Danyeri 4:1-37 LGCB2014 - Bible AI

¹Kabaka Nebukadduneeza nʼalangirira eri abantu, nʼamawanga nʼabantu abʼennimi eza buli ngeri, mu nsi yonna bwʼati nti: Emirembe gibeere nammwe!

²Lye ssanyu lyange okubategeeza ku bigambo ebyʼamagero era ebikulu Katonda Ali Waggulu Ennyo byankoledde.

³Obubonero bwe nga bukulu, nʼebyʼamagero bye nga byewuunyisa! Obwakabaka bwe bwa mirembe na mirembe; Nʼokufuga kwe tekuliggwaawo.

⁴Nze Nebukadduneeza, nnali mpumulidde mu maka gange wakati mu bugagga nga mpumuliddeko mu lubiri lwange.

⁵Ne ndoota ekirooto ekyantiisa; bwe nnali nga ngalamidde ku kitanda kyange, ne ndaba ebifaananyi mu kwolesebwa, ebyantiisa.

⁶Kyennava ndagira abasajja bonna abagezigezi abʼe Babulooni baleetebwe mu maaso gange bantegeeze amakulu gʼekirooto.

⁷Abalogo, nʼabafumu, nʼAbakaludaaya, nʼabalaguzi ne bajja, ne mbategeeza ekirooto, naye ne balemwa okuntegeeza amakulu gaakyo.

⁸Naye oluvannyuma Danyeri gwe natuuma Berutesazza ngʼerinnya lya katonda wange bwe liri, era nga nʼomwoyo ogwa bakatonda abatukuvu guli mu ye, nʼajja mu maaso gange ne mutegeeza ekirooto.

⁹Ne mugamba nti, “Berutesazza, omukulu wʼabafumu, mmanyi ngʼomwoyo ogwa bakatonda abatukuvu guli mu gwe, so tewali kigambo ekyʼekyama ekikuzibuwalira. Ntegeeza ekirooto kyange, nʼamakulu gaakyo.

¹⁰Kuno kwe kwolesebwa kwe nafunye nga ngalamidde ku kitanda kyange; nalabye omuti wakati mu nsi, nga muwanvu nnyo nnyini.

¹¹Omuti ne gukula ne guba gwʼamaanyi, nʼentikko yaagwo nʼetuuka ku ggulu era nga gulengerwa okuva ku nkomerero yʼensi zonna.

¹²Ebikoola byagwo byali birungi okutunulako, nʼebibala byagwo nga bingi, era nga gulina emmere emala bonna. Ensolo enkambwe ezʼomu nsiko zaatuulanga mu kisiikirize kyagwo, nʼennyonyi ezʼomu bbanga zaatuulanga ku matabi gaagwo, na buli kiramu kyonna kyalisibwanga.”

¹³“Awo mu kiseera ekyo nga ngalamidde ku kitanda kyange, mu kwolesebwa, ne ndaba omubaka omutukuvu ngʼava mu ggulu.

¹⁴Nʼayogerera mu ddoboozi eryʼomwanguka nti, ‘Tema omuti, otemeko nʼamatabi gaagwo; okunkumule amalagala gaagwo, osaasaanye nʼebibala byagwo, nʼennyonyi zibuuke zive ku matabi gaagwo.

¹⁵Naye ekikonge kyʼekikolo kyagwo kireke mu ttaka, nga kiriko ekyuma ekisiba nʼekikomo, mu muddo omuto ku ttale.’ ”

¹⁵“ ‘Muleke abisiwale nʼomusulo ogwʼomu ggulu, era muleke agabanire wamu omuddo, nʼensolo ezʼomu nsiko.

¹⁶Era nʼamagezi ge agʼobuntu gakyusibwe, afuuke ngʼensolo enkambwe eyʼomu nsiko okumala emyaka musanvu.’ ”

¹⁷“ ‘Omusango ogwo gulangiriddwa ababaka, abatukuvu be baasanguza ekisaliddwawo, abalamu balyoke bategeere ngʼOyo Ali Waggulu Ennyo yʼafuga obwakabaka bwʼabantu, era abuwa buli gwʼasiima, era alonda abantu abasemberayo ddala okuba aba wansi okubafuga.’ ”

¹⁸“Ekyo kye kirooto, nze Kabaka Nebukadduneeza kye naloose. Kaakano ggwe Berutesazza, ntegeeza amakulu gaakyo kubanga tewali nʼomu ku basajja abagezigezi mu bwakabaka bwange ayinza okuntegeeza amakulu gaakyo. Naye ggwe oyinza, kubanga omwoyo ogwa bakatonda abatukuvu guli mu ggwe.”

¹⁹Awo Danyeri eyayitibwanga Berutesazza nʼatawanyizibwa mu mutima okumala akabanga, ne yeeraliikirira. Kabaka nʼamugamba nti, “Berutesazza, ekirooto nʼamakulu gaakyo bireme okukweraliikiriza.” Berutesazza nʼaddamu nti, “Mukama wange, ekirooto kibe nga kyogera ku abo abakukyawa, nʼamakulu gaakyo gabe nga googera ku balabe bo!

