Abaggalatiya 3:1-29 LGCB2014 - Bible AI

¹Mmwe Abaggalatiya abatalina magezi ani eyabaloga, so nga nabannyonnyola bulungi Yesu Kristo eyakomererwa ku musaalaba ne mukitegeera?

²Kino kyokka kye njagala muntegeeze; mwaweebwa Mwoyo lwa bikolwa ebyʼamateeka, nantiki lwa kuwulira kwa kukkiriza?

³Muyinza mutya obutaba na magezi kutuuka awo, abaatandikira mu Mwoyo, kaakano mutuukirizibwa mu mubiri?

⁴Okubonaabona kwonna kwe mwabonaabona kwali kwa bwereere? Bwe kuba nga ddala kwa bwereere.

⁵Abawa Omwoyo nʼabawa nʼokukola ebyʼamaanyi mu mmwe, akola lwa bikolwa byʼamateeka oba lwa kuwulira olwʼokukkiriza?

⁶ⓐ Ibulayimu yakkiriza Katonda ne kimubalirwa okuba obutuukirivu.

⁷Kale mumanye nti abo abakkiriza be baana ba Ibulayimu.

⁸ⓑ Olwʼokuba nga baategeera ebiribaawo nʼekyawandiikibwa, ngʼolwʼokukkiriza, Katonda aliwa amawanga obutuukirivu, Enjiri kyeyava ebuulirwa Ibulayimu edda nti, “Mu ggwe amawanga gonna mwe galiweerwa omukisa.”

⁹Noolwekyo abo abakkiriza bagabanira wamu omukisa ne Ibulayimu eyakkiriza.

¹⁰Naye abo abafugibwa ebikolwa ebyʼamateeka, bafugibwa kikolimo; kubanga kyawandiikibwa nti, “Buli ataagobererenga byonna ebiwandiikiddwa mu kitabo kya mateeka, akolimiddwa.”

¹¹Kimanyiddwa bulungi nti Tewali nʼomu Katonda gwʼawa butuukirivu olwʼokukuuma amateeka, kubanga abatuukirivu banaabeeranga balamu lwa kukkiriza,

¹²naye amateeka tegeesigama ku kukkiriza, naye anaagagobereranga anaabeeranga mulamu mu go.

¹³Kristo yatununula okuva mu kikolimo kyʼamateeka, bwe yafuuka ekikolimo ku lwaffe, kubanga kyawandiikibwa nti, “Akolimiddwa buli awanikiddwa ku muti.”

¹⁴Kale kaakano amawanga gaweebwe omukisa gwa Ibulayimu, mu Kristo Yesu, tulyoke tuweebwe ekyasuubizibwa ekyʼOmwoyo olwʼokukkiriza.

¹⁵Abooluganda njogera mu buntu; endagaano bwʼeba ngʼekakasibbwa, tewabaawo agiggyawo newaakubadde agyongerako.

¹⁶Katonda yasuubiza Ibulayimu nʼOmwana we, naye tekigamba nti nʼabaana be ngʼabangi, naye yayogera ku omu, oyo ye Kristo.

¹⁷Kye ŋŋamba kye kino: endagaano eyakakasibwa Katonda nga wayiseewo emyaka ebikumi bina mu asatu nʼefuuka etteeka, teyadibya ekyo ekyasuubizibwa.

¹⁸Kuba oba ngʼobusika bwesigamye ku mateeka, buba tebukyali bwa kisuubizo; naye yabuwa Ibulayimu olwʼokusuubiza.

¹⁹Kale lwaki amateeka gaateekebwawo? Gaagattibwa ku kisuubizo olwʼaboonoonyi okutuusa ezzadde eryasuubizibwa lwe lirikomawo, nga lyawulibbwa mu bamalayika olwʼomukono gwʼomutabaganya.

²⁰Naye omutabaganya si wʼomu, naye Katonda ali omu.

²¹Amateeka galwanagana nʼebyo Katonda bye yasuubiza? Kikafuuwe. Kubanga singa amateeka gaali galeeta obulamu, ddala ddala amateeka gandituwadde obutuukirivu.

²²Naye ebyawandiikibwa bitegeeza nti Ebintu byonna bifugibwa kibi, ekyasuubizibwa kiryoke kiweebwe abakkiriza olwʼokukkiriza mu Yesu Kristo.

²³Naye okukkiriza nga tekunnajja, twafugibwanga mateeka, nga tusibibwa olwʼokukkiriza okugenda okubikkulwa;

²⁴ge gaali gatukuuma, amateeka galyoke gatutuuse eri Kristo, tulyoke tuweebwe obutuukirivu olwʼokumukkiriza.

²⁵Naye okukkiriza bwe kwajja, ngʼolwo tetukyetaaga mateeka kutukuuma.

²⁶Kubanga kaakano mwenna muli baana ba Katonda olwʼokukkiriza Yesu Kristo,

²⁷kubanga abaabatizibwa bonna mu Kristo, baayambala Kristo.

²⁸Tewakyali kusosola wakati wa Muyudaaya na Muyonaani, wakati wa muddu na wa ddembe, wakati wa musajja na mukazi, kubanga mwenna muli omu mu Kristo Yesu.

²⁹Kale kaakano nga bwe muli aba Kristo, muli zadde lya Ibulayimu, ngʼekisuubizo kyʼabasika bwe kiri.