Amosi 2:1-16 LGCB2014 - Bible AI

¹Bwʼati bwʼayogera Mukama nti, “Olwʼebyonoono bya Mowaabu ebisatu weewaawo ebina, siriggyawo busungu bwange. Kubanga yayokya amagumba ga kabaka wa Edomu ne gafuuka evvu.

²Ndiweereza omuliro ku Mowaabu era gulyokya ebigo bya Keriyoosi. Abantu ba Mowaabu balifiira wakati mu kusasamala okungi omuliba okuleekaana nʼokufuuwa amakondeere.

³Ndizikiriza omukulembeze wa Mowaabu nʼabakungu baamu bonna, ndibatta,”

³bwʼayogera Mukama.

⁴Bwʼati bwʼayogera Mukama nti, “Olwʼebyonoono bya Yuda ebisatu weewaawo ebina, siriggyawo busungu bwange. Kubanga banyoomye amateeka ga Mukama, ne batakuuma biragiro bye nabawa ne bagondera bakatonda abʼobulimba bajjajjaabwe be baagobereranga.

⁵Ndiweereza omuliro ku Yuda ne njokya ebigo bya Yerusaalemi.”

⁶Bwʼati bwʼayogera Mukama nti, “Olwʼebyonoono bya Isirayiri ebisatu weewaawo ebina, siriggyawo busungu bwange. Batunda obutuukirivu bafune ffeeza, ne batunda nʼabaavu olwʼomugogo gwʼengatto.

⁷Balinnyiririra emitwe gyʼabaavu mu nfuufu, nʼabajoogebwa ne batalamulwa mu bwenkanya. Omwana ne kitaawe bayingira eri omuwala omu ne boonoona erinnya lyange.

⁸Bagalamira okumpi ne buli kyoto ku ngoye ezaweebwayo ngʼobweyamo. Mu nnyumba ya bakatonda baabwe mwe banywera omwenge oguleetebwa abatanziddwa.”

⁸

⁹“Nazikiriza Abamoli ku lwabwe newaakubadde nga baali bawanvu ngʼemivule era nga bamaanyi ngʼemyera. Nazikiriza ebibala ebyali waggulu okutuuka ku mirandira egyali wansi.

¹⁰Nakuggya mu nsi yʼEmisiri, ne nkukulemberera emyaka amakumi ana mu ddungu, weetwalire ensi yʼAbamoli.

¹¹Nayimusa abamu ku batabani bammwe okubeera ba nnabbi, ne ku balenzi bammwe okuba Abawonge ba Mukama. Si bwe kiri bwe kityo abantu ba Isirayiri?”

¹¹bwʼayogera Mukama.

¹²“Naye mmwe ne mudda mu kuwa Abawonge ba Mukama omwenge okunywa, ne muwa bannabbi amateeka nga mubagamba nti Temuwa byabunnabbi.

¹³Laba, ndibasesebbula ngʼeggaali eryettisse emmere eyʼempeke bwe lisesebbula ekiri mu kkubo lyalyo.

¹⁴Abanguwa tebaliwona, nʼabʼamaanyi tebalikuŋŋaanya maanyi gaabwe era nʼomuzira nnamige talisobola kuwonya bulamu bwe.

¹⁵Omukubi wʼobusaale omukugu taliyimirira kunywera, nʼomuserikale owʼebigere nnakinku talisobola kuwenyuka. Abo abasajja abazira abeebagazi bʼembalaasi tebalisobola kuwonya bulamu bwabwe.

¹⁶Ku lunaku olwo abalwanyi abazira nnamige balidduka bukunya!”

¹⁶bwʼatyo bwʼayogera Mukama.