Abaggalatiya 4:1-31 LGCB2014 - Bible AI

¹Naye ŋŋamba nti Omusika bwʼaba ngʼakyali mwana muto, tayawulwa na muddu, newaakubadde nga ye mukama wa byonna.

²Afugibwa abasigire nʼabawanika okutuusa lwʼakula nʼatuuka ku kigero kitaawe, kye yategeka.

³Era naffe bwe tutyo bwe twali tukyali bato, twafugibwanga obulombolombo obwʼensi.

⁴Naye ekiseera bwe kyatuuka, Katonda nʼatuma Omwana we

⁵eyazaalibwa omukazi ngʼafugibwa amateeka, tulyoke tufuuke abaana.

⁶Era kubanga tuli baana, Katonda yatuma Omwoyo wʼOmwana we okubeera mu mitima gyaffe, era kaakano tuyinza okwogera mu ddoboozi eryʼomwanguka nti Aba, Kitaffe.

⁷Kale kaakano tokyali muddu, wabula oli mwana; era nga bwʼoli omwana oli musika ku bwa Katonda.

⁸Mmwe bwe mwali temunnamanya Katonda mwabanga baddu ba bitali Katonda.

⁹Naye kaakano mutegedde Katonda era naye abategedde, kale muyinza mutya okukyuka, ne mugoberera obulombolombo obunafu obutalina maanyi ne mwagala okufuuka abaddu baabwo?

¹⁰Mukwata ennaku, nʼemyezi, nʼebiro, nʼemyaka;

¹¹neeraliikirira si kulwa ngʼomulimu omunene gwe nakola mu mmwe gwali gwa bwereere.

¹²Abooluganda, mbeegayirira mubeere nga nze, kubanga nange ndi nga mmwe. Temulina kabi ke mwankola;

¹³era mumanyi nga mu bunafu obwʼomubiri, mmwe be nasooka okubuulira Enjiri.

¹⁴Naye newaakubadde nga mwandinnyomye olwʼobulwadde bwange, temwangobaganya, wabula mwansembeza nga malayika wa Katonda, nga Yesu Kristo.

¹⁵Kale essanyu lyammwe lyadda wa? Kubanga ndi mujulirwa wammwe nti, mwali musobola okuggyamu amaaso gammwe ne mugampa okunnyamba singa kyali kyetaagisa.

¹⁶Kale kaakano nfuuse omulabe wammwe olwʼokubategeeza amazima?

¹⁷Abo abalabika ngʼabaabassaako ennyo omwoyo tebabaagaliza birungi, okuggyako okwagala okubaggalira ebweru, mulyoke mudde ku luuyi lwabwe.

¹⁸Naye kirungi okunyiikiranga okukola ebirungi bulijjo, naye si lwe mbeera nammwe lwokka.

¹⁹Baana bange be nnumirwa nate ngʼalumwa okuzaala, okutuusa Kristo lwʼalibumbibwa mu mmwe,

²⁰nandyagadde okubeera nammwe kaakano, nʼokukyusa eddoboozi lyange kubanga ndi mweraliikirivu ku lwammwe.

²¹Mumbulire, mmwe abaagala okufugibwa amateeka, lwaki temuwulira mateeka?

²²Kubanga kyawandiikibwa nti Ibulayimu yazaala abaana babiri aboobulenzi, omu yamuzaala mu mukazi omuddu, nʼomulala nʼamuzaala mu mukazi owʼeddembe.

²³Omwana owʼomukazi omuddu yazaalibwa nga wa mubiri, naye omwana owʼomukazi owʼeddembe yazaalibwa lwa kusuubiza.

²⁴Ebyo biri nga bya lugero; kubanga ezo ndagaano bbiri. Emu yava ku Lusozi Sinaayi, ye yazaala abaana abʼobuddu, ye yava mu Agali.

²⁵Agali lwe Lusozi Sinaayi oluli mu Buwalabu, era afaananyirizibwa ne Yerusaalemi eya kaakano kubanga ye ne bazzukulu be bali mu buddu.

²⁶Naye Yerusaalemi ekyʼomu ggulu ye mukazi owʼeddembe, era ye nnyaffe.

²⁷Kubanga kyawandiikibwa nti,

²⁷“Sanyuka ggwe omugumba atazaala. Leekaanira waggulu mu ddoboozi eryʼomwanguka newaakubadde nga tozaalanga ku mwana. Kubanga ndikuwa abaana bangi, abaana abangi okusinga omukazi alina omusajja bʼalina.”

²⁸Naye mmwe abooluganda muli baana abaasuubizibwa, nga Isaaka bwe yali.

²⁹Naye mu biro biri ngʼeyazaalibwa omubiri bwe yayigganya oyo eyazaalibwa Omwoyo, ne kaakano bwe kiri.

³⁰ⓒ Naye Ebyawandiikibwa bigamba bitya? Bigamba nti, “Goba omukazi omuddu nʼomwana we, kubanga omwana wʼomukazi omuddu talisikira wamu nʼomwana wʼomukazi owʼeddembe.”

³¹Noolwekyo abooluganda tetuli baana ba mukazi omuddu naye tuli baana abʼomukazi owʼeddembe.