Abaruumi 8:1-39 LGCB2014 - Bible AI

¹Noolwekyo abo abali mu Kristo Yesu, tebaliiko musango; abo abatagoberera kwegomba okwʼomubiri wabula ne bagoberera Omwoyo.

²Kubanga etteeka eryʼOmwoyo aleeta obulamu mu Kristo Yesu, lyannunula okuva mu tteeka lyʼekibi nʼokufa.

³Amateeka ga Musa kye gataayinza kukola, olwʼokunafuyizibwa omubiri, Katonda yakikola mu Mwana we yennyini bwe yamutuma mu kifaananyi kyʼomubiri ogwʼekibi, nʼasalira ekibi omusango mu mubiri.

⁴Ekyo kyabaawo, ebyʼobutuukirivu mu mateeka biryoke bituukirire mu ffe bwe tugondera Omwoyo, ffe abatatambulira mu mubiri naye abatambulira mu Mwoyo.

⁵Abo abalowooleza mu mubiri balowooza bintu bya mubiri, naye abalowooleza mu Mwoyo balowooza bya Mwoyo.

⁶Okulowooleza mu byʼomubiri kwe kufa, naye okufugibwa Omwoyo bwe bulamu nʼemirembe.

⁷Kubanga okulowooza ebyʼomubiri kya bulabe eri Katonda. Ebirowoozo ebyʼomubiri tebiyinza kuwulira mateeka ga Katonda.

⁸Nʼabo abafugibwa omubiri tebayinza kusanyusa Katonda.

⁹Naye mmwe temufugibwa mubiri wabula mufugibwa Mwoyo, kubanga Omwoyo wa Katonda abeera mu mmwe. Era omuntu yenna bwʼataba na Mwoyo wa Kristo, oyo si wa Kristo.

¹⁰Era obanga Kristo ali mu mmwe, omubiri gwammwe mufu olwʼekibi, ate ngʼomwoyo gwammwe mulamu olwʼobutuukirivu.

¹¹Era obanga Omwoyo wʼoyo eyazuukiza Yesu okuva mu bafu abeera mu mmwe, oyo eyazuukiza Kristo mu bafu, alifuula emibiri gyammwe egifa okuba emiramu ku bwʼOmwoyo we abeera mu mmwe.

¹²Noolwekyo abooluganda tulina ebbanja, so si eri omubiri okugondera bye gutulagira.

¹³Kubanga bwe munaagobereranga omubiri, mugenda kufa. Naye bwe munnatta ebikolwa ebyʼomubiri, muliba balamu,

¹⁴kubanga abo bonna abakulemberwa Omwoyo wa Katonda be baana ba Katonda.

¹⁵Temwaweebwa mwoyo gwa buddu ate mutye, wabula mwaweebwa Omwoyo eyabafuula abaana, era ku bwʼoyo tumukoowoola nti Aba, Kitaffe.

¹⁶Omwoyo yennyini akakasiza wamu nʼomwoyo waffe nga bwe tuli abaana ba Katonda.

¹⁷Kale nga bwe tuli abaana, tuli basika ba Katonda, era tulisikira wamu ne Kristo, bwe tubonaabonera awamu naye, tulyoke tuweerwe wamu naye ekitiibwa.

¹⁸Okubonaabona kwe tubonaabona kaakano kutono nnyo bwe kugeraageranyizibwa nʼekitiibwa ekiritubikulirwa.

¹⁹Ebitonde birindirira nʼessuubi lingi ekiseera abaana ba Katonda lwe baliragibwa.

²⁰Kubanga ebitonde tebyafugibwa butaliimu nga byeyagalidde, wabula ku bwʼoyo eyabifugisa, mu kusuubira.

²¹Ebitonde birifuulibwa bya ddembe okuva mu kufugibwa okuvunda ne bigabanira wamu nʼabaana ba Katonda ekitiibwa ekyʼokuba mu ddembe.

²²Tumanyi ngʼebitonde byonna bisinda era ne birumwa ngʼomukazi alumwa okuzaala bwʼabeera.

²³Naye ate si ekyo kyokka, era naffe abalina ebibala ebibereberye ebyʼOmwoyo, naffe tusinda munda yaffe nga tulindirira okufuuka abaana, kwe kununulibwa kwʼemibiri gyaffe.

²⁴Twalokolebwa lwa ssuubi eryo. Naye essuubi erirabibwa si ssuubi; kubanga ani asuubira kyʼalabako?

²⁵Naye bwe tusuubira kye tutalabako, tukirindirira nʼokugumiikiriza.

²⁶NʼOmwoyo bwʼatyo atubeera mu bunafu bwaffe. Tetumanyi kusaba nga bwe kitugwanira, naye Omwoyo yennyini atwegayiririra nʼokusinda okutayogerekeka.

²⁷Oyo akebera emitima, amanyi Omwoyo kyʼalowooza, kubanga yeegayiririra abatukuvu ngʼokusiima kwa Katonda bwe kuli.

²⁸Era tumanyi nga eri abo abaagala Katonda, era abo abayitibwa ngʼokuteesa kwe bwe kuli, ebintu byonna bibatuukako olwʼobulungi.

²⁹Kubanga abo be yamanya olubereberye, yabalonda okufaananyizibwa mu kifaananyi kyʼOmwana we, ye abeerenga omubereberye mu booluganda abangi.

³⁰Abo be yalonda, nʼokubayita yabayita, nʼabo be yayita, yabawa obutuukirivu, nʼabo be yawa obutuukirivu yabagulumiza.

³¹Kale tunaagamba ki ku bintu bino? Katonda bwʼabeera ku lwaffe, ani asobola okutulwanyisa?

³²Oyo ataasaasira Mwana we ye, naye nʼamuwaayo ku lwaffe ffenna, talituwa buwi bintu byonna awamu naye?

³³Ani aliroopa abalonde ba Katonda? Katonda yʼawa obutuukirivu.

³⁴Ani alibasalira omusango? Kristo Yesu yafa, kyokka okusinga byonna yazuukizibwa, era ali ku mukono ogwa ddyo ogwa Katonda, ngʼatwegayiririra.

³⁵Ani alitwawukanya nʼokwagala kwa Kristo? Kubonaabona, oba bulumi, oba kuyigganyizibwa, oba njala, oba kuba bwerere, oba kabi, oba kitala?

³⁶ⓟ Kyawandiikibwa nti:

³⁶“Ku lulwo tutiisibwatiisibwa nʼokuttibwa obudde okuziba, era tubalibwa ngʼendiga ezʼokusalibwa.”

³⁷Naye mu bino byonna tuwangudde nʼokukirawo ku bwʼoyo eyatwagala.

³⁸Kubanga nkakasiza ddala nga newaakubadde okufa, wadde obulamu, wadde bamalayika, wadde abafuzi, wadde ebiriwo, wadde ebigenda okujja, wadde amaanyi,

³⁹wadde obugulumivu, wadde okukka wansi, wadde ekitonde ekirala kyonna, tewali kiriyinza kutwawukanya nʼokwagala kwa Katonda okuli mu Kristo Yesu Mukama waffe.