Ebikolwa by'Abatume 21:1-40 LGCB2014 - Bible AI

¹Awo bwe twamala okusiibulagana ne tuseeyeeya butereevu okutuuka e Koosi. Olunaku olwaddirira ne tutuuka e Rodise, we twava okulaga e Patala.

²Okuva awo twagendera mu kyombo ekyali kigenda mu Foyiniikiya.

³Ne tulengera ekizinga Kupulo, ne tukiyitako nga tukirese ku mukono gwaffe ogwa kkono, ne tuseeyeeya ne tugoba ku mwalo gwʼe Ttuulo mu Siriya, kubanga ekyombo we kyali kigenda okutikkulirwa ebintu.

⁴Bwe twava mu kyombo ne tunoonya abayigirizwa ne tubeera nabo ennaku musanvu. Mwoyo Mutukuvu nʼayogerera mu bayigirizwa abo ne balabula Pawulo aleme kugenda Yerusaalemi.

⁵Ennaku ezo bwe zaggwaako ne tusitula. Abayigirizwa ne bakyala baabwe nʼabaana baabwe ne batuwerekerako okutuggya mu kibuga okututuusiza ddala ku mwalo. Awo ffenna ne tufukamira ne tusaba.

⁶Bwe twamala okusaba ne tusiibulagana. Ffe ne tuyingira ekyombo kyaffe, ne bannaffe ne baddayo ewaabwe.

⁷Bwe twava e Ttuulo ne tugoba e Potolemaayi, ne tulamusaganya nʼabakkiriza, ne tumala nabo olunaku lumu.

⁸Enkeera ne tweyongerayo okutuuka e Kayisaliya, ne tubeera mu maka ga Firipo Omubuulizi wʼEnjiri, eyali omu ku badiikoni omusanvu abaasooka.

⁹Yalina abaana be abawala abaali batannafumbirwa bana nga balina ekirabo ekyʼobunnabbi.

¹⁰Ne tumalawo ennaku eziwerako, ne wajja nnabbi erinnya lye Agabo ngʼava Buyudaaya.

¹¹Bwe yajja okutulaba, nʼaddira olukoba lwa Pawulo ne yeesiba amagulu nʼemikono, nʼagamba nti, “Mwoyo Mutukuvu ayogera nti, ‘Bwʼati nannyini lukoba luno bwʼalisibwa Abayudaaya mu Yerusaalemi ne bamuwaayo mu mikono gyʼAbamawanga.’ ”

¹²Bwe twawulira ebigambo ebyo ffenna awamu nʼabatuuze bʼomu kitundu ekyo ne twegayirira Pawulo aleme kugenda Yerusaalemi.

¹³Naye Pawulo nʼaddamu nti, “Lwaki mukaaba nʼokwagala okunnafuya omutima? Kubanga seeteeseteese kusibibwa kyokka, naye neetegese nʼokufiira mu Yerusaalemi olwʼerinnya lya Mukama waffe Yesu.”

¹⁴Bwe twalaba nga tekisoboka kumukkirizisa butagenda, ne tubivaako, ne tugamba nti, “Mukama kyʼayagala kye kiba kikolebwa.”

¹⁵Bwe waayitawo ennaku ntono ne tusiba ebintu byaffe, ne tusitula okulaga mu Yerusaalemi.

¹⁶Abamu ku bayigirizwa abʼe Kayisaliya ne batuwerekerako, bwe twatuuka ne tubeera mu maka ga Munasoni, edda eyabeeranga e Kupulo era nga yali omu ku bantu abaasooka okukkiriza.

¹⁷Bwe twatuuka mu Yerusaalemi abooluganda ne batwaniriza nʼessanyu lingi nnyo.

¹⁸Awo enkeera ffenna ne tugenda ne Pawulo ngʼagenda okulaba Yakobo, nʼabakadde bʼEkkanisa yʼomu Yerusaalemi bonna baaliwo.

¹⁹Okulamusaganya bwe kwaggwa, Pawulo nʼabategeeza kinnakimu byonna Katonda bye yamukozesa ngʼaweereza mu baamawanga.

²⁰Bwe baabiwulira byonna ne batendereza Katonda, naye ne bagamba Pawulo nti, “Owooluganda, omanyi ngʼAbayudaaya nkumi na nkumi bakkiriza, era nga bonna bakakatira ku kimu nti Abayudaaya bonna wadde abakkiriza basaana okugoberera amateeka, nʼempisa, nʼobulombolombo, ebyʼEkiyudaaya.

²¹Baategeezebwa nti Oyigiriza Abayudaaya bonna abali mu Bamawanga okuleka amateeka ga Musa baleme okukomola abaana baabwe wadde okugoberera empisa zʼEkiyudaaya.

²²Kale kaakano kiki ekinaakolebwa? Kubanga awatali kubuusabuusa bajja kutegeera nti Ozze.

