Abaruumi 14:1-23 LGCB2014 - Bible AI

¹Mwanirizenga omunafu mu kukkiriza, nga temumusalira musango.

²Wabaawo omuntu omu akkiririza mu kulya ebintu byonna, nga so ye omunafu akoma ku nva kwokka.

³Omuntu asalawo okubaako kyʼalya tanyoomanga atakirya, nʼoyo atalya kintu alemenga kusalira musango oyo akirya kubanga Katonda yamusembeza.

⁴Ggwe ani asalira omusango omuweereza wʼomuntu omulala? Mukama we yʼamanya oba atuukiriza emirimu gye oba tagituukiriza. Naye aligituukiriza kubanga Mukama we alimusobozesa.

⁵Omuntu omu agulumiza olunaku olumu okusinga olulala, naye omulala nʼalowooza nti ennaku zonna zenkanankana. Noolwekyo buli muntu anywererenga ku kyʼalowooza bwe kiba nga kye kituufu.

⁶Akuza olunaku aba alukuza eri Mukama. Oyo alya aba alya ku bwa Mukama, kubanga aba agulumiza Katonda. Nʼoyo atalya aba talya ku bwa Mukama, era aba agulumiza Katonda.

⁷Kubanga tewali nʼomu ku ffe abeera omulamu ku bubwe yekka, era tewali nʼomu afa ku lulwe.

⁸Kubanga bwe tuba abalamu, tuba balamu ku bwa Mukama, oba bwe tufa, tufa ku bwa Mukama. Kale nno bwe tuba abalamu oba bwe tufa, tuli ba Mukama.

⁹Kubanga ekyo Kristo kye yafiira ate nʼabeera omulamu, alyoke abeere Mukama wʼabo abaafa era nʼabalamu.

¹⁰Kale ggwe lwaki osalira muganda wo omusango? Oba lwaki onyooma muganda wo? Kubanga ffenna tuliyimirira mu maaso gʼentebe ya Katonda, eyʼokulamula.

¹¹ⓐ Kubanga kyawandiikibwa nti,

¹¹“ ‘Nga bwe ndi omulamu,’ bwʼayogera Mukama, ‘buli vviivi lirinfukaamirira era na buli lulimi lulyatula Katonda.’ ”

¹²Noolwekyo buli omu ku ffe alyennyonnyolako eri Katonda.

¹³Noolwekyo tetusaliragananga misango. Tumalirire obuteesittaza waluganda wadde okumutega okugwa mu kibi.

¹⁴Mmanyi era nkakasiza ddala mu Mukama waffe Yesu, nga tewali kya muzizo ku bwakyo, wabula kya muzizo eri oyo akirowooza nga kya muzizo.

¹⁵Kubanga obanga muganda wo anakuwala olwʼekyo kyʼolya, oba tokyatambulira mu kwagala; tolyanga kintu kyonna kyʼomanyi nga kinaakyamya omuntu oyo Kristo gwe yafiirira.

¹⁶Ekirungi ekiri mu mmwe kireme okuvumibwa.

¹⁷Kubanga obwakabaka bwa Katonda si kulya na kunywa, wabula butuukirivu na mirembe, na ssanyu mu Mwoyo Omutukuvu.

¹⁸Kubanga aweereza Kristo mu ebyo asanyusa nnyo Katonda era asiimibwa abantu.

¹⁹Noolwekyo tunyiikirirenga ebyʼemirembe, nʼebyʼokuzimbagana ffekka ne ffekka.

²⁰Toyonoonanga mulimu gwa Katonda olwʼemmere. Ebintu byonna birongoofu, naye ekibi kwe kulya ekyo ekireetera omulala okwesittala.

²¹Kirungi obutalya nnyama newaakubadde okunywa wayini newaakubadde ekintu kyonna ekyesittaza muganda wo.

²²Kyʼokkiririzaamu mu kulya kikuume nga kya kyama ne Katonda. Alina omukisa ateesalira musango kumusinga mu ekyo kyʼalowooza nga kituufu.

²³Naye oyo abuusabuusa bwʼalya, omusango gumaze okumusinga, kubanga talya lwa kukkiriza, era na buli ekitava mu kukkiriza kiba kibi.