Ebikolwa by'Abatume 13:1-52 LGCB2014 - Bible AI

¹Mu Kkanisa yʼomu Antiyokiya mwalimu bannabbi nʼabayigiriza bano: Balunabba, ne Simooni, eyayitibwanga, “Omuddugavu” ne Lukiyo owʼe Kuleene, ne Manaeni, eyakulira awamu ne kabaka Kerode, ne Sawulo.

²Awo bwe baali nga basinza Mukama era nga bwe basiiba, Mwoyo Mutukuvu nʼagamba nti, “Munjawulire Balunabba ne Sawulo olwʼomulimu gwe mbayitidde.”

³Awo bwe baamala okusaba nʼokusiiba, ne bassa emikono gyabwe ku Balunabba ne Sawulo, ne babasiibula ne bagenda.

⁴Awo Balunabba ne Sawulo ne batumibwa Mwoyo Mutukuvu okugenda e Serukiya, gye baava ne bawunguka okulaga e Kupulo.

⁵Bwe baatuuka mu Salamisi ne bayingira mu makuŋŋaaniro gʼAbayudaaya ne babuulira ekigambo kya Katonda. Yokaana Makko yali nabo okubaweereza.

⁶Ne bagenda nga babuulira ku kizinga kyonna okutuuka e Pafo. Eyo ne basangayo omufumu Omuyudaaya eyali nnabbi owʼobulimba, erinnya lye Balisa.

⁷Yayitanga ne Serugiyo Pawulo, gavana Omuruumi owʼoku kizinga ekyo. Gavana ono yali musajja wʼamagezi, nʼatumya Balunabba ne Sawulo ngʼayagala okuwulira ekigambo kya Katonda.

⁸Naye Eruma omufumu (kubanga ago ge makulu gʼerinnya lye mu Luyonaani), nʼabeekiikamu, nʼagezaako okusendasenda gavana aleme okuwuliriza ebigambo ebyʼokukkiriza.

⁹Naye Sawulo, era ngʼayitibwa Pawulo, nʼajjuzibwa Mwoyo Mutukuvu, nʼatunuulira Eruma enkaliriza,

¹⁰nʼamugamba nti, “Ggwe, omusajja ajudde obulimba bwonna nʼobukuusa bwonna, omwana wa Setaani, era omulabe wʼobutuukirivu bwonna olikomya ddi okukyusakyusa amakubo ga Katonda amatereevu?

¹¹Kaakano omukono gwa Mukama gukwolekedde, ojja kuziba amaaso, omale ebbanga nga tolaba musana.”

¹¹Amangwago olufu nʼekizikiza ne bimusaanikira, nʼatandika okuwammanta ngʼanoonya anaamukwata ku mukono.

¹²Awo gavana bwe yalaba ebibaddewo, nʼakkiriza, era nʼawuniikirira nnyo olwʼokuyigiriza kwʼekigambo kya Mukama.

¹³Awo Pawulo ne be yali nabo ne basaabala ku nnyanja okuva e Pafo ne bagoba e Peruga ekyʼe Panfuliya. Naye Yokaana Makko nʼabalekayo nʼaddayo e Yerusaalemi.

¹⁴Kyokka Balunabba ne Pawulo ne beeyongerayo mu lugendo lwabwe ne batuuka mu kibuga Antiyokiya ekiri mu Pisidiya. Awo ku lunaku lwa Ssabbiiti ne bagenda ne batuula mu kkuŋŋaaniro.

¹⁵Ebitundu ebyaggyibwa mu Mateeka ne mu Bannabbi bwe byaggwa okusomebwa, abakulembeze bʼekuŋŋaaniro ne batumira Balunabba ne Pawulo we baali batudde nga bagamba nti, “Abasajja abooluganda, obanga ku mmwe waliwo alina ekigambo ekizimba abantu akyogere.”

¹⁶Awo Pawulo nʼayimuka, nʼabawenya nʼayogera nti, “Abasajja Abayisirayiri, nammwe abatya Katonda, muwulirize!

¹⁷Katonda wʼeggwanga lino Isirayiri yalonda bajjajjaffe nʼabafuula eggwanga ekkulu bwe baali abagenyi mu nsi yʼEmisiri nʼoluvannyuma nʼabaggyayo nʼomukono gwe ogwʼamaanyi,

¹⁸nʼabagumiikiriza okumala emyaka amakumi ana nga bali mu ddungu.

¹⁹Nʼazikiriza amawanga musanvu agaabeeranga mu nsi ya Kanani, era ensi eyo nʼagiwa Abayisirayiri okubeera omugabo gwabwe,

²⁰okumala emyaka ngʼebikumi bina mu ataano.

²⁰“Oluvannyuma nʼabalondera abalamuzi okubafuganga okutuusa mu biro bya nnabbi Samwiri.

²¹Awo abantu ne basaba bafugibwe kabaka. Katonda nʼabawa Sawulo mutabani wa Kiisi, owʼomu kika kya Benyamini, nʼafugira emyaka amakumi ana.

²²ⓓ Naye Katonda nʼamuggya ku bwakabaka, nʼabuwa Dawudi, oyo Katonda gwe yayogerako obulungi nti, ‘Nnonze Dawudi, mutabani wa Yese, omusajja omutima gwange gwe gwagala ajja okukola bye njagala.’

²³“Mu zzadde lye, Katonda mwe yalonda Omulokozi, ye Yesu, nga bwe yasuubiza Isirayiri.

²⁴Naye nga tannajja, Yokaana yabuulira abantu bonna mu Isirayiri okubatizibwa okwʼokwenenya.

