna okwʼokwagala, oba okussa ekimu mu mwoyo, oba okwagala okwʼengeri yonna, oba okusaasira,

²mutuukirize essanyu lyange, mulowoozenga bumu, nga mulina okwagala, nʼomwoyo gumu, nga mulowooza bumu,

³nga temukola kintu na kimu olwʼokuvuganya wadde okwewaana okutaliimu, wabula mu bwetoowaze nga buli muntu agulumiza munne okusinga bwe mwegulumiza mwekka,

⁴nga buli muntu tatunuulira bibye yekka, naye ngʼafaayo ne ku byʼabalala.

⁵Mubengamu endowooza eri eyali mu Kristo Yesu,

⁶ye newaakubadde nga yali mu kifaananyi kya Katonda, Teyeerowooza kwenkanankana ne Katonda,

⁷wabula yeewaayo nʼafuuka ngʼomuddu, era nʼazaalibwa ngʼomuntu, era nʼalabikira mu kifaananyi kyʼomuntu,

⁸ne yeetoowaza, nʼaba muwulize nʼokutuukira ddala ku kufa, ate okufa okwʼokukomererwa ku musaalaba.

⁹Katonda kyeyava amugulumiza, nʼamuwa erinnya erisinga amannya gonna;

¹⁰buli vviivi eryʼabo abali mu ggulu nʼabali ku nsi, era nʼabali wansi wʼensi liryoke lifukaamirirenga erinnya lya Yesu,

¹¹era buli lulimi lwatulenga nga Yesu Kristo ye Mukama, Katonda Kitaffe aweebwe ekitiibwa.

¹²Noolwekyo abaagalwa, nga bwe muli abawulize bulijjo nga ndi nammwe, kaakano nga bwe siri nammwe mube bawulize nnyo nʼokusinga bwe mwali. Munyiikirenga okukola ebiraga nti Mwalokolebwa, nga mutya era nga mukankana.

¹³Kubanga Katonda yakolera mu mmwe, era yabaagazisa nʼabasobozesa okukola byʼayagala, olwʼokumusanyusa.

¹⁴Buli kye mukola mukikolenga awatali kwemulugunya wadde empaka,

¹⁵mulyoke mube nga temuliiko kyakunenyezebwa nga muli balongoofu, mube abaana ba Katonda abatalina bbala, wakati mu mulembe ogwakyama era omwonoonefu, mwe mubeere ekyokulabirako ekyʼamaanyi mu nsi,

¹⁶nga munyweza ekigambo kyʼobulamu gye bali, ndyoke mbeere nʼekyʼokwenyumiriza ku lunaku lwa Kristo, okulaga nti ssaddukira bwereere so ssaateganira busa.

¹⁷Naye singa ddala nfukibwa ngʼekiweebwayo ekyokunywa ku ssaddaaka ne ku kuweereza okwʼobwakabona okwʼokukkiriza kwammwe, nsanyukira wamu nammwe mwenna.

¹⁸Era nammwe musanyukire wamu nange.

¹⁹Mukama waffe Yesu bwʼalisiima nsuubira okubatumira mangu Timoseewo, ndyoke ntereere omwoyo nga ntegedde ebibafaako.

²⁰Kubanga tewali mulala alina ndowooza nga yange,

²¹kubanga abalala bonna beenoonyeza byabwe ku bwabwe, so si ebya Yesu Kristo.

²²Naye ye Timoseewo mumumanyi nga bwʼasaanira, kubanga aweerereza wamu nange, ngʼomwana bwʼakolera awamu ne kitaawe nga tukola omulimu gwʼokubuulira Enjiri.

²³Kale oyo gwe nsuubira okubatumira amangu ddala nga naakamanya nga bwe nnaabeera.

²⁴Naye nkakasa nti Mukama waffe bwʼalisiima, nange nze kennyini sirimala bbanga ddene nga sinnajja eyo.

²⁵Era ndabye nga kisaanye okubatumira owooluganda Epafuladito mukozi munnange, era mulwanyi munnange, naye ate nga mutume wammwe, omuweereza owʼebyʼobwakabona owʼebyʼetaago byange,

²⁶ayagala ennyo okubalaba, mwenna, eyeeraliikirira ennyo olwʼobutabalaba, kubanga mwawulira nga yalwala.

²⁷Ddala yalwala era yali kumpi nʼokufa. Kyokka Katonda yamusaasira, naye era teyasaasira ye yekka, wabula nange yansaasira ennaku nʼeteenneeyongera.

²⁸Noolwekyo nayagala nnyo okumutuma gye muli mulyoke musanyuke okumulaba nate, ekyo kikendeeze ku nnaku gye nnina.

²⁹Kale mumwanirize nnyo nʼessanyu lyonna mu Mukama waffe, era abantu abali ngʼoyo mubassangamu ekitiibwa,

³⁰kubanga yabulako katono okufa ngʼali ku mulimu gwa Kristo, ngʼakola ebyo bye mwandinkoledde singa mwali nange.