Ebikolwa by'Abatume 1:1-26 LGCB2014 - Bible AI

¹Mu kitabo ekyasooka, munnange Teefiro, nakutegeeza ebintu byonna okuva Yesu lwe yatandika okukola emirimu gye nʼokuyigiriza,

²okutuusa ku lunaku lwe yatwalibwa mu ggulu ngʼamaze okuwa abatume be, be yalonda, ebiragiro ku bwa Mwoyo Mutukuvu.

³Mu nnaku amakumi ana ezaddirira, Yesu yalabikira abatume nga mulamu era nʼabakakasa mu ngeri nnyingi, era buli lwe yabalabikiranga ngʼayogera nabo ku bigambo byʼobwakabaka bwa Katonda.

⁴Awo bwe yali ngʼalya nabo ekijjulo nʼabalagira baleme kuva mu Yerusaalemi naye balindirire ekisuubizo kya Kitaawe. Yagamba nti, “Ekyo kye mwawulira nga mbagamba nti,

⁵‘Yokaana yabatiza na mazzi, naye mmwe mujja kubatizibwa na Mwoyo Mutukuvu mu nnaku si nnyingi.’ ”

⁶Awo bwe baali bakuŋŋaanye ne bamubuuza nti, “Mukama waffe, mu kiseera kino mwʼonooddizaawo obwakabaka bwa Isirayiri?”

⁷Naye Yesu nʼabaddamu nti, “Okumanya entuuko oba ebiro si kyammwe, kitange kye yateekateeka mu buyinza bwe.

⁸Naye muliweebwa amaanyi, Mwoyo Mutukuvu bwʼalimala okubakkako, era munaabanga bajulirwa bange mu Yerusaalemi, ne mu Buyudaaya yonna, ne mu Samaliya okutuukira ddala ku nkomerero zʼensi.”

⁹Bwe yamala okwogera ebigambo ebyo, ekire ne kimutwala waggulu nga balaba.

¹⁰Awo bwe baali nga batunula enkaliriza mu ggulu ngʼagenda, amangwago abasajja babiri nga bambadde engoye enjeru ne balabika,

¹¹ne boogera nti, “Abasajja Abagaliraaya, lwaki muyimiridde wano nga mutunula waggulu mu ggulu? Yesu oyo abaggiddwako nʼatwalibwa mu ggulu, agenda kukomawo mu ngeri yʼemu nga bwe mumulabye ngʼagenda mu ggulu.”

¹²Ne bakomawo e Yerusaalemi okuva ku lusozi oluyitibwa olwa Zeyituuni, oluli okumpi ne Yerusaalemi, ngʼolugendo olutambulwa ku Ssabbiiti.

¹³Ne balaga mu kisenge ekya waggulu mu nnyumba mwe baali basula, era be bano: Peetero, ne Yokaana ne Yakobo, ne Andereya, ne Firipo ne Tomasi, ne Battolomaayo, ne Matayo, ne Yakobo, omwana wa Alufaayo, ne Simooni eyayitibwanga “Omuzerote[1]”, ne Yuda, omwana wa Yakobo,

¹⁴Abo bonna ne beeweerayo ddala nʼomutima gumu okusaba wamu nʼabakazi ne Maliyamu nnyina Yesu ne baganda ba Yesu.

¹⁵Awo mu nnaku ezo, Peetero nʼayimirira wakati mu booluganda abaali bakuŋŋaanye nga bawera nga kikumi mu abiri, nʼayogera nti,

¹⁶“Abasajja abooluganda, ebyawandiikibwa ku Yuda eyakulembera ekibiina ekyakwata Yesu byali biteekwa okutuukirira; kubanga ekyo Mwoyo Mutukuvu yali yakitegeeza dda bwe yayogerera mu Dawudi.

¹⁷Yuda yali omu ku ffe, era nʼaweebwa omugabo gwʼobuweereza buno.

¹⁸“Empeera gye yafuna mu butali butuukirivu bwe, yagigulamu ennimiro, era omwo mwe yagwa nʼayabika nʼebyenda bye ne biyiika.

¹⁹Amawulire ago ne gatuuka ku bantu abʼomu Yerusaalemi, era ennimiro eyo ne bagituuma Akerudama mu lulimi lwabwe, amakulu nti, ‘Ennimiro yʼOmusaayi!’

²⁰ⓐ ⓑ Kubanga kyawandiikibwa mu Zabbuli nti,

²⁰‘Ekibanja kye kizike, so kireme okubeerangamu omuntu, nʼobuvunaanyizibwa bwe buweebwe omulala.’

²¹“Noolwekyo kigwanye okulonda omuntu mu bantu abaayitanga naffe mu biro byonna, eyayingiranga nʼafuluma wamu naffe nga tuli ne Mukama waffe Yesu,

²²okuviira ddala ku kubatiza kwa Yokaana okutuusa lwe yatwalibwa mu ggulu, alyoke abeere omujulirwa owʼokuzuukira kwe awamu naffe.”

²³Awo ne balonda abasajja babiri, omu nga ye Yusufu (eyayitibwanga Balusaba ate era nga ye Yusito), nʼowokubiri nga ye Matiya.

²⁴Ne balyoka basaba ne bagamba nti, “Ayi Mukama, gwʼomanyi emitima gyʼabantu bonna, tulage gwʼolonze ku bantu bano ababiri,

²⁵okubeera mu baweereza buno nʼokubeera omutume mu kifo kya Yuda eyatwawukanako nʼalaga mu kifo kye ekimusaanira.”

²⁶Awo ne bakuba akalulu, ne kagwa ku Matiya, nʼagattibwa ku batume ekkumi nʼomu.