Abaruumi 15:1-33 LGCB2014 - Bible AI

¹Ffe abanywevu kitugwanidde okwetikkanga obunafu bwʼabo abatali banywevu, so si okwesanyusa ffekka.

²Buli omu ku ffe asanyusenga muliraanwa we mu bulungi olwʼokumuzimba mu kukkiriza.

³ⓑ Kubanga ne Kristo teyeesanyusa yekka, nga bwe kyawandiikibwa nti, “Ebivume byʼabo abaakuvuma byagwa ku nze.”

⁴Kubanga ebyawandiikibwa byonna edda, byawandiikibwa kutuyigiriza, tulyoke tugumiikirizenga era tuzzibwemu amaanyi, ate tube nʼessuubi.

⁵Kaakano Katonda wʼokugumiikiriza era azaamu amaanyi, abawe okulowoozanga obumu buli omu eri munne mu Kristo Yesu,

⁶mu mwoyo gumu nʼeddoboozi limu mulyoke mugulumizenga Katonda, Kitaawe wa Mukama waffe Yesu Kristo.

⁷Noolwekyo mwanirizaganenga, nga Kristo bwe yabaaniriza olwʼekitiibwa kya Katonda.

⁸Kubanga njogera nti Kristo yafuuka muweereza wʼabakomole olwʼamazima ga Katonda alyoke anyweze ebisuubizo bya bajjajjaffe

⁹ⓒ nʼAbaamawanga balyoke bagulumize Katonda olwʼokusaasira kwe, nga bwe kyawandiikibwa nti,

⁹“Kyendiva nkutendereza mu Baamawanga, era ne ntendereza erinnya lyo.”

¹⁰ⓓ Era nʼayongera nʼagamba nti: “Mmwe Abaamawanga musanyukirenga wamu nʼabantu be.”

¹¹ⓔ Era nate nti, “Abaamawanga mwenna, mutendereze Mukama, era abantu bonna bamutenderezenga.”

¹²ⓕ Ne Nnabbi Isaaya agamba nate nti, “Walibaawo muzzukulu wa Yese alijja era alisituka okufuga Abaamawanga, era mu ye mwe muliba essuubi lyabwe.”

¹³Kaakano Katonda wʼokusuubira, abajjuze essanyu lyonna nʼemirembe mu kukkiriza, mulyoke mweyongerenga mu ssuubi eryʼamaanyi aga Mwoyo Mutukuvu.

¹⁴Era matidde baganda bange, nze kennyini, nga nammwe bennyini mujjudde obulungi, nga mujjudde okutegeera kwonna, era nga muyinza okubuuliriragana.

¹⁵Naye mu bitundu ebimu ebyʼebbaluwa eno nabawandiikira nʼobuvumu nga mbajjukiza olwʼekisa ekyampebwa okuva eri Katonda,

¹⁶kubanga nze ndi muweereza wa Kristo Yesu eri Abaamawanga, nga nkola obuweereza obutukuvu nga mbulira Enjiri ya Katonda, ekiweebwayo kyʼAbaamawanga kiryoke kikkirizibwe, nga kitukuzibbwa Mwoyo Mutukuvu.

¹⁷Noolwekyo neenyumiririza mu Kristo olwʼomulimu gwa Katonda;

¹⁸kubanga siryaŋŋanga kwogera bintu Kristo byʼatakolera mu nze Abaamawanga balyoke babeere abawulize mu kigambo ne mu bikolwa,

¹⁹ne mu maanyi agʼobubonero nʼebyʼamagero, ne mu maanyi agʼOmwoyo wa Katonda. Bwe ntyo okuva e Yerusaalemi nʼokwetooloola okutuuka mu Iruliko[5], mbulidde Enjiri ya Kristo mu bujjuvu.

²⁰Nduubirira okubuulira Enjiri mu bifo etayatulwanga linnya lya Kristo, nneme okuzimba ku musingi gwʼomuntu omulala,

²¹ⓖ nga bwe kyawandiikibwa nti,

²¹“Abo abatategeezebwanga bimufaako baliraba, nʼabo abatawulirangako balitegeera.”

²²Kyennava nziyizibwanga ennyo okujja gye muli;

²³naye kaakano nga bwe sikyalina kifo mu bitundu byʼeno, ate nga maze emyaka mingi nga njagala okujja gye muli, nsubira okujjayo,

²⁴bwe ndiba nga ndaga mu Esupaniya. Kubanga nsuubira okubalaba nga mpitayo, nʼoluvannyuma munnyambe okuva eyo ndyoke ntuukirize ekitundu ekisooka.

²⁵Naye kaakano ndaga e Yerusaalemi okuweereza abatukuvu.

²⁶Abʼomu Makedoniya ne mu Akaya baasanyuka okuwaayo ku byabwe eri abatukuvu abaavu abʼomu Yerusaalemi.

²⁷Baasanyuka era balina ebbanja gye bali, kubanga ngʼAbaamawanga bwe baagabana ku bintu ebyʼomwoyo okuva gye bali, nʼAbaamawanga nabo basaanye okubaweereza mu bintu ebyʼomubiri.

²⁸Noolwekyo bwe ndimaliriza ekyo ne mbakwasa ekibala ekyo, ndiyitira ewammwe nga ŋŋenda Esupaniya.

²⁹Era mmanyi nga bwe ndijja gye muli, ndijja nʼomukisa gwa Kristo mu bujjuvu.

³⁰Kaakano mbakuutira abooluganda, mu Mukama waffe Yesu Kristo ne mu kwagala kwʼOmwoyo, okufubiranga awamu nange, nga munsabira eri Katonda,

³¹mpone abo abajeemu mu Buyudaaya, nʼobuweereza bwange busiimibwe abatukuvu mu Yerusaalemi,

³²ndyoke nsobole okujja gye muli olwʼokwagala kwa Katonda, okuwummulira awamu nammwe, nga ndi musanyufu.

³³Kale kaakano Katonda owʼemirembe, abeerenga nammwe mwenna. Amiina.