Abaruumi 12:1-21 LGCB2014 - Bible AI

¹Noolwekyo abooluganda mbeegayirira olwʼokusaasira kwa Katonda, muwengayo emibiri gyammwe nga ssaddaaka ennamu entukuvu esanyusa Katonda, kwe kuweereza kwammwe okwʼomwoyo.

²So temwefaananyirizanga ba mirembe gino, naye mukyusibwe olwʼokudda obuggya mu birowoozo byammwe okukakasibwa okusiimibwa kwa Katonda, okusanyusa era okwʼamazima.

³Kubanga njogera olwʼekisa kye naweebwa, eri buli muntu mu mmwe, obuteerowooza okusinga ekyo kyʼasaanidde okulowooza, naye okulowoozanga nga yeegendereza, nga Katonda bwe yagabira buli muntu ekigera kyʼokukkiriza.

⁴Kubanga nga bwe tulina ebitundu ebingi mu mubiri ogumu, ebitundu ebyo byonna bikola emirimu gya njawulo.

⁵Noolwekyo nga bwe tuli omubiri ogumu mu Kristo, buli muntu kitundu ku mubiri ogumu ogwo.

⁶Tulina ebirabo, ngʼekisa kye tulina bwe kyatuweebwa mu ngeri eyʼenjawulo, oba bunnabbi, ngʼekigera kyʼokukkiriza bwe kiri,

⁷oba buweereza, mu buweereza, oba omu okuyigiriza, mu kuyigiriza;

⁸oba omulala okugumya banne mu kubazzaamu amaanyi, oba omulala mu kugaba, oba omulala, okufuga nʼobunyiikivu, nʼomulala okulaga ekisa nga musanyufu.

⁹Mube nʼokwagala okutaliimu bukuusa. Mukyawenga ekibi, munywererenga ku kirungi,

¹⁰nga mwagalana mu kwagala okwʼabooluganda, nga muwaŋŋana ekitiibwa,

¹¹mu kunyiikira so si mu kugayaala. Musanyukirenga mu mwoyo nga muweereza Mukama,

¹²nga musanyukira mu kusuubira, nga mugumiikiriza mu kubonaabona era nga munyiikira mu kusaba.

¹³Mufengayo ku byetaago byʼabantu ba Katonda, era mwanirizenga abagenyi.

¹⁴Musabirenga ababayigganya; mubasabirenga so temubakolimiranga.

¹⁵Musanyukirenga wamu nʼabo abasanyuka, era mukaabirenga wamu nʼabo abakaaba.

¹⁶Buli muntu abeerenga mu mirembe muntu ne munne, nga temwegulumiza naye nga muba bakkakkamu. Temwekulumbazanga.

¹⁷Temusasulanga kibi olwʼekibi, naye mukolenga birungi byereere eri bonna.

¹⁸Mukolenga kyonna ekisoboka okutabagana nʼabantu bonna;

¹⁹ⓦ abaagalwa, temuwalananga ggwanga, era ekiruyi mukirekere Katonda, nga bwe kyawandiikibwa nti, “Okuwoolera eggwanga kwange, nze ndisasula,” bwʼayogera Mukama.

²⁰ⓧ “Noolwekyo omulabe wo bwʼalumwanga enjala, muliisenga; bwʼalumwanga ennyonta muwenga ekyokunywa, bwʼokola bwʼotyo olimukumira amanda gʼomuliro ku mutwe gwe.”

²¹Towangulwanga kibi, naye wangulanga ekibi ngʼokola obulungi.