Abaruumi 3:1-31 LGCB2014 - Bible AI

¹Kaakano olwo Omuyudaaya alina nkizo ki? Oba okukomolebwa kugasa ki?

²Kugasa nnyo mu ngeri nnyingi. Okusookera ddala, Abayudaaya be baateresebwa ebigambo bya Katonda.

³Kituufu nti abamu ku bo tebakkiriza bigambo ebyo. Obutakkiriza bwabwe buliggyawo obwesigwa bwa Katonda, olwʼokuba nga bo tebaalina kukkiriza?

⁴ⓓ Tekisoboka. Katonda ye wa mazima, newaakubadde nga buli muntu yenna mulimba. Ebyawandiikibwa bigamba nti,

⁴“Olyoke otuukirire mu bigambo byo, era osinge bwʼosala omusango.”

⁵Naye obanga obutali butuukirivu bwaffe bulagira ddala obutuukirivu bwa Katonda, tunaayogera ki? Kikyamu Katonda okutunyiigira era nʼatubonereza? Mu kino njogera ngʼomuntu.

⁶Nedda, sikikyamu. Katonda alisalira atya ensi omusango?

⁷Naye obanga obulimba bwammwe bweyongera okugulumiza Katonda, nga kiraga Katonda bwʼali owʼamazima, oyinza okwebuuza lwaki okyasalirwa omusango ngʼomwonoonyi?

⁸Era okyayinza okwongerako na kino nti Tukolenga ebibi mulyoke muveemu ebirungi, ngʼabamu bwe batuwaayiriza nti, bwe tugamba. Kyokka Katonda mwenkanya, era alibasalira nga bwe kibagwanira.

⁹Bino byonna bitegeeza ki? Kitegeeza nti Ffe Abayudaaya tuli bulungi nnyo okusinga abantu abalala bonna? Nedda, nʼakatono. Ffenna tufugibwa kibi, ne bwe baba Abayudaaya oba Abaamawanga.

¹⁰Ngʼebyawandiikibwa bwe bigamba nti:

¹⁰“Tewali mutuukirivu nʼomu.

¹¹Tewali ategeera wadde anoonya Katonda.

¹²ⓔ Bonna baakyama, bonna awamu baafuuka kitagasa; tewali nʼomu akola obulungi, tewali nʼomu.”

¹³ⓕ ⓖ “Emimiro gyabwe giringa entaana ezaasaamiridde, nʼemimwa gyabwe gijjudde obulimba.” “Buli kigambo ekibavaamu kiri ngʼobusagwa bwʼomusota.”

¹⁴ⓗ “Emimwa gyabwe gijjudde okukolima nʼobukyayi.

¹⁵Ebigere byabwe byanguwa okuyiwa omusaayi,

¹⁶buli gye balaga baleka abantu baayo mu kuzikirira na mu nnaku njereere.

¹⁷ⓘ Tebamanyi kkubo lya mirembe.”

¹⁸ⓙ “Nʼokutya tebatya Katonda.”

¹⁹Tumanyi nga buli kyawandiikibwa mu mateeka, kyawandiikibwa ku lwʼabo abafugibwa amateeka. Amateeka malambulukufu ku nsonga ezo, omuntu yenna aleme okwekwasa ensonga yonna, ate era ne Katonda okwongera okulaga ngʼensi yonna bwe yasobya.

²⁰Kubanga tewali nʼomu aliweebwa obutuukirivu mu maaso ga Katonda olwʼebikolwa byʼamateeka. Mu mateeka mwe tutegeerera ddala ekibi.

²¹Kale kaakano tutegeere ngʼobutuukirivu bwa Katonda tebutuweebwa lwa kugondera Mateeka. Ekyo kikakasibwa Amateeka ne bannabbi.

²²Obutuukirivu bwa Katonda butuweebwa olwʼokukkiriza Yesu Kristo. Katonda tasosola.

²³Ffenna twayonoona era tetusaanira kitiibwa kya Katonda.

²⁴Kyokka twaweebwa obutuukirivu bwa buwa olwʼekisa kye ekiri mu kununulibwa okuli mu Yesu Kristo;

²⁵Katonda yaweereza Kristo okuba omutango, bwe tukkiriza Kristo olwʼomusaayi gwe yayiwa. Alaga obutuukirivu bwe mu kugumiikiriza ebibi ebyakolebwa edda, be bantu abaayonoona mu biseera biri ebyʼedda.

²⁶Kino kiraga Katonda bwʼalaga okwaniriza kwʼalina eri abantu mu biro bino, bwe baba nʼokukkiriza mu Yesu.

²⁷Kale lwaki twenyumiriza? Tewali nsonga etwenyumirizisa. Lwa kuba nga twagoberera amateeka? Nedda, lwa kukkiriza.

²⁸Noolwekyo omuntu aweebwa obutuukirivu lwa kukkiriza so si lwa kugoberera mateeka.

²⁹Oba Katonda wa Bayudaaya bokka? Si ye Katonda wa mawanga amalala gonna? Weewaawo nabo Katonda waabwe.

³⁰Kubanga ye Katonda omu awa obutuukirivu abaakomolebwa, nʼabo abataakomolebwa olwʼokukkiriza kwabwe.

³¹Kale amateeka tugaggyewo olwʼokukkiriza? Kikafuuwe. Tunyweza manyweze.