Ebikolwa by'Abatume 23:1-35 LGCB2014 - Bible AI

¹Awo Pawulo nʼatunuulira Olukiiko enkaliriza, nʼagamba nti, “Baganda bange, obulamu bwange bwonna mbadde ntambulira mu makubo ga Katonda okutuusiza ddala ne ku lunaku lwa leero.”

²Bwe yayogera atyo, Ananiya, Kabona Asinga Obukulu, nʼalagira abo abayimiridde okumpi ne Pawulo bamukubemu oluyi ku mimwa.

³Pawulo nʼamugamba nti, “Naawe Katonda agenda kukukuba oluyi, oli ngʼekisenge ekiva okusiigibwa ennoni! Oli mulamuzi ki ggwe amenya amateeka ngʼolagira bankube mu ngeri eyo, so ngʼosuubirwa okugagoberera ngʼonsalira omusango?”

⁴Abo abaali bayimiridde okumpi ne Pawulo ne bamugamba nti, “Bwʼotyo bwʼoyogera ne Kabona Asinga Obukulu owa Katonda?”

⁵ⓚ Pawulo nʼaddamu nti, “Baganda bange, sitegedde nga ye Kabona Asinga Obukulu, kubanga Ebyawandiikibwa bigamba nti, ‘Toyogeranga bubi ku bafuzi bammwe.’ ”

⁶Awo Pawulo bwe yalaba ngʼabamu abali mu Lukiiko Basaddukaayo nʼabalala nga Bafalisaayo, nʼayogerera mu ddoboozi eryʼomwanguka eri olukiiko nti, “Baganda bange, nze ndi Mufalisaayo, ne bakadde bange Bafalisaayo! Kaakano mpozesebwa lwa kubanga nzikiriza nga waliwo okuzuukira kwʼabafu!”

⁷Bwe baawulira ebyo, Olukiiko ne lwawukanamu wabiri ne wabaawo empaka za maanyi wakati wʼAbafalisaayo nʼAbasaddukaayo,

⁸kubanga Abasaddukaayo bagamba nti Tewali kuzuukira wadde bamalayika, wadde omwoyo ogutafa, naye bo Abafalisaayo ebyo byonna babikkiriza.

⁹Awo empaka ne zikwata wansi ne waggulu, abamu ku bannyonnyozi bʼamateeka, nga ba mu kibiina kya Bafalisaayo, ne beekubira ku ludda lwa Pawulo nga bagamba nti, “Ffe tetulaba kisobyo kyonna omusajja ono kyʼakoze. Obanga malayika yayogera naye, oba Mwoyo, ogwo nagwo guba musango?”

¹⁰Ne beeyongera nnyo okuwakana ngʼabamu Pawulo bamusika bamulaza eno, ngʼabalala bamulaza eri. Okutuusa omuduumizi wʼabaserikale lwe yatandika okutya ngʼalaba Pawulo baagala kumuyuzaamu wabiri, nʼalagira abaserikale be bagende bamubaggyeko nʼamaanyi bamuzzeeyo munda mu nkambi yaabwe.

¹¹Ekiro ekyo Mukama waffe nʼayimirira awali Pawulo, nʼamugamba nti, “Guma omwoyo, kubanga nga bwʼonjulidde nʼobuvumu wano mu Yerusaalemi, era bwʼotyo bwʼonookola ne mu Ruumi.”

¹²Enkeera Abayudaaya ne bakuŋŋaana ne bakola olukwe. Ne beeyama nti Tebajja kulya ku kintu kyonna oba okunywa, wabula nga bamaze okutta Pawulo!

¹³Omuwendo gwʼabantu abaali mu lukwe luno gwasinga ku makumi ana.

¹⁴Awo ne bagenda eri bakabona abakulu nʼabakulembeze baabwe ne babategeeza nti, “Twerayiridde obutalya kintu kyonna okutuusa nga tusse Pawulo.

¹⁵Noolwekyo mugambe omuduumizi wʼabaserikale akomyewo Pawulo mu Lukiiko. Mumugamba nti Waliwo ebibuuzo bitonotono bye mwagala okwongera okumubuuza. Ffe tulyoke tumuttire mu kkubo nga bamuleeta.”

