Danyeri 10:1-21 LGCB2014 - Bible AI

¹Mu mwaka ogwokusatu ogwʼobufuzi bwa Kuulo kabaka wʼe Buperusi, Danyeri eyayitibwanga Berutesazza nʼafuna okwolesebwa okulala. Ekigambo kye yafuna kyali kyamazima nga kyogera ku lutalo olwʼamaanyi. Nʼategeera obubaka obwamuweebwa mu kwolesebwa okwo.

²Mu biro ebyo, nze Danyeri ne mmala wiiki ssatu nga nkungubaga.

³Saalya ku mmere ennungi, newaakubadde ennyama wadde okunywa ku wayini; era ne nsiwuukira ddala okumala wiiki ssatu.

⁴Ku lunaku olwʼamakumi abiri mu ennya olwʼomwezi ogwʼolubereberye nga nyimiridde ku mabbali gʼomugga omunene Tigiriisi,

⁵ne nnyimusa amaaso gange, ne ntunula waggulu, ne ndaba omusajja ayambadde linena, nga yeesibye olukoba olwa zaabu ennongooseemu mu kiwato.

⁶Omubiri gwe gwali gumasamasa ngʼejjinja erya berulo, nʼekyenyi kye nga kiri ngʼokumyansa okwʼeggulu, nʼamaaso ge nga gali ngʼettabaaza ezʼomuliro, nʼemikono gye nʼamagulu ge nga biri ngʼebbala lyʼekikomo ekizigule, nʼeddoboozi lye ngʼoluyoogaano olwʼekibiina ekinene.

⁷Nze Danyeri nzekka, nze nalaba okwolesebwa okwo, abasajja be nnali nabo tebaakulaba, wabula bajjula entiisa, ne badduka ne beekweka.

⁸Ne nsigala nzekka, nga neewuunya okwolesebwa okunene okwo; ne nzigwamu amaanyi; amaaso gange ne gayongobera, ne mba, nga seesobola.

⁹Awo ne mpulira ngʼayogera, era bwe nnali nga nkyamuwuliriza, ne neebaka otulo tungi nnyo, amaaso gange nga gatunudde wansi ku ttaka.

¹⁰Ne wabaawo omukono ogunkwatako, emikono gyange nʼamaviivi gange ne bitanula okujugumira.

¹¹Nʼaŋŋamba nti, “Danyeri, ggwe omusajja omwagalwa ennyo, tegeera era osseeyo omwoyo ku bigambo bye njogera naawe, era yimuka oyimirire kubanga ntumiddwa gyʼoli.” Awo bwe yayogera ebigambo ebyo gye ndi ne nnyimirira nga nkankana.

¹²Nʼalyoka aŋŋamba nti, “Totya Danyeri, kubanga okuva ku lunaku olwasooka lwe wamalirira okutegeera ne weetoowaza mu maaso ga Katonda wo, ebigambo byo byawulirwa, era nzize olwʼebigambo byo.

¹³Namala ennaku amakumi abiri mu lumu nga nkyalwana nʼomulangira wʼe Buperusi, naye Mikayiri omu ku balangira abakulu nʼajja nʼannyamba, kubanga kabaka wʼe Buperusi yali ankwatidde eyo.

¹⁴Kaakano nzize okukunnyonnyola ebigenda okutuuka ku bantu bo mu biro ebyʼomu maaso; kubanga bye wayolesebwa byogera ku biro ebigenda okujja.”

¹⁵Awo bwe yali ngʼakyambuulira ebyo, ne nkutama, ne ntunuza amaaso gange wansi, ne nsirika.

¹⁶Awo ne wajja eyafaanana ngʼomuntu nʼakoma ku mimwa gyange, ne ntanula okwogera. Ne ŋŋamba eyali annyimiridde mu maaso nti, “Mukama wange nzijjudde obuyinike, era nʼamaanyi sirina olwʼebyo bye njolesebbwa.

¹⁷Nnyinza ntya nze omuddu wo okwogera naawe ggwe mukama wange? Amaanyi gampweddemu, sikyayinza na kussa bulungi mukka.”

¹⁸Nate eyafaanana ngʼomuntu nʼankomako nʼanzizaamu amaanyi.

¹⁹Nʼaŋŋamba nti, “Ggwe omwagalwa ennyo, totya. Emirembe gibeere gyʼoli, guma omwoyo era beera nʼobuvumu.”

¹⁹Awo bwe yayogera nange, ne nziramu amaanyi, ne njogera nti, “Yogera mukama wange, kubanga onzizizzaamu amaanyi.”

²⁰Nʼalyoka ayogera nti, “Ekindeese gyʼoli okimanyi? Mu bbanga eritali lyʼewala, nzija kuddayo okulwanyisa omulangira owʼe Buperusi, era bwe ndimuwangula, omulangira owʼe Buyonaani alijja.

²¹Naye okusooka byonna, ka nkutegeeze ebyawandiikibwa ebiri mu kitabo ekya mazima: Tewali nʼomu ambeera okuggyako Mikayiri, omulangira wammwe abakuuma.