Abaruumi 9:1-33 LGCB2014 - Bible AI

¹Njogera amazima mu Kristo, sirimba, omwoyo gwange nga gunkakasa mu Mwoyo Mutukuvu,

²nga ndimunakuwavu nnyo era nga nnumwa mu mutima.

³Nnali njagala nze mwene nkolimirwe Katonda era njawukanyizibwe ku Kristo olwa baganda bange, bwe tuli abʼomu mubiri,

⁴be Bayisirayiri, abantu ba Katonda abalonde. Katonda yabalaga ekitiibwa kye, nʼakola nabo endagaano, nʼabawa nʼamateeka ge. Yeekaalu yagibawa, nʼabawa nʼebyasuubizibwa.

⁵Balina bajjajjaabwe abamanyiddwa, Kristo be yasibukamu mu mubiri. Nsaba Katonda afuga byonna atenderezebwenga emirembe gyonna, Amiina.

⁶Naye si kuba nti Katonda yalemwa okutuukiriza kye yasuubiza. Si bonna abʼomu Isirayiri nti bantu ba Katonda ddala.

⁷ⓠ Ate so si nti lyʼezzadde lya Ibulayimu bonna balyoke babeere abaana, naye ekisuubizo kyali ku Isaaka bwe kyagambibwa nti, “Mu Isaaka mwe ndituukiririza ebyo byonna bye nakusuubiza.”

⁸Kino kitegeeza nti Abaana abʼomubiri si be baana ba Katonda, wabula abo abʼokusuubiza be babalibwa okuba ezzadde lya Ibulayimu.

⁹ⓡ Kubanga ekigambo kyʼokusuubiza kye kino nti, “Mu kiseera nga kino Saala alizaala omwana owoobulenzi.”

¹⁰Ate si ekyo kyokka, naye ne Isaaka jjajjaffe yalina Lebbeeka eyali olubuto.

¹¹Naye ngʼabalongo tebannazaalibwa, era nga tebannabaako kye bakola kyonna ekirungi oba ekibi, okusiima kwa Katonda nga bwe kuli,

¹²ⓢ si lwa bikolwa wabula ku bwʼoyo eyabayita, kyategeezebwa Lebbeeka nti, “Omukulu yʼaliba omuweereza wʼomuto.”

¹³ⓣ Era nga bwe kyawandiikibwa nti, “Yakobo namwagala, naye Essawu namukyawa.”

¹⁴Kale tunaagamba ki? Ddala ddala Katonda talina bwenkanya? Kikafuuwe.

¹⁵ⓤ Agamba Musa nti,

¹⁵“Ndisaasira oyo gwe ndisaasira, era ndikwatirwa ekisa oyo gwe ndikwatirwa ekisa.”

¹⁶Noolwekyo tekiva ku ebyo omuntu byʼayagala newaakubadde byʼakola, wabula ku kusaasira kwa Katonda.

¹⁷ⓥ Ebyawandiikibwa kyebyava byogera ku Falaawo nti, “Kyennava nkuyimusa, ndyoke njolese amaanyi gange mu ggwe, erinnya lyange liryoke litegeezebwe mu nsi zonna.”

¹⁸Noolwekyo Katonda asaasira oyo gwʼayagala okusaasira, ate nʼakakanyaza omutima gwʼoyo gwʼayagala okukakanyaza.

¹⁹Omu akyayinza okumbuuza nti, Lwaki Katonda atunenya, obanga yʼatuleetera okukola nga bwʼasiima?

²⁰ⓦ Naye ggwe omuntu obuntu, ggwe ani addamu ngʼowakanya Katonda? Ekibumbe kiyinza okubuuza eyakibumba nti, “Lwaki wammumba bwʼoti?”

²¹Oba omubumbi talina buyinza ku bbumba, okubumbamu ekibya ekyʼomugaso, oba okubumbamu ekitali kya mugaso?

²²Katonda yayagala okulaga obusungu bwe, nʼamaanyi ge eri abo bonna abaali basaanira okuzikirizibwa, kyokka nʼabalaga obugumiikiriza.

²³Ekyo yakikola alyoke amanyise obugagga bwʼekitiibwa kye, eri abo bonna be yeerondera okugabanira awamu ekitiibwa kye.

²⁴Naffe yatuyita, si Bayudaaya bokka naye nʼAbaamawanga.

²⁵ⓧ Ne mu Koseya agamba nti,

²⁵“Abataali bantu bange ndibayita abantu bange, Ne gwe nnali ssaagala, ndimwagala.”

²⁶ⓨ Mu kifo omwo mwe baayitirwa nti, “Temuli bantu bange, mwe baliyitirwa abaana ba Katonda omulamu.”

²⁷ⓩ Isaaya ayogera eri Isirayiri mu ddoboozi eryʼomwanguka nti, “Omuwendo gwʼabaana ba Isirayiri ne bwe gulyenkana ngʼomusenyu gwʼennyanja, ekitundu ekirisigalawo kye kirirokolebwa.

²⁸Kubanga Mukama alisalawo era alituukiriza mangu ekyo kye yagamba okukola ku nsi.”

²⁹ⓐ Era nga Isaaya bwe yayogera edda nti, “Singa Mukama owʼEggye teyatulekerawo zzadde, twandifuuse nga Sodomu, era twandifaananye nga Ggomola.”

³⁰Kale tunaagamba ki? Tugambe nti Abaamawanga abataagobereranga butuukirivu, baafuna obutuukirivu, bwe butuukirivu obuva mu kukkiriza,

³¹naye Isirayiri mu kugobereranga amateeka agʼobutuukirivu, teyafuna butuukirivu obwo?

³²Lwaki? Ekyo baalema okukituukako kubanga tebaagoberera butuukirivu mu kukkiriza wabula mu bikolwa. Beesittala ku jjinja eryo eryesittalwako,

³³ⓑ ⓒ nga bwe kyawandiikibwa nti,

³³“Laba, nteeka mu Sayuuni ejjinja eryesittalwako[4] nʼolwazi olulibasuula. Oyo amukkiriza taliswazibwa.”