²⁰Omuti gwe walaba, ogwakula ne guba gwʼamaanyi, ogwawanvuwa ne gutuuka ku ggulu, nga gulabibwa ensi yonna,

²¹ogwaliko amalagala amalungi nʼebibala byagwo nga bingi nnyo, era nga guliko nʼemmere emala bonna, nga nʼensolo ezʼomu nsiko zituula mu kisiikirize kyagwo, nga nʼennyonyi ezʼomu bbanga zisiisira ku matabi gaagwo,

²²ye ggwe, ayi kabaka! Okuze nʼoba mukulu era nʼoba wʼamaanyi; nʼobukulu bwo bweyongedde ne butuuka ku ggulu, nʼobuyinza bwo butuuse ku nkomerero yʼensi.”

²³“Ggwe ayi kabaka walabye omubaka, era omutukuvu ngʼakka okuva mu ggulu, nʼayogera nti, ‘Tema omuti oguzikirize, naye ekikonge kyʼekikolo kyagwo kireke mu ttaka ngʼokisibye nʼekyuma nʼekikomo mu muddo omuto ogwʼoku ttale; era muleke abisiwazibwe omusulo ogwʼomu ggulu, nʼomugabo gwe gubeere nʼensolo enkambwe ezʼomu nsiko, emyaka musanvu.’ ”

²⁴“Gano ge makulu, ayi kabaka, era lino lye tteeka Oyo Ali Waggulu Ennyo lyʼalangiriridde mukama wange kabaka.

²⁵Oligobebwa okuva mu bantu era olibeera nʼensolo ezʼomu nsiko; olirya omuddo ngʼente, era olibisiwala okumala emyaka musanvu okutuusa lwʼolitegeera ngʼOyo Ali Waggulu Ennyo yʼafuga obwakabaka bwʼabantu, era abugabira buli gwʼasiima.

²⁶Ekiragiro ekyʼokuleka ekikonge kyʼekikolo kyʼomuti, amakulu gaakyo ge gano: obwakabaka bwo bulikuddizibwa bwʼolitegeera ngʼeggulu lye lifuga.

²⁷Noolwekyo, ayi kabaka nteesa nti; weetoowaze olekeyo ebibi byo okole ebyʼobutuukirivu, era nʼebikolwa byo ebitali bya butuukirivu obireke obeere wa kisa eri abanyigirizibwa, olyoke ofuuke mugagga okusinga nga bwʼoli kaakano.”

²⁸Ebyo byonna byatuukirira ku Kabaka Nebukadduneeza.

²⁹Bwe wayitawo emyezi kkumi nʼebiri, kabaka yali atambulira ku kasolya kʼolubiri lwe olwa Babulooni,

³⁰nʼayogera nti, “Ono si ye Babulooni omukulu gwe nazimba nʼamaanyi gange amangi okuba ekibuga ekikulu ekyʼekitiibwa ekyʼobwakabaka bwange?”

³¹Awo bwe yali ngʼakyayogera, eddoboozi ne liva mu ggulu nga ligamba nti, “Kuno kwe kulangirira okukukwatako Kabaka Nebukadduneeza: obwakabaka bwo bukuggyiddwako.

³²Oligobebwa mu bantu era olibeera nʼensolo okumala emyaka musanvu okutuusa lwʼolitegeera ngʼOyo Aliwaggulu ennyo yʼafuga obwakabaka obwʼabantu era abuwa buli gwʼasiima.”

³³Amangwago ebyayogerwa ku Nebukadduneeza ne bituukirira. Nʼagobebwa mu bantu era nʼalya omuddo ngʼente. Omubiri gwe ne gutoba omusulo ogwʼomu ggulu okutuusa enviiri ze lwe zaakula ngʼebyoya byʼempungu nʼenjala ze ngʼenjala zʼennyonyi.

³⁴Oluvannyuma lwʼebbanga eryo, nze, Nebukadduneeza, ne nnyimusa amaaso gange eri eggulu, amagezi gange ne gakomawo. Ne ntendereza Oyo Ali Waggulu Ennyo, ne muwa ekitiibwa ne mugulumiza oyo abeera omulamu emirembe nʼemirembe. Okufuga kwe tekuliggwaawo, nʼobwakabaka bwe bwa mirembe na mirembe.

³⁵Abantu bonna abʼoku nsi abalaba nga si kintu, eggye eryʼomu ggulu nʼabantu abʼoku nsi abayisa nga bwʼasiima. Tewali ayinza okumuziyiza, newaakubadde okumubuuza nti, “Okola ki?”

³⁶Mu kiseera kyekimu okutegeera kwange ne kukomawo, nʼekitiibwa nʼobuyinza obwʼobwakabaka bwange ne bunzirira. Abawi bʼamagezi bange nʼabakungu bange ne bannoonya, ne banziriza entebe yange eyʼobwakabaka ne nnyongerwako obukulu bungi okusinga ne bwe nalina.

³⁷Kale nze Nebukadduneeza kyennaava mmutendereza era ne mmuwa ekitiibwa ne mmugulumiza Kabaka owʼeggulu, kubanga emirimu gye gyonna gya mazima nʼamakubo ge ga nsonga, nʼabo abʼamalala abakkakkanya.