Abaruumi 11:1-36 LGCB2014 - Bible AI

¹Kale ka mbuuze: Katonda yeegoberako ddala abantu be? Kikafuuwe. Kubanga nange ndi Muyisirayiri, era muzzukulu wa Ibulayimu, owʼomu kika kya Benyamini.

²Katonda tasuulanga bantu be, be yalonda okuva ku lubereberye. Oba temumanyi ekyawandiikibwa ekyogera ku Eriya bwe yeegayirira Katonda nga yeemulugunya olwa Isirayiri?

³ⓟ Yagamba nti, “Mukama, basse bannabbi bo ne bamenyaamenya nʼebyoto byo. Nze nzekka nze nsigaddewo, ate bannoonya okunzita.”

⁴ⓠ Naye Katonda yamuddamu atya? Yamugamba nti: “Neesigalizzaawo abasajja kasanvu abatafukaamirira Baali.”

⁵Era bwe kityo ne mu biro bino waliwo ekitundu ekyasigalawo abaalondebwamu olwʼekisa.

⁶Naye obanga lwa kisa, si lwa bikolwa nate, kubanga ekisa kyandibadde tekikyali kisa.

⁷Kale tugambe ki? Abayisirayiri baalemwa okufuna kye baali banoonya, wabula be yalondamu be baakifuna, abalala ne bakakanyazibwa, emitima,

⁸ⓡ nga bwe kyawandiikibwa nti,

⁸“Katonda yabawa omwoyo ogwʼokubongoota, nʼaleetera amaaso gaabwe obutalaba, nʼamatu gaabwe obutawulira okutuusa leero.”

⁹Ne Dawudi yagamba nti, “Leka ekijjulo kyabwe kibafuukire omutego, era ekitimba, ekyʼokubatega era empeera ebasaanira.

¹⁰ⓢ Amaaso gaabwe ka gabeeko ekifu, baleme okulaba. Era batambule nga bakootakoota emirembe nʼemirembe.”

¹¹Kale ka mbuuze, kyebaava beesittala balyoke bagwe? Kikafuuwe. Naye olwʼokwonoona kwabwe, obulokozi kyebwava bujja eri Abaamawanga, Abayudaaya balyoke bakwatibwe obuggya.

¹²Kale obanga okwonoona kwabwe kutegeeza bugagga eri ensi, nʼokulemwa kwabwe nga kutegeeza bugagga eri Abaamawanga, okuganyulwa kwabwe tekulisingawo!

¹³Kaakano njogera gye muli Abaamawanga, nga bwe ndi omutume eri Abaamawanga, ngulumiza obuweereza bwange,

¹⁴singa kisoboka nkwase baganda bange obuggya abamu ku bo basobole okulokolebwa.

¹⁵Kubanga obanga okugobebwa kwabwe kwe kutabaganya ensi, okusembezebwa kwabwe kulitegeeza ki, bwe kutaliwa bafu bulamu?

¹⁶Kale kaakano obanga ekitole kyʼeŋŋano ekandiddwa ne kiweebwayo ngʼekibala ekibereberye kitukuvu, nʼeŋŋaano yonna ntukuvu; era obanga ekikolo kitukuvu, nʼamatabi matukuvu.

¹⁷Naye obanga amatabi agamu gaawogolebwa, ate nga ggwe eyali omuzeyituuni ogwʼomu nsiko wasimbibwa ku kikolo kyagwo, nʼogabana ku bugimu bwʼekikolo kyʼomuzeyituuni,

¹⁸teweenyumiririzanga ku matabi ago; naye bwe weenyumirizanga, jjukira nga si gwe owaniridde ekikolo, naye ekikolo kye kikuwaniridde.

¹⁹Oyinza okwogera nti, “Amatabi gaawogolwako, ndyoke nsimbibweko.”

²⁰Kyʼoyogedde kiba kituufu. Weewaawo gaawogolwako lwa butakkiriza, kyokka ggwe onywedde lwa kukkiriza. Teweenyumirizanga, naye otyanga.

²¹Kuba obanga Katonda teyasaasira matabi ga buzaaliranwa, nammwe ayinza obutabasaasira.

²²Kale mufumiitirize ku kisa nʼobukambwe bwa Katonda. Aba mukambwe eri abo abaagwa, naye nʼaba wa kisa eri ggwe, bwe weeyongera okunywerera mu kisa kye, kubanga naawe bwʼotonywere oliwogolwako.

²³Era nʼabo oluvannyuma bwe balikkiriza, balizzibwako ku nduli kubanga Katonda ayinza okubazaako kuli.

²⁴Kuba obanga ggwe mu buzaaliranwa bwo gwe eyawogolwa ku muzeyituuni, wazzibwa ku muzeyituuni ogutali gwa buzaaliranwa bo, abo abʼobuzaaliranwa tebalisinga nnyo okuzzibwa ku muzeyituuni gwabwe bo?

²⁵Kubanga ssaagala mmwe abooluganda obutamanya kyama kino nga mwelowooza okuba abʼamagezi, ngʼabamu ku Bayisirayiri bwe baakakanyaza emitima gyabwe, okutuusa mmwe Abaamawanga, lwe muliyingira.

²⁶Nʼoluvannyuma Isirayiri yenna alirokolebwa, ngʼEkyawandiikibwa bwe kigamba nti,

²⁶“Omulokozi aliva mu Sayuuni, era aliggyawo obutatya Katonda mu bazzukulu ba Yakobo.

²⁷ⓣ Era eyo ye ndagaano yange nabo, bwe ndibaggyako ebibi byabwe.”

²⁸Mu njiri balabe ku lwammwe, naye mu kulondebwa baagalwa olwa bajjajjaabwe.

²⁹Kubanga Katonda bwʼagabira abantu ebirabo oba bwʼabayita, teyejjusa.

³⁰Kuba nga mmwe edda bwe mwajeemera Katonda, kyokka kaakano nga musaasiddwa olwʼobujeemu bwʼAbayudaaya,

³¹bwe batyo nabo kaakano bajeemu, eri ekyo ekyali okusaasira gye muli, balyoke basaasirwe.

³²Kubanga Katonda yaleka abantu bonna mu bujeemu alyoke abakwatirwe ekisa.

³³Kale nga Katonda wa kitalo, ngʼamagezi ge mangi nʼokutegeera kwe kungi era nʼobugagga bungi; ensala ye eyʼemisango nga tekeberekeka, nʼamakubo ge tegekkaanyizika.

³⁴ⓤ “Kubanga ani ayinza okutegeera okulowooza kwa Mukama? Oba ani ayinza okumuluŋŋamya?”

³⁵ⓥ “Oba ani eyali asoose okumuwa ekintu, alyoke amuddizeewo?”

³⁶Kubanga byonna biva gyʼali, era biyita mu ye era bidda gyʼali. Ekitiibwa kibe gyʼali emirembe gyonna. Amiina.