Ebikolwa by'Abatume 2:1-47 LGCB2014 - Bible AI

¹Awo olunaku lwa Pentekoote bwe lwatuuka bonna baali bakuŋŋaanidde mu kisenge kimu.

²Amangwago okuwuuma, nga kuli ngʼempewo eyʼamaanyi ennyo ekunta, ne kuva mu ggulu, ne kujjula mu nnyumba yonna mwe baali batudde.

³Ku buli omu ne kutuulako ennimi ngʼezʼomuliro.

⁴Bonna ne bajjuzibwa Mwoyo Mutukuvu, ne batandika okwogera ennimi ezʼenjawulo nga Mwoyo Mutukuvu bwe yabasobozesa.

⁵Waaliwo Abayudaaya bangi abatya Katonda abaali bazze mu Yerusaalemi nga bavudde mu buli ggwanga wansi wʼeggulu.

⁶Bwe baawulira okuwuuma okwo, ekibiina kinene ne kikuŋŋaana, ne beewuunya okuwulira nga buli muntu awulira olulimi lwʼewaabwe.

⁷Ne bawuniikirira ne beewuunya ne bagamba nti, “Bano bonna aboogera si Bagaliraaya?

⁸Kale lwaki tuwulira buli muntu olulimi lwʼewaffe gye twazaalibwa?

⁹Tubawulira nga boogera ebyʼamagero bya Katonda mu nnimi ezʼAbapaazi, nʼAbameedi, nʼAbeeramiti, nʼezʼabalala abava e Mesopotamiya, ne Buyudaaya, ne Kapadokiya, mu Ponto ne mu Asiya,

¹⁰ⓒ ne mu Fulugiya ne mu Panfuliya, nʼabamu abava mu Misiri, nʼensi za Libiya okuliraana Kuleene, nʼabagenyi Abaruumi,

¹¹Abayudaaya, nʼabakyuka ne basoma Ekiyudaaya, nʼAbakuleete nʼAbawalabu.”

¹²Bonna ne beewuunya nga bawuniikiridde, ne bagambagana nti, “Kino kitegeeza ki?”

¹³Naye abalala ne baseka busesi nga bagamba nti, “Banywedde mwenge musu!”

¹⁴Awo Peetero nʼasituka nʼabatume ekkumi nʼomu, nʼasitula ku ddoboozi nʼayogera eri ekibiina, nʼabagamba nti, “Abasajja Abayudaaya, nammwe mwenna ababeera mu Yerusaalemi, mutegeere bino era mumpulirize.

¹⁵Abantu bano tebatamidde nga bwe mulowooza, kubanga essaawa ziri ssatu ezʼenkya!

¹⁶Naye kino kye kyayogerwako nnabbi Yoweeri nti,

¹⁷‘Olulituuka mu nnaku ezʼoluvannyuma, bwʼayogera Katonda, ndifuka Omwoyo wange ku balina omubiri bonna. Batabani bammwe ne bawala bammwe baliwa obunnabbi; nʼabavubuka bammwe balyolesebwa, nʼabakadde baliroota ebirooto.

¹⁸Mu biro ebyo ndifuka Omwoyo wange, ku baweereza bange abasajja nʼabakazi; baliwa obunnabbi.

¹⁹Era ndikola ebyamagero mu ggulu waggulu, nʼobubonero ku nsi wansi, omusaayi nʼomuliro nʼekikoomi ekyʼomukka.

²⁰Enjuba erifuuka ekizikiza, nʼomwezi gulimyuka ngʼomusaayi, olunaku lwa Mukama olukulu era olwʼekitiibwa nga terunnatuuka.

²¹ⓓ Na buli muntu alikoowoola erinnya lya Mukama, alirokolebwa.’ ”

²²“Abasajja Abayisirayiri, muwulirize ebigambo bino! Yesu Omunnazaaleesi omuntu Katonda gwe yakakasa gye muli nʼebyamagero ebyʼekitalo, Katonda bye yamukozesanga ngʼali mu mmwe, nga mwenna bwe mumanyi.

²³Naye ngʼenteekateeka ya Katonda bwe yali, omuntu oyo yaweebwayo mu mikono gyʼabantu abatagoberera mateeka, ne mumutta nga mumukomeredde ku musaalaba.

²⁴Kyokka Katonda yamuzuukiza ngʼasaanyizaawo obulumi bwʼokufa, kubanga okufa tekwayinza kumunyweza.

