Abaruumi 4:1-25 LGCB2014 - Bible AI

¹Kale kiki kye tunaayogera ku jjajjaffe Ibulayimu ku bikwata ku byʼomubiri?

²Singa Ibulayimu yaweebwa obutuukirivu lwa bikolwa, yandyenyumirizza, naye si eri Katonda.

³ⓚ Ebyawandiikibwa bitugamba bitya? Ibulayimu yakkiriza Katonda ne kimubalirwa okuba obutuukirivu.

⁴Omuntu bwʼakola omulimu, asasulwa empeera ye. Empeera gyʼaweebwa, teba kirabo.

⁵Katonda tayinza kukusembeza olwʼebikolwa byo. Katonda asembeza aboonoonyi olwʼokukkiriza kwe balina mu ye.

⁶Kabaka Dawudi naye yayogera kye kimu ku muntu ono Katonda gwʼawa obutuukirivu obutavudde mu bikolwa bye ngʼagamba nti:

⁷“Baweereddwa omukisa, abasonyiyiddwa ebyonoono byabwe, ne baggyibwako ebibi byabwe.

⁸ⓛ Aweereddwa omukisa omuntu, Mukama gwʼatalibalira kibi.”

⁹Kale omukisa guno, gwʼabakomole bokka oba nʼabatali bakomole? Ebyawandiikibwa bitugamba nti Okukkiriza kwa Ibulayimu kwamubalirwa okuba obutuukirivu.

¹⁰Kale, kwamubalirwa kutya? Ngʼakomolebbwa oba nga tannakomolebwa? Nedda si ngʼakomolebbwa naye nga tannakomolebwa.

¹¹Akabonero ke yafuna akʼokukomolebwa, ye nvumbo ku butuukirivu olwʼokukkiriza kwe, nga tannakomolebwa, alyoke abeere jjajja wʼabo bonna abakkiriza nga si bakomole, nabo balyoke babalirwe obutuukirivu.

¹²Ate era ye jjajja wʼabantu bonna, abakomole, era abatambulira mu kkubo eryʼokukkiriza, jjajjaffe Ibulayimu kwe yalina nga tannakomolebwa.

¹³Ibulayimu nʼezzadde lye tebaaweebwa kisuubizo ekyʼokulya ensi yonna, ngʼomugabo gwe, lwa kukwata mateeka. Katonda, ensi yagimusuubiza lwa butuukirivu obwamuweebwa olwʼokukkiriza.

¹⁴Kale obanga baweebwa obusika lwʼamateeka, okukkiriza kuba tekugasa, era nga nʼekisuubizo tekirina makulu.

¹⁵Katonda anyiiga Amateeka ge bwe gatagonderwa. Naye bwe wataba mateeka, tewaba mateeka ga kujeemera.

¹⁶Noolwekyo ekisuubizo kijja lwa kukkiriza, kiryoke kiweebwe lwa kisa, eri ezzadde lyonna, so si ezzadde erigondera amateeka lyokka naye nʼeri ezzadde erya Ibulayimu olwʼokukkiriza; era oyo ye jjajjaffe ffenna.

¹⁷ⓜ Kyawandiikibwa nti, “Nkufudde jjajja wʼamawanga amangi.” Ye jjajjaffe mu maaso gʼoyo gwe yakkiriza, Katonda azuukiza abafu, era alaba ebitaliiwo ngʼebiriwo, era atonda ebintu ebiggya.

¹⁸ⓝ Katonda yasuubiza Ibulayimu abazzukulu bangi. Ne bwe kyalabika ngʼekitasoboka, Ibulayimu yalina okukkiriza mu Katonda, nʼoluvannyuma nʼabeera jjajja wʼamawanga mangi, okusinziira ku ekyo ekyayogerwa nti, “Ezadde lyo bwe liriba.”[3]

¹⁹Teyatendewererwa mu kukkiriza, newaakubadde nga yali wa myaka nga kikumi, nga nʼomubiri gwe munafu nnyo, ate nga ne Saala mugumba.

²⁰Teyabuusabuusa kisuubizo kya Katonda mu butakkiriza, naye yaweebwa amaanyi lwa kukkiriza; nʼagulumiza Katonda.

²¹Yakakasiza ddala nti Katonda kye yasuubiza asobola okukituukiriza,

²²era bwe kityo ne kimubalirwa okuba obutuukirivu.

²³Naye tekyawandiikibwa ku lulwe yekka nti, “Kyamubalirwa okuba obutuukirivu;”

²⁴naye era naffe, abakkiririza mu oyo eyazuukiza Yesu Mukama waffe mu bafu.

²⁵Kristo yaweebwayo okuttibwa olwʼebibi byaffe, nʼazuukizibwa tulyoke tuweebwe obutuukirivu.