²³Kale waliwo wano abasajja bana abali ku kirayiro, abateekateeka okumwa emitwe gyabwe nga beerongoosa.

²⁴Genda nabo mu Yeekaalu weerongooseze wamu nabo, era obasasulire ensimbi ezʼokumwa emitwe gyabwe. Kale buli omu ajja kukiraba era abantu bonna bajja kutegeera nti okiriziganya nʼokukuuma amateeka, nʼebyo bye bakwogerako tebiriimu nsa.

²⁵Ku nsonga zʼAbamawanga abakkiriza, twabawandikira nga tubagamba baleme kugoberera bulombolombo bwa Kiyudaaya nʼakatono wabula ebyo bye twassa mu bbaluwa yaffe era bye bino; obutalya nnyama ya bisolo ebiweereddwayo eri bakatonda abalala, nʼobutalya ebitugiddwa oba okulya omusaayi, era nʼokwewala obwenzi.”

²⁶Ku lunaku olwaddirira Pawulo nʼatwala abasajja okwerongoosa, naye ne yeerongoosa nabo. Nʼayingira mu Yeekaalu okutegeera olunaku ekiseera kyʼokwerongoosa ekyʼennaku omusanvu we kiriggweerako, olwo buli omu alyoke atwaleyo ekiweebwayo kye.

²⁷Awo ekiseera ekyʼennaku omusanvu bwe kyali kiri kumpi okuggwaako, ne wabaawo Abayudaaya abaava mu Asiya ne balaba Pawulo mu Yeekaalu, ne basasamaza ekibiina kyonna, ne bakwata Pawulo

²⁸nga bwe baleekaana nti, “Abasajja Abayisirayiri! Mutuyambe! Ono ye musajja agenda ayogera obubi ku ggwanga lyaffe ne ku mateeka gaffe ne ku kifo kino, ngʼayigiriza buli muntu buli wantu. Era ayonoonye Yeekaalu yaffe ngʼagireetamu Abayonaani.”

²⁹Kubanga baamulabako ngʼatambula mu kibuga ne Tulofiimo, eyava mu Efeso, ne balowooza nti Pawulo yamutwala ne mu Yeekaalu.

³⁰Ekibuga kyonna ne kijagalala olwʼokuwulira ebigambo ebyo, era abantu ne bajja nga badduka okuva mu buli nsonda yʼekibuga. Ne bakwata Pawulo ne bamufulumya ebweru wa Yeekaalu, amangwago ne baggalawo enzigi.

³¹Naye bwe baayagala okumutta, amawulire ne gatuuka ku mukulu wʼekitongole kyʼabaserikale Abaruumi nti Yerusaalemi kiguddemu akeegugungo.

³²Amangwago nʼasindika abaserikale nʼabaduumizi baabwe, ne badduka okugenda eri ekibiina kyʼabantu. Awo bwe baalaba omuduumizi nʼabaserikale nga bajja, ne balekeraawo okukuba Pawulo.

³³Awo omukulu wʼabaserikale nʼakwata Pawulo nʼalagira asibibwe mu njegere bbiri, nʼalyoka abuuza nti, “Yʼani, era akoze ki?”

³⁴Ne bamuddamu nga baleekaana, ngʼabamu bamugamba kino nʼabalala nga bagamba kiri. Nʼalemwa okubaako ekiramu kyʼaggyamu olwʼokuleekaana okungi. Kyeyava alagira batwale Pawulo mu nkambi yʼabaserikale.

³⁵Bwe yamutuusa ku madaala, ekibiina kyʼabantu ne bayitirira obukambwe, abaserikale ne basitula Pawulo.

³⁶Ekibiina kyʼabantu abaali bagoberera ne boogera mu ddoboozi eryʼomwanguka nti, “Mumutte!”

³⁷Awo abaserikale bwe baali bagenda okuyingiza Pawulo mu nkambi yaabwe, nʼasaba omukulu waabwe nti, “Onzikiriza mbeeko kye nkugamba?” Nʼamuddamu nti, “Omanyi nʼOluyonaani?

³⁸Ye si ggwe Mumisiri eyajeemesa abantu mu nnaku ezayita, nʼokulembera abatemu enkumi nnya nʼobalaza mu ddungu?”

³⁹Pawulo nʼaddamu nti, “Nedda, nze ndi Muyudaaya, ewaffe Taluso ekiri mu Kirukiya, ekibuga ekitanyoomebwa, era omutuuze. Nkwegayiridde nzikiriza njogere nʼabantu bano.”

⁴⁰ⓙ Awo omuduumizi wʼabaserikale kwe kumukkiriza, Pawulo nʼayimirira ku madaala nʼakoma ku bantu basirike, amangwago ekibiina kyonna ne kisiriikirira, nʼalyoka ayogera nabo mu Lwebbulaniya ngʼabagamba nti,