Ebikolwa by'Abatume 26:1-32 LGCB2014 - Bible AI

¹Agulipa nʼagamba Pawulo nti, “Okkirizibbwa okuwoza ensonga zo.” Awo Pawulo nʼagolola omukono gwe, nʼawoza nti,

²“Kabaka Agulipa, nnina omukisa okuwoleza mu maaso go leero, nga nnyanukula byonna Abayudaaya bye banvunaana,

³kubanga mmanyi ngʼempisa zʼEkiyudaaya, zonna ozitegeera bulungi. Kyenva nkusaba ompulirize nʼobugumiikiriza.

⁴“Nayigirizibwa nʼobwegendereza mu mpisa zʼEkiyudaaya okuviira ddala mu buto bwange mu kibuga kyʼewaffe e Taluso ne mu Yerusaalemi, era ne ntambulira mu mpisa ezo obulamu bwange bwonna. Ebyo byonna Abayudaaya bonna babimanyi bulungi.

⁵Era bammanyidde ebbanga ddene nnyo, singa babadde baagala bandinjulidde, nga ndi munnakibiina ekyʼAbafalisaayo, ekyʼomu ddiini yaffe ekisingira ddala okunonooza mu buli nsonga eyʼEkiyudaaya.

⁶Kaakano nnyimiridde nga nvunaanibwa, kubanga nnina essuubi mu ebyo Katonda bye yasuubiza bajjajjaffe,

⁷ebika byaffe ekkumi nʼebibiri bye basuubira okutuukako nga banyiikira okusinza emisana nʼekiro; era olwʼessuubi eryo, ayi kabaka, Abayudaaya kyebavudde banvunaana.

⁸Kiki ekibalowoozesa nti Tekiyinzika Katonda okuzuukiza abafu?

⁹“Nze ku lwange nalowooza nti Kiŋŋwanidde okuyigganya erinnya lya Yesu Omunnazaaleesi, nʼobukambwe bungi.

¹⁰Bwe ntyo ne mbikola ne mu Yerusaalemi era ne nsiba abatuukirivu bangi mu makomera, era ne mpeebwa nʼobuyinza okuva eri bakabona abakulu; abatukuvu ne bwe battibwanga, nga nkiwagira.

¹¹Ne mu makuŋŋaaniro gonna wonna ne mbasindiikirizanga nga mbawalirizanga okuvvoola, ne mbasunguwaliranga nnyo, ne mbayigganyanga okutuuka ne mu bibuga ebyʼewala.

¹²“Awo bwe nnali nga ndaga e Damasiko, nga ndagiddwa era nga mpeereddwa obuyinza okuva eri bakabona abakulu,

¹³nga ndi mu kkubo mu ttuntu, ayi Kabaka, ne ndaba ekitangaala ekyaka okusinga ekyʼenjuba, ne kinjakira ne bannange be nnali ntambula nabo.

¹⁴Ffenna bwe twagwa wansi, ne mpulira eddoboozi nga liŋŋamba mu Lwebbulaniya nti, ‘Sawulo, Sawulo, onjigganyiza ki? Weerumya wekka bwʼosamba ku nkato.’

¹⁵Ne mbuuza nti, ‘Ggwe ani Mukama wange?’ Mukama waffe nʼaddamu nti, ‘Nze Yesu, gwʼoyigganya.

¹⁶Naye golokoka. Nkulabikidde, nkulonde obeere omuweereza wange era omujulirwa wʼebyo mwʼondabidde era owʼebyo mwe nnaakulabikiranga.

¹⁷Era ndikuwonya mu bantu bano ne mu baamawanga gye ndikutuma

¹⁸okuzibula amaaso gaabwe bakyuke bave mu kizikiza badde eri omusana, nʼokuva mu buyinza bwa Setaani, badde eri Katonda balyoke basonyiyibwe ebibi bafunire wamu omugabo gwa Katonda nʼabo abatukuzibwa olwʼokunzikiriza.’

¹⁹“Bwe ntyo, Ayi Kabaka Agulipa, ne sinyooma kwolesebwa okwo okwava mu ggulu,

²⁰naye ne nsookera ku bʼomu Damasiko, ne nzizaako abʼomu Yerusaalemi ne mu Buyudaaya mwonna, nʼeri Abaamawanga, nga mbategeeza beenenye bakyukire Katonda, era bakolenga ebikolwa ebyʼokwenenya ebisaanira.

²¹Eyo yʼensonga Abayudaaya kyebaava bankwata nga ndi mu Yeekaalu ne bagezaako nʼokunzita.

²²Katonda kyavudde ankuuma okutuusa leero ndyoke nyimirire nga ndi mujulirwa eri abʼekitiibwa era nʼaba bulijjo, nga sirina kirala kye njogera, wabula ebyo bannabbi ne Musa bye baategeeza nga bigenda okujja

²³nti Kristo kimugwanira okubonaabona, era abeere omubereberye mu kuzuukira kwʼabafu, alyoke aleetere abantu bano nʼAbamawanga omusana.”

²⁴Awo Pawulo bwe yali akyawoza Fesuto nʼaleekaana mu ddoboozi eryʼomwanguka nti, “Pawulo, olaluse! Okusoma ennyo kukusudde eddalu!”

²⁵Pawulo nʼaddamu nti, “Siraluse, Oweekitiibwa Fesuto. Ebigambo bye njogera bya nsonga era bya mazima.

²⁶Era ebintu bino Kabaka Agulipa abitegeera, noolwekyo nnyinza okubimubuulira nga seekomoma. Era nkakasa nga tewali na kimu ku bintu bino kyʼataamanya, kubanga tebyakolerwa mu nkiso!

²⁷Kabaka Agulipa, bannabbi obakkiriza? Mmanyi ngʼobakkiriza.”

²⁸Agulipa nʼagamba Pawulo nti, “Onsendasenda nfuuke Omukristaayo mu kaseera kano akatono bwe kati?”

²⁹Pawulo nʼaddamu nti, “Nsaba Katonda, mu kaseera katono oba mu kiseera kinene, ggwe ne bonna abampuliriza kaakano, bafuuke nga nze, okuggyako enjegere zino ezinsibiddwa.”

³⁰Awo Kabaka, ne gavana ne Berenike, nʼabalala bwe baali batudde, ne basituka ne bafuluma.

³¹Bwe badda ebbali ne bakkiriziganya ne bagamba nti, “Omusajja ono talina kyʼakoze kimusaanyiza kuttibwa wadde okusibwa mu njegere.”

³²Agulipa kwe kugamba Fesuto nti, “Omusajja ono yanditeereddwa singa teyajulira wa Kayisaali.”