Abaruumi 2:1-29 LGCB2014 - Bible AI

¹Gwe anenya omuntu omulala, okola ebibi bye bimu ne byʼonenyeza omuntu oyo. Kyonoova olema okubeera nʼekyʼokuwoza, kubanga bwʼokola bwʼotyo, weesalira wekka omusango.

²Naye kaakano, tumanyi nga Katonda mutuufu okunenya abo abakola ebiri ngʼebyo.

³Naye ggwe omuntu obuntu, akola ebiri ngʼebyo, kyokka nʼonenya abantu abalala, olowooza nga Katonda alikuleka?

⁴Oba onyooma ekisa kya Katonda ekingi, nʼokugumiikiriza kwe nʼobukwatampola bwe? Tomanyi ngʼekisa kya Katonda kikuleeta mu kwenenya?

⁵Naye olwʼobukakanyavu bwo nʼomutima oguteenenya, weeterekera ekiruyi ku lunaku lwʼekiruyi nʼokubikkulirwa, Katonda lwʼalisalirako omusango ogwʼobutuukirivu.

⁶ⓑ Katonda aliwa buli omu empeera esaanira ebikolwa bye.

⁷Aliwa obulamu obutaggwaawo abo abaakola obulungi, nga balina essuubi eryʼokuweebwa ekitiibwa, ettendo nʼobulamu obwʼemirembe nʼemirembe.

⁸Naye abo abeenoonyeza ebyabwe, abajeemera amazima nga bagondera obutali butuukirivu, kiriba kiruyi na busungu.

⁹Walibaawo ennaku nʼokubonaabona ku buli mmeeme yʼomuntu akola ebibi, okusookera ku Muyudaaya nʼoluvannyuma ku Munnaggwanga.

¹⁰Naye ekitiibwa nʼettendo nʼemirembe biriba ku buli akola ebituufu, okusookera ku Muyudaaya nʼoluvannyuma ku Munnaggwanga.

¹¹Kubanga Katonda tasosola mu bantu.

¹²Abo bonna abaayonoona olwʼobutamanya mateeka, balizikirira; era nʼabo bonna abaamanya amateeka ne boonoona, bwe batyo bwe balisalirwa omusango, okusinziira mu Mateeka.

¹³Kuba abawulira obuwulizi amateeka, si be bejjeerera eri Katonda, wabula abo abakola bye galagira, be baliweebwa obutuukirivu.

¹⁴Abaamawanga abatalina mateeka bwe bakolera mu buzaaliranwa ebintu ebyʼAmateeka, ebintu ebyo byennyini bifuuka amateeka gye bali, newaakubadde ngʼAmateeka tegaabaweebwa.

¹⁵Ekyo kiraga ngʼAmateeka gawandiikibbwa mu mitima gyabwe, era kikakasa munda mu birowoozo byabwe, ngʼemitima gyabwe giribasaliriza omusango oba okubejjeereza okusinziira ku ekyo kye bamanyi.

¹⁶Kino kiribaawo ku lunaku Katonda kwʼaliramulira abantu olwʼebyo bye baakisa, ngʼenjiri yange bwʼeri ku bwa Yesu Kristo.

¹⁷Abamu ku mmwe mweyita Bayudaaya. Mwesiga amateeka ne mwewaana nga bwe mumanyi Katonda.

¹⁸Bwe musoma ebyawandiikibwa muyiga engeri Katonda gyʼayagala mweyise ne muzuula ekituufu.

¹⁹Mukakasa nga bwe muli abakulembeze bʼabazibe bʼamaaso, era ettabaaza eri abo bonna abali mu kizikiza.

²⁰Naye olwokubanga, amateeka ga Katonda gatuwa amagezi nʼamazima, mulowooza muyinza okuyigiriza abatali bagezi nʼabaana abato.

²¹Kale ggwe ayigiriza abalala, lwaki toyinza kweyigiriza wekka? Ategeeza abalala obutabba, tobba?

²²Ategeeza obutayenda, toyenda? Akyawa ebifaananyi, si ggwe onyaga ebyʼomu masabo?

²³Mwenyumiririza mu mateeka, naye ne muswaza Katonda olwʼobutagatuukiriza.

²⁴ⓒ Ekyawandiikibwa kigamba nti, “Olwʼebikolwa byammwe ebyo, erinnya lya Katonda kyelivudde livvoolebwa mu mawanga.”

²⁵Okukomolebwa kugasiza ddala bwʼokwata amateeka, naye bwʼotagatuukiriza tewaba njawulo wakati wo nʼatali mukomole.

²⁶Kale obanga atali mukomole akwata amateeka, talibalibwa ngʼeyakomolebwa?

²⁷Noolwekyo ataakomolebwa mu buzaaliranwa naye ngʼakuuma amateeka, alikusaliza omusango gwe alina amateeka amawandiike nʼotagatuukiriza ate nga wakomolebwa.

²⁸Okweyisa ngʼOmuyudaaya ate nga wakomolebwa, tekikufuula Muyudaaya yennyini.

²⁹Okuba Omuyudaaya yennyini oteekwa okugondera amateeka. Okukomolebwa okutuufu kwe kukomolebwa okubaawo mu mutima, so si okwʼomubiri. Omuntu ngʼoyo atenderezebwa Katonda, so si abantu.