Abaruumi 7:1-25 LGCB2014 - Bible AI

¹Temumanyi abooluganda, kubanga njogera eri abamanyi amateeka, ngʼamateeka gafuga oyo yekka akyali omulamu?

²Ka mbawe ekyokulabirako: mu mateeka omukazi omufumbo, asigala nga wa bba, bba bwʼaba ngʼakyali mulamu. Naye bba bwʼafa, omukazi oyo ngʼasumuluddwa mu tteeka eribagatta.

³Noolwekyo omukazi oyo bwe yeegatta nʼomusajja omulala, bba ngʼakyali mulamu, omukazi oyo anaayitibwanga mwenzi. Naye bba bwʼafanga, olwo omukazi omufumbo anaabanga asumuluddwa mu tteeka, era taabenga mwenzi bwʼanaafumbirwanga omusajja omulala.

⁴Nammwe baganda bange mwafa eri amateeka, muli ba mubiri gwa Kristo. Mwegatta ku Kristo eyazuukizibwa okuva mu bafu, tulyoke tubale ebibala ebisanyusa Katonda.

⁵Kubanga bwe twali tukyafugibwa omubiri, okwegomba kwʼebibi kwakoleranga mu bitundu byaffe ebyʼomubiri olwʼamateeka, era enkomerero kwali kufa.

⁶Naye kaakano tetukyafugibwa mateeka. Tuli bafu eri ebyo ebyali bitusibye, era tebitulinaako buyinza. Noolwekyo tuyinza okuweereza Katonda mu ngeri empya eya Mwoyo Mutukuvu, so si mu nkola enkadde eyʼamateeka.

⁷ⓞ Kale tunaayogera ki? Amateeka kye kibi? Kikafuuwe. Singa tewaali mateeka, sanditegedde kibi. Nʼokwegomba kwʼomubiri sandikutegeeredde ddala singa amateeka tegaagamba nti, “Teweegombanga.”

⁸Ekibi kyeyambisa etteeka lino, ne kindeetera okwegomba okwa buli ngeri. Noolwekyo awatali mateeka, ekibi kiba kifu.

⁹Edda nali mulamu awatali mateeka, naye etteeka bwe lyajja, ekibi ne kiramuka, nʼokufa ne nfa.

¹⁰Era nʼenkizuula ngʼetteeka eryali liteekwa okumpa obulamu, lye lyandetera okufa.

¹¹Ekibi kyeyambisa ekiragiro ekyo ne kinnimba, era ne kinzita.

¹²Noolwekyo amateeka matukuvu, era nʼekiragiro kitukuvu, kiruŋŋamya era kirungi.

¹³Kale ekirungi gye ndi, ate kye kyafuuka okufa? Nedda. Ekibi kye kyakozesa ekiragiro ekirungi kiryoke kinzite. Noolwekyo tulaba ekibi bwe kiri, ekibi ddala.

¹⁴Tumanyi ngʼamateeka mwoyo, naye nze omuntu obuntu, natundibwa ngʼomuddu nfugibwe ekibi.

¹⁵Kubanga kye nkola sikimanyi. Kye njagala si kye nkola, naye kye nkyawa kye nkola.

¹⁶Newaakubadde nga nkola kye mmanyi nga kikyamu, nzikiriza ngʼamateeka malungi.

¹⁷Noolwekyo si nze nkola ebintu ebyo ebibi, wabula ekibi ekiri mu nze.

¹⁸Mmanyi nga mu nze, temuli kalungi nʼakamu. Ne bwe njagala okukola ekirungi, tewali kirungi kye nkola.

¹⁹Ekirungi kye njagala okukola si kye nkola, naye ekibi kye saagala kye nkola.

²⁰Naye obanga kye saagala kye nkola, si nze mba nkikola, wabula ekibi ekibeera mu nze.

²¹Noolwekyo nzudde mu mateeka nga bwe njagala okukola ebirungi, ekibi kimbeera kumpi.

²²Mu nze mu muntu owʼomunda njagala nnyo okugondera amateeka ga Katonda.

²³Naye mu mubiri gwange gwonna, ndaba amateeka agʼenjawulo nga gawakana nʼetteeka lya Katonda amagezi gange ge limanyi. Ekyo kinfuula omusibe wʼamateeka agʼekibi, ekikolera mu mubiri gwange.

²⁴Nga ndi muntu munaku! Ani alindokola mu mubiri guno ogugenda okufa?

²⁵Kyokka Katonda yeebazibwe mu Yesu Kristo Mukama waffe.

²⁵Nze kennyini mu birowoozo byange, ndi muddu wʼamateeka ga Katonda era gwe mpeereza, newaakubadde ngʼokwegomba kwange okwʼomubiri, mpeereza etteeka lyʼekibi.