¹⁶Naye mutabani wa mwannyina Pawulo bwe yategeera olukwe olwo nʼagenda mu nkambi yʼabaserikale nʼategeeza Pawulo.

¹⁷Awo Pawulo nʼayita omuserikale atwala banne nʼamugamba nti, “Twala omulenzi ono eri omuduumizi wammwe, kubanga alina ekintu ekikulu kyʼayagala okumutegeeza.”

¹⁸Omuserikale nʼatwala omulenzi eri omuduumizi waabwe nʼamugamba nti, “Omusibe Pawulo ampise nʼantuma ndeete omulenzi ono gyʼoli ngʼalina kyʼayagala okukutegeeza.”

¹⁹Omuduumizi wʼabaserikale nʼakwata omulenzi ku mukono nʼamuzza wabbali nʼamubuuza nti, “Kiki kyʼoyagala okuntegeeza?”

²⁰Omulenzi nʼamubuulira nti, “Enkya Abayudaaya bajja kukusaba ozzeeyo Pawulo mu Lukiiko lwabwe, nga beekwasiza ku kwagala abeeko kyʼayongera okwennyonnyolako.

²¹Tokkiriza! Kubanga waliwo abasajja amakumi ana abajja okwekwekerera abaserikale bo abanaaba bamutwala, bamufubutukireko bamutte. Kubanga beerayiridde obutalya nʼobutanywa okutuusa nga bamaze okumutta. Kaakano bali eyo nga basuubira nti Onokkiriza.”

²²Omuduumizi wʼabaserikale bwe yali asiibula omulenzi nʼamukuutira nti, “Tobuulirako muntu yenna nti Ontegeezezza ebintu bino.”

²³Awo omuduumizi wʼabaserikale nʼayita abamyuka be babiri nʼabalagira nti, “Mutegeke ekibinja kyʼabaserikale ebikumi bibiri, nʼabeebagala embalaasi abaserikale nsanvu, nʼabʼamafumu ebikumi bibiri, bagende e Kayisaliya ekiro kya leero ku ssaawa ssatu.

²⁴Mutegekeewo nʼembalaasi Pawulo zʼajja okweyambisa mu lugendo alyoke atwalibwe bulungi atuusibwe mirembe ewa Gavana Ferikisi.”

²⁵Awo nʼawandiikira gavana ebbaluwa eno nti:

²⁶“Nze Kulawudiyo Lusiya, nkulamusa Oweekitiibwa Gavana Ferikisi.

²⁷Omusajja ono Abayudaaya baamukwata, naye baali bagenda okumutta, nze kwe kuweerezaayo abaserikale bange ne bamutaasa, kubanga nnali ntegedde nga Muruumi.

²⁸Awo ne mmutwala mu Lukiiko lwabwe ntegeere ekisobyo kye yali akoze.

²⁹Ne nvumbula ngʼensonga ze baali bamuvunaana zaali zifa ku bya kukkiriza kwabwe na byʼamateeka gaabwe naye nga tezisaanyiza kussa muntu wadde okumusibya mu kkomera.

³⁰Naye bwe nategeezebwa nti waliwo olukwe olwʼokumutta, kwe kusalawo okukumuweereza, era nzija kulagira baleete ensonga zaabwe gyʼoli.”

³¹Awo abaserikale ne basitula ekiro ekyo, nga bwe baalagirwa, ne batwala Pawulo ne batuuka mu Antipatuli.

³²Enkeera ekibinja ekyʼoku mbalaasi ne kitwala Pawulo e Kayisaliya, abaserikale abalala bo ne baddayo mu nkambi yaabwe.

³³Abaserikale abʼomu kibinja ekyʼoku mbalaasi bwe baatuuka e Kayisaliya ne batwala Pawulo ewa gavana nʼebbaluwa ne bagiwaayo.

³⁴Gavana bwe yamala okugisoma, nʼabuuza Pawulo essaza mwʼava. Pawulo nʼaddamu nti, “Nva mu Kirukiya.”

³⁵Awo gavana nʼamugamba nti, “Abakuvunaana bwe banaatuuka ne ndyoka mpulira ensonga zo mu bujjuvu.” Nʼalagira bagira bamukuumira mu kkomera eriri mu lubiri lwa Kerode.