Ebikolwa by'Abatume 22:1-30 LGCB2014 - Bible AI

¹“Abasajja abooluganda, ne bakadde bange, mumpulirize.”

²Bwe baawulira ngʼayogera Lwebbulaniya ne beeyongera okusirikira ddala.

³Pawulo nʼabagamba nti, “Ndi Muyudaaya, nazaalibwa mu kibuga Taluso ekyʼomu Kirukiya, naye ne nkulira wano mu Yerusaalemi. Era mu kibuga muno mwe nayigira ne nzijjumbira amateeka gonna aga bajjajjaffe nʼobwegendereza, nga njigirizibwa Gamalyeri. Nafubanga nnyo okuweesa Katonda ekitiibwa mu buli kye nakolanga, nga nammwe bwe mukola leero.

⁴Nayigganya abantu bʼEkkubo nʼokubatuusa ku kufa, ne nkwata abasajja nʼabakazi ne mbasibisa mu kkomera.

⁵Era Kabona Asinga Obukulu nʼabʼOlukiiko Olukulu be bajulirwa bange. Kubanga nabasaba bawandiikire bannaabwe mu Damasiko ebbaluwa okunnyamba nkwate abaali eyo mbaleete wano mu Yerusaalemi nga mbasibye mu njegere mbaweeyo babonerezebwe.

⁶Naye mu ssaawa ezʼomu ttuntu bwe nnali nga nsemberera Damasiko, amangwago ekitangaala ekyʼamaanyi ekyava mu ggulu ne kinjakira okunneetooloola.

⁷Ne ngwa wansi ku ttaka, ne mpulira eddoboozi nga liŋŋamba nti, ‘Sawulo, Sawulo, onjigganyiza ki?’

⁸“Ne mbuuza nti, ‘Ani, Mukama wange?’ Nʼanziramu nti, ‘Nze Yesu Omunnazaaleesi gwʼoyigganya.’

⁹Be nnali nabo baalaba ekitangaala, naye eddoboozi lyʼoyo eyayogera nange tebaaliwulira.

¹⁰Ne mmubuuza nti, ‘Nkole ki, Mukama wange?’ Mukama waffe nʼanziramu nti, ‘Situka ogende mu Damasiko, bwʼonootuuka eyo ojja kutegeezebwa byonna bye nkutumye okukola.’

¹¹Bannange ne bankwata ku mukono ne bannyingiza mu Damasiko, kubanga ekitiibwa kyʼekitangaala kiri ekyʼamaanyi kyali kinzibye amaaso.

¹²Omusajja omu ayitibwa Ananiya, ngʼatya Katonda era ngʼagondera amateeka gonna agʼEkiyudaaya, nʼAbayudaaya bonna mu Damasiko nga bamussaamu ekitiibwa,

¹³nʼajja okundaba nʼayimirira we ndi nʼaŋŋamba nti, ‘Owooluganda Sawulo, zibuka amaaso!’ Mu ssaawa eyo yennyini ne nsobola okumulaba!

¹⁴“Awo nʼaŋŋamba nti, ‘Katonda wa bajjajjaffe akulonze otegeere byʼayagala era olabe Omutuukirivu we, era owulire okuyitibwa okuva mu kamwa ke.

¹⁵Olituusa obubaka bwe mu bantu bonna ngʼobategeeza byʼolabye era ne byʼowulidde.

¹⁶Kaakano olinda ki? Situka obatizibwe onaazibweko ebibi byo nga bwʼoyatudde erinnya lye.’

¹⁷“Ne nkomawo mu Yerusaalemi. Naye olunaku lumu bwe nnali mu Yeekaalu nga nsaba, ne mbeera ngʼeyeebase,

¹⁸ne nfuna okwolesebwa ne ndaba Mukama waffe ngʼayogera nange, nʼaŋŋamba nti, ‘Yanguwa mangu ove mu Yerusaalemi, kubanga abantu ba wano tebajja kukkiriza bubaka bwo bwʼonoobategeeza obufa ku nze.’

¹⁹“Ne nziramu nti, ‘Naye Mukama wange, abantu bonna bamanyi nga bwe nagendanga mu buli kkuŋŋaaniro ne nzigyamu abakukkiriza, ne mbatwala ne bakubwa emiggo nʼokusibibwa ne basibibwa mu kkomera.

²⁰Era nʼomujulirwa wo Suteefano bwe yali attibwa nnali nnyimiridde awo era nga mpagira okuttibwa kwe, era nga ndabirira engoye zʼabo abaali bamutta.’

²¹Naye Mukama waffe nʼaŋŋamba nti, ‘Vva mu Yerusaalemi, kubanga nzija kukutuma mu bitundu bye wala mu baamawanga!’ ”

²²Ekibiina kyʼabantu ne bawuliriza Pawulo okutuusa lwe yatuuka ku bigambo ebyo, bonna ne balyoka baleekaanira wamu nti, “Mumuggyeewo! Mumutte! Tasaanira kuba mulamu!”

²³Ne bawowoggana nnyo nga bwe bakasuka nʼengoye zaabwe waggulu mu bbanga, ne bayoola enfuufu nga bagiyiwa mu bbanga.

²⁴Omukulu wʼabaserikale nʼayingiza Pawulo munda mu nkambi yaabwe, nʼalagira akubwemu embooko nga bwe bamubuuza ayogere omusango gwe yazzizza oguleetedde ekibiina kyonna okwecwacwana.

²⁵Bwe baali bamugalamizza nga bagenda okumusiba bamukube, Pawulo nʼabuuza omuserikale eyali amuyimiridde okumpi nti, “Amateeka gabakkiriza okukuba omuntu Omuruumi nga temunnaba na kumuwozesa?”

²⁶Omuserikale nʼagenda eri omuduumizi waabwe nʼamutegeeza nti, “Kiki kino kyʼogenda okukola? Omusajja ono Muruumi.”

²⁷Omuduumizi wʼabaserikale nʼajja nʼabuuza Pawulo nti, “Mbulira, oli Muruumi?” Pawulo nʼamuddamu nti, “Yee, bwe kiri.”

²⁸Omuduumizi wʼabaserikale nʼamugamba nti, “Nange ndi Muruumi, naye nabusasulira ensimbi nnyingi.” Pawulo nʼamuddamu nti, “Nze mwe nazaalirwa!”

²⁹Abaserikale abaali beetegese okumubuuza ne baseebulukuka ne bavaawo bwe baategeera nga Pawulo Muruumi, nʼomuduumizi waabwe naye nʼatya nnyo kubanga yali alagidde okumusiba nʼokumukuba kibooko.

³⁰Enkeera omuduumizi wʼabaserikale bwe yayagala okumanyira ddala ensonga Abayudaaya gye bamulanze, nʼasumulula Pawulo mu njegere, nʼalagira bakabona abakulu bayite Olukiiko lwʼAbayudaaya Olukulu lutuule. Nʼalagira Pawulo aleetebwe mu Lukiiko ensonga Abayudaaya gye bamuvunaana eryoke etegeerebwe.