Amosi 7:1-17 LGCB2014 - Bible AI

¹Bino Mukama Katonda bye yandaga. Yali ateekateeka ebibinja byʼenzige okusaanyaawo ebirime ebyalimwanga, nga baakakungula olukungula olusooka ssinziggu, kabaka kwʼafuna omusolo.

²Enzige bwe zaalya buli kantu akaali mu nnimiro akalamu, nʼenkaaba nti, “Mukama Katonda, sonyiwa abantu bo nkwegayiridde. Yakobo aliwona atya? Nga mutono nnyo.”

³Mukama bwe yawulira okukaaba kuno nʼakyusa ekirowoozo kye, nʼagamba nti, “Ekyo tekiribaawo.”

⁴Bino Mukama bye yayongera okundaga. Yali ategeka okubonereza abantu nʼomuliro. Gwalya ennyanja eyali wansi wʼensi ne gumalawo nʼolukalu.

⁵Ne nkaaba nti, “Ayi Mukama Katonda nkwegayiridde osonyiwe abantu bo! Yakobo anaasobola atya okusigalawo? Nga mutono nnyo!”

⁶Awo Mukama bwe yawulira okukaaba kuno, nʼakyusa ekirowoozo kye era nʼagamba nti, “Era nʼekyo tekijja kubeerawo.”

⁷Ate Mukama nʼandaga okwolesebwa okulala. Ne ndaba Mukama ngʼayimiridde ku bbugwe azimbiddwa obulungi nga yatereera era nga Mukama akutte bbirigi mu mukono gwe.

⁸Mukama nʼambuuza nti, Amosi, kiki kyʼolaba? Ne nziramu nti, “Ndaba bbirigi.” Mukama nʼalyoka aŋŋamba nti, “Laba nteese bbirigi wakati mu bantu bange Isirayiri. Sijja kuddayo kukyusa kirowoozo kyange nate ku kyʼokubabonereza.

⁹Ebifo ebigulumivu ebya Isaaka birizikirizibwa, nʼebifo bya Isirayiri ebitukuvu birifuuka matongo. Nʼennyumba ya Yerobowaamu ndigirwanyisa nʼekitala.”

¹⁰Awo Amaziya kabona wʼe Beseri nʼaweereza kabaka wa Isirayiri, Yerobowaamu, obubaka ngʼagamba nti, “Amosi agezaako okukulyamu olukwe wakati mu Isirayiri mwennyini. Ensi teyinza kugumira bigambo bye.”

¹¹Bwʼati Amosi bwʼayogera nti,

¹¹“ ‘Yerobowaamu alifa kitala, ne Isirayiri balitwalibwa mu buwaŋŋanguse bave mu nsi yaboobwe.’ ”

¹²Awo Amaziya nʼalyoka alagira Amosi nti, “Vva wano ggwe omulabi[1]. Ddayo mu nsi ya Yuda gyʼoba oweera obunnabbi, ofunire eyo omusaala gwo.

¹³Toweera wano bunnabbi nate e Beseri kubanga luno lubiri lwa kabaka era ssinzizo lya bwakabaka.”

¹⁴Amosi nʼamuddamu nti, “Saali nnabbi oba omwana wa nnabbi nnali mulunzi wa ndiga era nga ndabirira miti emisukamooli.

¹⁵Naye Mukama yanziggya eyo mu kulunda ekisibo nʼaŋŋamba nti, ‘Genda owe obunnabbi abantu bange, Isirayiri.’ ”

¹⁶Noolwekyo ggwe wuliriza ekigambo kya Mukama. Ogamba nti,

¹⁶“ ‘Towa bunnabbi bunenya Isirayiri, era lekaraawo okubuulira ebikwata ku nnyumba ya Isaaka.’ ”

¹⁷“Mukama kyava akuddamu nti, ‘Mukazi wo alifuuka malaaya mu kibuga era nʼabaana bo aboobulenzi nʼaboobuwala balifa ekitala. Ettaka lyo lirigabanyizibwamu ne liweebwa abalala naawe kennyini olifiira mu nsi eyʼabakafiiri. Ekituufu kiri nti abantu ba Isirayiri balitwalibwa mu buwaŋŋanguse, ne baggyibwa mu nsi yaboobwe.’ ”