²⁵Era Yokaana bwe yali ngʼali kumpi okufundikira omulimu gwe, yagamba nti, ‘Mundowooza kuba ani? Nze siri ye. Laba Ye ajja oluvannyuma lwange, nʼokusaanira sisaanira na kusumulula ngatto ze.’

²⁶“Abasajja abooluganda mmwe bazzukulu ba lbulayimu, nammwe abatya Katonda, obubaka buno obwʼobulokozi, bwaffe ffenna wamu.

²⁷Ababeera mu Yerusaalemi nʼabakulembeze baabwe ne batamumanya oyo newaakubadde ebigambo bya bannabbi, ebyasomebwanga buli Ssabbiiti. Baamusalira omusango, ne batuukiriza ebigambo bino.

²⁸Tebaalina nsonga emussa, naye era ne basaba Piraato amutte.

²⁹Bwe baamala okutuukiriza byonna ebyamuwandiikwako, nʼawanulwayo ku musaalaba nʼagalamizibwa mu ntaana.

³⁰Naye Katonda nʼamuzuukiza mu bafu.

³¹Era abo be yajja nabo e Yerusaalemi ngʼava e Ggaliraaya nʼabalabikiranga okumala ennaku nnyingi. Era be bajulirwa be eri abantu.

³²“Ne kaakano tubategeeza nti, Katonda kye yasuubiza bajjajjaffe

³³ⓔ yakituukiriza mu ffe ne mu baana baffe, bwe yazuukiza Yesu mu bafu. Nga bwe kyawandiikibwa mu Zabbuli eyookubiri nti,

³³‘Mwana wange, leero nfuuse Kitaawo.’

³⁴ⓕ Kubanga Katonda yasuubiza okumuzuukiza abeere mulamu nate, era nga takyaddayo kuvunda. Ekyawandiikibwa nga bwe kyogera nti: ‘Ndikuwa emikisa egyʼolubeerera era emitukuvu gye nasuubiza Dawudi.’

³⁵Ne mu kyawandiikibwa ekirala agamba nti, ‘Toliganya Mutukuvu wo kuvunda.’

³⁶“Kino kyali tekyogera ku Dawudi, kubanga Dawudi bwe yamala okuweereza omulembe gwe nga Katonda bwe yayagala, nʼafa, nʼaziikibwa, era omubiri gwe ne guvunda.

³⁷Noolwekyo, oyo Katonda gwe yazuukiza teyavunda.

³⁸“Abooluganda, mumpulirize! Mu muntu ono Yesu okusonyiyibwa ebibi mwe kubuuliddwa. Kino nga tekiyinzika mu mateeka ga Musa.

³⁹Buli amukkiriza nʼamwesiga aggyibwako omusango gwʼekibi, nʼaweebwa obutuukirivu.

⁴⁰Mwegendereze, ebigambo bya bannabbi bireme kutuukirira ku mmwe, bwe baagamba nti:

⁴¹ⓖ ‘Mulabe, mmwe abanyoomi, musamaalirire era muzikirire! Kubanga nnina omulimu gwe nkola mu kiseera, gwe mutagenda kukkiriza newaakubadde omuntu ne bwʼaligubannyonnyola atya temuligukkiriza.’ ”

⁴²Awo Pawulo ne Balunabba bwe baali bafuluma mu kkuŋŋaaniro, abantu ne babasaba bakomewo ku Ssabbiiti eddirira bongere okubabuulira ku bigambo ebyo.

⁴³Abayudaaya bangi awamu nʼabatya Katonda abaaliwo mu kusinza okwo mu kkuŋŋaaniro, ne babagoberera. Pawulo ne Balunabba ne banyumya nabo nga bwe batambula mu kkubo, nga babasendasenda banywerere mu kukkiriza ne mu kisa kya Katonda.

⁴⁴Ku Ssabbiiti eyaddirira kumpi buli muntu eyali mu kibuga nʼajja okuwulira ekigambo kya Katonda.

⁴⁵Naye Abayudaaya bwe baalaba ebibiina ebinene nga bizze, ne bakwatibwa obuggya, ne batandika okuwakanya nʼokujolonga byonna Pawulo bye yayogeranga.

⁴⁶Awo Pawulo ne Balunabba ne babaanukula nʼobuvumu bungi ne babagamba nti, “Kyali kituufu Ekigambo kya Katonda kino okusooka okubuulirwa mmwe Abayudaaya. Naye nga bwe mukigaanyi, ne mweraga nti Obulamu obutaggwaawo temubusaanira; kale kaakano ka tukibuulire Abaamawanga.

⁴⁷ⓗ Kubanga bwʼatyo Mukama bwe yatulagira bwe yagamba nti,

⁴⁷‘Mbafudde omusana okwakira Abaamawanga, olwʼobulokozi okutuuka ku nkomerero yʼensi.’ ”

⁴⁸Abaamawanga bwe baawulira ebyo ne bajjula essanyu; era bangi ne bakkiriza, abo Katonda be yalonda okuwa obulamu obutaggwaawo.

⁴⁹Awo ekigambo kya Katonda ne kibuna mu kitundu ekyo kyonna.

⁵⁰Naye Abayudaaya ne bafukuutirira abakazi abaasinzanga Katonda abʼebitiibwa, nʼabakulembeze mu kibuga, ne batandika akeegugungo mu kibiina kyʼabantu nga koolekedde Pawulo ne Balunabba, okutuusa lwe baabagoba mu kitundu kyabwe.

⁵¹Abatume ne babakunkumulira enfuufu eyʼomu bigere byabwe, ne babaviira ne balaga mu Ikoniya.

⁵²Abayigirizwa ne bajjula essanyu ne Mwoyo Mutukuvu.