Abaruumi 10:1-21 LGCB2014 - Bible AI

¹Abooluganda, kye njagala mu mutima gwange era kye nsabira Abayisirayiri eri Katonda, kwe kulokolebwa.

²Kubanga nkakasa nga balina obunyiikivu eri Katonda, naye si mu kutegeera.

³Mu butamanya butuukirivu bwa Katonda, bagezaako okwenoonyeza obutuukirivu, nga bagondera amateeka mu kifo kyʼokugondera obutuukirivu bwa Katonda.

⁴Kristo atuwa amakulu amajjuvu, buli amukkiriza nʼamuwa obutuukirivu.

⁵ⓓ Musa awandiika ku butuukirivu obuva mu mateeka nti, “Omuntu alikola ebintu ebyo aliba mulamu mu byo.”

⁶ⓔ Naye okukkiriza okuva mu butuukirivu, kugamba nti, “Toyogeranga mu mutima gwo nti, ‘Ani alirinnya mu ggulu?’ (kwe kuggya Kristo mu ggulu)

⁷ⓕ newaakubadde okugamba nti, ‘Ani alikka emagombe?’ (kwe kuggya Kristo mu bafu.)”

⁸ⓖ Abo bonna abalina okukkiriza mu Kristo bagamba nti, “Ekigambo kiri kumpi naawe, kiri mu kamwa ko era kiri mu mutima gwo,” kye kigambo ekyʼokukkiriza kye tubuulira.

⁹Bwʼoyatula nʼakamwa ko nti, Yesu ye Mukama, nʼokkiriza nʼomutima gwo nga Katonda yamuzuukiza mu bafu, olokoka.

¹⁰Kubanga omuntu akkiriza na mutima gwe nʼaweebwa obutuukirivu, era ayatula na kamwa ke nʼalokoka.

¹¹ⓗ Kubanga Ebyawandiikibwa bigamba nti, “Buli amukkiriza taliswazibwa.”

¹²Tewali njawulo wakati wa Muyudaaya na Muyonaani, kubanga Mukama waabwe yʼomu era ayanukula abo bonna abamukoowoola.

¹³ⓘ Buli alikoowoola erinnya lya Mukama alirokoka.

¹⁴Kale balikoowoola batya oyo gwe batakkiririzaamu? Era balikkiriza batya oyo gwe batawulirangako? Era baliwulira batya awatali abuulira?

¹⁵ⓙ Era balibuulira batya nga tebatumiddwa? Ekyawandiikibwa nga bwe kigamba nti, “Ebigere byʼabo abategeeza amawulire amalungi, nga birungi.”

¹⁶ⓚ Naye si bonna abaagondera Enjiri. Isaaya agamba nti, “Mukama, waliwo akkirizza obubaka bwaffe?”

¹⁷Noolwekyo okukkiriza kujja olwʼokuwulira ekigambo kya Kristo.

¹⁸ⓛ Naye mulowooza Abayisirayiri tebaawulira? Weewaawo baawulira. Ebyawandiikibwa bigamba nti,

¹⁸“Eddoboozi lyabwe lyabuna mu nsi zonna, nʼebigambo byabwe byatuuka ku nkomerero zʼensi.”

¹⁹ⓜ Abayisirayiri baabitegeera oba tebaabitegeera? Bwʼati Musa bwʼaddamu ekibuuzo ekyo: “Ndibaleetera okukwatirwa obuggya abatali ggwanga, ne mbasunguwaza olwʼeggwanga eritalina kutegeera.”

²⁰ⓝ Ne Isaaya yali muvumu bwe yagamba nti, “Nazuulibwa abo abatannoonya, ne ndabika eri abo abatambuulirizaako.”

²¹ⓞ Naye eri Isirayiri agamba nti, “Olunaku lwonna nalumala nga ngolodde emikono gyange eri eggwanga ekkakanyavu era abantu abeewaggula.”