Amosi 5:1-27 LGCB2014 - Bible AI

¹Muwulirize mmwe abantu ba Isirayiri ekigambo kino ekyʼennaku ekibakwatako.

²“Isirayiri embeerera agudde obutayimuka nate. Bamwabulidde era tewali amuyimusa.”

³Bwʼati bwʼayogera Mukama Katonda nti, “Ekibuga ekiyungula abalwanyi olukumi okugenda mu lutalo kirisigazaawo kikumi bokka, nʼekyo ekiweereza ekikumi, kirizza kkumi bokka!”

⁴Bwʼati bwʼayogera Mukama eri ennyumba ya Isirayiri nti, “Munnoonye kale munaabanga balamu.

⁵Temunnoonyeza Beseri so temulaga Girugaali wadde okulaga e Beeruseba. Kubanga abantu bʼe Girugaali balitwalibwa mu buwaŋŋanguse era ne Beseri kiriggwaawo.”

⁶Munoonye Mukama munaabanga balamu aleme okubuubuuka ngʼomuliro ku nnyumba ya Yusufu; guligyokya nga tewali wa kuguzikiza mu Beseri.

⁷Mmwe abantu ba Isirayiri abafuula obwenkanya okuba ekyʼokufumwa obufumwa mutulugunya obutuukirivu.

⁸Oyo eyakola ettendo eriri mu mmunyeenye ezaaka ngʼebizungirizi era afuula ekisiikirize okubeera enkya era akyusa obudde ne buva mu kitangaala ne bufuuka ekiro, ayita amazzi gʼomu nnyanja ne gafukirira ensi ngʼenkuba, Mukama lye linnya lye.

⁹Okutemya nʼokuzibula aleeta okuzikirira ku bʼamaanyi era nʼasaanyaawo ebibuga ebiriko ebigo.

¹⁰Mukyawa abalamuzi abasalawo mu bwenkanya era munyooma nʼabo aboogera amazima.

¹¹Olinnyirira omwavu, nʼomuwaliriza okukuwa emmere eyʼempeke. Newaakubadde nga mwezimbidde amayumba agʼamayinja, temuligabeeramu; era newaakubadde nga mwesimbidde ennimiro zʼemizabbibu ennungi, temulinywa ku wayini waamu.

¹²Ebibi byammwe mbimanyi, nga bingi ate nga bisasamaza. Munyigiriza omutuukirivu ne mulya nʼenguzi, abaavu temubasalira musango mu bwenkanya.

¹³Noolwekyo oyo alina amagezi kyaliva asirika obusirisi mu biseera ngʼebyo kubanga ennaku mbi.

¹⁴Munoonyenga okukola obulungi, so si obubi munaabeeranga balamu! Bwʼatyo Mukama Katonda owʼEggye anaabeeranga mubeezi wammwe nga bulijjo bwe mumuyita.

¹⁵Mukyawe ekibi, mwagalenga ekirungi era embuga zʼamateeka zibeerengamu obwenkanya. Oboolyawo Mukama Katonda owʼEggye anaabakwatirwa ekisa abantu abo abaasigalawo ku Yusufu.

¹⁶Noolwekyo bwʼati bwʼayogera Mukama Katonda owʼEggye nti, “Walibeerawo okwaziirana mu nguudo nʼokukaaba mu buli kibangirizi ekyʼomu kibuga. Nʼabalimi baliyitibwa, bakaabe, nʼabakungubazi bakube ebiwoobe.

¹⁷Walibaawo okukaaba mu buli nnimiro ya mizabbibu kubanga nzija okuyita wakati mu mmwe.”

¹⁷

¹⁸Zibasanze mmwe abasuubira olunaku lwa Mukama. Lwaki mwesunga olunaku lwa Mukama? Olunaku olwo luliba kizikiza so si kitangaala.

¹⁹Olunaku olwo lulibeera ngʼomusajja adduka empologoma nʼasisinkana eddubu, bwʼaba ngʼayingira mu nnyumba ne yeekwata ku kisenge, ate nʼabojjebwa omusota.

²⁰Olunaku lwa Mukama, teruliba kizikiza awatali kitangaala nʼakatono, ngʼekizikiza ekikutte ennyo?

²¹Nkyawa, era nnyooma embaga zammwe nʼemikolo gyammwe egyʼeddiini so sisanyukira kukuŋŋaana kwammwe.

²²Weewaawo, ne bwe munaawaayo gye ndi ebiweebwayo byammwe ebyokebwa nʼebiweebwayo ebyʼemmere eyʼempeke, sijja kubikkiriza. Ne bwe mulireeta ebiweebwayo olwʼemirembe ebisinga obulungi, siribikkiriza.

²³Muggyeewo ennyimba zammwe ezʼokutendereza. Siriwuliriza na bivuga ngʼentongooli zammwe.

²⁴Kye njagala okulaba ge mazima nʼobwenkanya nga bikulukuta ngʼamazzi, nʼobutuukirivu nga bukulukuta ngʼomugga ogwʼamaanyi.

²⁴

²⁵“Mwandeeteranga ssaddaaka nʼebiweebwayo mu ddungu emyaka gyonna amakumi ana, ggwʼennyumba ya Isirayiri?

²⁶Muyimusizza essabo lya kabaka wammwe, amaanyi ga bakatonda bammwe, nʼemmunyeenye ya katonda wammwe, bye mwekolera mmwe.

²⁷Kyendiva mbawaŋŋangusa okusukka Ddamasiko,” bwʼayogera Mukama, ayitibwa Katonda Ayinzabyonna.