²⁵Kubanga Dawudi amwogerako nti,

²⁵‘Nalaba nga Mukama ali nange bulijjo, kubanga ali ku mukono gwange ogwa ddyo, nneme okusagaasagana.

²⁶Noolwekyo omutima gwange kyeguvudde gusanyuka, nʼolulimi lwange ne lukutendereza. Era nʼomubiri gwange gunaabeeranga mu ssuubi.

²⁷Kubanga tolireka mwoyo gwange kuzikirira so toliwaayo mutukuvu wo.

²⁸ⓔ Wandaga amakubo gʼobulamu, era olinzijuza essanyu nga ndi mu maaso go.’ ”

²⁹“Abasajja abooluganda, nnyinza okwogera nʼobuvumu gye muli ku bifa ku jjajjaffe Dawudi nga yafa nʼaziikibwa, era nʼamalaalo ge weegali ne kaakano.

³⁰Naye Dawudi yali nnabbi, nʼamanya nga Katonda yamulayirira ekirayiro, nti mu bibala ebyʼomu ntumbwe ze mwe muliva alituula ku ntebe eyʼobwakabaka bwe,

³¹bwe yakiraba olubereberye nayogera ku kuzuukira kwa Kristo nga teyalekebwa magombe so nga nʼomubiri gwe tegwavunda.

³²Yesu oyo Katonda yamuzuukiza, era ffe ffenna tuli bajulirwa.

³³Awo bwe yagulumizibwa nʼalaga ku mukono ogwa ddyo ogwa Katonda, nʼaweebwa Mwoyo Mutukuvu eyamusuubizibwa Kitaffe, nʼalyoka atuwa kino nammwe kye mwerabiddeko era kye mwewuliriddeko.

³⁴Kubanga Dawudi teyalinnya mu ggulu, naye agamba nti

³⁴‘Mukama yagamba Mukama wange nti, Tuula ku mukono gwange ogwa ddyo,

³⁵ⓕ okutuusa lwe ndifuula abalabe bo entebe yʼebigere byo.’ ”

³⁶“Noolwekyo ennyumba yonna eya Isirayiri, bamanyire ddala nti oyo Yesu gwe mwakomerera ku musaalaba, Katonda yamufuula Mukama era Kristo!”

³⁷Awo bwe baawuulira ebigambo ebyo, emitima ne gibaluma, ne bagamba Peetero nʼabatume abalala, nti, “Abooluganda, kiki kye tusaanidde okukola?”

³⁸Peetero nʼabagamba nti, “Mwenenye, buli omu ku mmwe abatizibwe mu linnya lya Yesu Kristo musonyiyibwe ebibi byammwe, olwo nammwe mujja kufuna ekirabo ekya Mwoyo Mutukuvu.

³⁹Kubanga ekisuubizo kiri eri mmwe nʼeri abaana bammwe, nʼeri bonna abali mu nsi ezeewala abalikoowoola Mukama Katonda waffe.”

⁴⁰Awo Peetero nʼabategeeza mu bigambo ebirala bingi nʼababuulira ngʼagamba nti Mulokolebwe okuva mu mulembe guno ogwakyama.

⁴¹Awo abo abakkiriza ebigambo bye ne babatizibwa ku lunaku olwo ne beeyongerako ngʼenkumi ssatu.

⁴²Ne banyiikiranga okuyigirizibwa kwʼabatume ne mu kussekimu, ne mu kumenya omugaati era ne mu kusaba.

⁴³Buli muntu nʼajjula okutya era ebyamagero bingi nʼobubonero bungi ne bikolebwanga abatume.

⁴⁴Abakkiriza ne bakuŋŋaananga bulijjo mu kifo kimu, ne baba nga bassa kimu mu byonna.

⁴⁵Ebyʼobugagga byabwe nʼebintu bye baalina ne babitunda ne bagabira buli muntu ngʼokwetaaga kwe bwe kwabanga.

⁴⁶Ne banyiikiranga okukuŋŋaananga mu Yeekaalu buli lunaku, era ne bakuŋŋaananga ne mu maka gaabwe nju ku nju okumenya omugaati, ne baliiranga wamu emmere yaabwe nʼessanyu lingi nʼomutima ogutalina bukuusa,

⁴⁷nga batendereza Katonda, era nga basiimibwa abantu bonna. Mukama nʼabongerangako bulijjo abaalokolebwanga.