Amosi 4:1-13 LGCB2014 - Bible AI

¹Muwulire kino mmwe ente ezʼomu Basani ezibeera ku Lusozi Samaliya, mmwe abakazi abajooga abaavu ne munyigiriza abanaku, era abagamba babbaabwe nti, “Mutuletereyo ekyokunywa.”

²Mu butukuvu bwe Mukama Katonda alayidde nti, “Ekiseera kijja lwe balibasika nʼamalobo, era abalisembayo ku mmwe ne basikibwa nʼamalobo agavuba.

³Mulisikibwa okuva mu mayumba gammwe ne musuulibwa ebweru nga muyisibwa mu bituli ebibotoddwa mu bbugwe, musuulibwe ku Kalumooni,

³bwʼayogera Mukama.

⁴Kale mmwe mugende e Beseri mukoleyo ebitasaana; era mugende ne Girugaali mwongere okukola ebibi. Mutwalengayo ssaddaaka zammwe buli nkya, nʼekimu ekyʼekkumi buli myaka esatu.

⁵Muweeyo ekiweebwayo ekyʼokwebaza ekyʼemigaati egizimbulukusibbwa, mulangirire nʼebiweebwayo ebyʼekyeyagalire; mwe mwenyumiririza, mmwe Abayisirayiri kubanga ekyo kye mwagala,”

⁵bwʼayogera Mukama Katonda Ayinzabyonna.

⁶“Nabaleetera enjala embuto zammwe ne ziba njereere mu buli kibuga, ne ssibawa kyakulya mu buli kabuga, naye era ne mugaana okudda gye ndi,”

⁶bwʼayogera Mukama.

⁷“Ne mbamma enkuba ngʼekyabulayo emyezi esatu amakungula gatuuke. Ne ntonnyesa enkuba mu kibuga ekimu ne ngiziyiza mu kirala. Yatonnyanga mu nnimiro emu, mu ndala nʼetatonnya, ebirime ne biwotoka.

⁸Abantu ne bavanga mu kibuga ekimu ne balaga mu kirala nga banoonya amazzi banyweko, naye ne gababula; naye era ne mutakyuka kudda gye ndi,”

⁸bwʼayogera Mukama.

⁹“Emirundi mingi ebirime byammwe na bigengewaza. Nabileetako obulwadde. Enzige nazo ne zirya emitiini gyammwe nʼemizeeyituuni gyammwe, naye era temwadda gye ndi,”

⁹bwʼayogera Mukama.

¹⁰“Nabasindikira kawumpuli nga gwe nasindika mu Misiri. Abavubuka bammwe ne mbattira mu lutalo nʼekitala awamu nʼembalaasi zammwe ze mwawamba. Okuwunya kwʼolusisira lwammwe ne kuyitirira nnyo naye era ne mugaana okudda gye ndi,”

¹⁰bwʼayogera Mukama.

¹¹“Nazikiriza abamu ku mmwe nga bwe nakola Sodomu ne Ggomola, ne muba ngʼolumuli olusikiddwa mu muliro ogwaka naye era ne mulema okudda gye ndi,”

¹¹bwʼayogera Mukama.

¹²“Kyendiva nkukola bwe ntyo, ggwe Isirayiri, era ndikwongerako ebibonoobono. Noolwekyo weetegeke okusisinkana Katonda wo, ggwe Isirayiri.”

¹³Kubanga laba, oyo eyatonda ensozi era ye yatonda nʼembuyaga era abikkulira omuntu ebirowoozo bye. Yafuula enkya okubeera ekiro, era alinnya mu bifo ebigulumivu ebyʼensi. Mukama Katonda owʼEggye lye linnya lye.