Abaruumi 13:1-14 LGCB2014 - Bible AI

¹Buli muntu awulirenga abafuzi, kubanga tewali buyinza butava eri Katonda, era nʼabafuzi abaliwo Katonda ye yabalonda.

²Noolwekyo abawakanya abafuzi, bawakanya buyinza bwa Katonda. Era baba bawakanya kiragiro kye, bwe batyo ne beereetako bokka omusango.

³Kubanga abafuzi baba tebalwanyisa bikolwa birungi naye ebibi. Oyagala obutakangibwa wabuyinza, kola bulungi osiimibwe,

⁴kubanga muweereza wa Katonda ku lwʼobulungi bwo. Naye bwʼonookolanga ekibi, osaanidde otye kubanga ekitala kyʼalina si kya bwereere, kubanga muweereza wa Katonda awoolera eggwanga eri oyo akola ekibi.

⁵Noolwekyo kibagwanira okuba abawulize, si lwa busungu bwokka, naye nʼolwʼokumanya nga kye kituufu.

⁶Era kyemuva muwa omusolo kubanga abakozi abo baweereza ba Katonda nga banyiikirira emirimu gyabwe.

⁷Abantu bonna basasulenga ebibabanjibwa; musasulenga emisolo eri abo be muteekwa okuwa omusolo, nʼowʼempooza mumuwenga empooza; nʼoyo ateekwa okutiibwa mumutyenga, nʼoyo ateekwa okuweebwa ekitiibwa mumuwenga ekitiibwa.

⁸Temubeeranga na bbanja lyonna eri omuntu yenna, wabula okwagalananga; kubanga ayagala muntu munne ngʼatuukiriza amateeka.

⁹ⓨ ⓩ Kubanga amateeka gano nti, “Toyendanga, tottanga, tobbanga, teweegombanga,” nʼetteeka eddala, ligattiddwa mu kino nti “Yagalanga muliraanwa wo nga bwe weeyagala wekka.”

¹⁰Ayagala muliraanwa we tamukola bubi; noolwekyo okwagala kyekuva kutuukiriza amateeka.

¹¹Mumanye nga kino kye kiseera, era essaawa etuuse mugolokoke okuva mu tulo, kubanga kaakano obulokozi bwaffe buli kumpi okusinga ne we twakkiririza.

¹²Ekiro kiyise, obudde bunaatera okukya, noolwekyo tweyambulemu ebikolwa ebyʼekizikiza, twambale ebyokulwanyisa ebyʼomusana.

¹³Tutambulenga ngʼabʼomu musana, so si mu binyumu ne mu kutamiira, ne mu bwenzi nʼobukaba, ne mu kuyombagana nʼobuggya,

¹⁴naye twambale Mukama waffe Yesu Kristo so tetuwanga mubiri bbanga kukola ngʼokwegomba kwagwo bwe kuli.