Abaggalatiya 2:1-21 LGCB2014 - Bible AI

¹Bwe waayitawo emyaka kkumi nʼena ne nzirayo ne Balunabba ne Tito e Yerusaalemi.

²Nagendayo olwʼokubikulirwa kwe nafuna, ne mbanjulira Enjiri gye mbuulira Abaamawanga. Nayogera nʼabakulembeze bʼEkkanisa mu kyama balyoke bategeere bye njigiriza, si kulwa nga nteganira bwereere, ne bakkiriza nti bituufu.

³Tito gwe nnali naye ne batamuwaliriza kukomolebwa, newaakubadde nga yali munnaggwanga.

⁴Naye olwʼabooluganda abʼobulimba abaayingizibwa mu kyama okuketta eddembe lye tulina mu Kristo Yesu, balyoke batufuule abaddu,

⁵abo tetwabawuliriza essaawa nʼemu, amazima gʼenjiri galyoke geeyongerenga mu mmwe.

⁶Naye abo abaabalibwa ngʼokuba ekintu ekyʼomuwendo, abataaliko bwe baali gye ndi kubanga Katonda tasosola mu bantu, nze gye ndi tebalina kye bannyongerako,

⁷naye mu ngeri endala bwe baalaba nga nateresebwa Enjiri eyʼabatali bakomole, nga Peetero bwe yateresebwa eyʼabakomole,

⁸oyo eyakolera mu Peetero olwʼobutume bwʼabakomole, ye yakolera ne mu nze ku lwʼAbaamawanga.

⁹Yakobo ne Keefa[1] ne Yokaana abaalabikanga ngʼempagi bwe baalaba ekisa ekya mpeebwa, ne batukwata mu ngalo eza ddyo nze ne Balunabba nga bassa kimu naffe nti ffe tubeere mu Bamawanga, naye bo babeere mu bʼabakomole.

¹⁰Kye baatusaba kyokka tujjukirenga abaavu, ate ngʼekyo kye nnali nesunga okukola.

¹¹Naye Peetero bwe yajja mu Antiyokiya ne mmunenya mu lwatu kubanga yali mukyamu.

¹²Kubanga abaava eri Yakobo bwe baali tebannajja, yalyanga nʼAbamawanga, naye bwe bajja nʼatandika okubeeyawulako ngʼatya abakomole.

¹³Abayudaaya abalala bonna ne bamwegattako mu bukuusa, ekyo ne kireetera ne Balunabba okusendebwasendebwa obukuusa bwabwe.

¹⁴Naye bwe nalaba nga tebatambula bulungi ngʼamazima gʼenjiri bwe gali, ne ŋŋamba Keefa mu maaso gaabwe bonna nti, “Obanga ggwe Omuyudaaya ogoberera empisa zʼAbamawanga ezitali za Kiyudaaya, owaliriza otya Abaamawanga okugobereranga empisa zʼEkiyudaaya?”

¹⁵Ffe mu buzaaliranwa tuli Bayudaaya so si Bamawanga aboonoonyi.

¹⁶Kyokka tukimanyi bulungi nti Omuntu taweebwa butuukirivu lwa kugondera mateeka, wabula abufuna lwa kukkiriza Yesu Kristo, era naffe kyetwava tukkiriza Yesu Kristo tulyoke tuweebwe obutuukirivu olwʼokumukkiriza so si lwa kugondera mateeka. Kubanga tewali nʼomu aliweebwa obutuukirivu olwʼebikolwa ebyʼamateeka.

¹⁷Naye oba nga bwe twanoonya okuweebwa obutuukirivu mu Kristo twasangibwa okuba aboonoonyi, kitegeeza nti Kristo muweereza wa kibi? Kikafuuwe.

¹⁸Kubanga bwe nzimba nate bye nazikiriza, nneeraga nzekka okuba omwonoonyi.

¹⁹Kubanga olwʼamateeka nnafa eri mateeka, ndyoke mbeere omulamu mu Katonda. Nakomererwa wamu ne Kristo;

²⁰kyokka ndi mulamu, si ku bwange, wabula ku bwa Kristo abeera mu nze; era obulamu bwe nnina kaakano mu mubiri, mbulina lwa kukkiriza Omwana wa Katonda, eyanjagala ne yeewaayo yekka ku lwange.

²¹Ssidibya kisa kya Katonda; naye oba nga obutuukirivu buva mu mateeka, nga Kristo yafiira bwereere.