Ebikolwa by'Abatume 28:1-31 LGCB2014 - Bible AI

¹Awo bwe twamala okutuuka obulungi ku lukalu ne tulyoka tutegeera nti Tuli ku kizinga Merita.

²Bannansi bʼoku kizinga baatulaga ekisa kingi ekitali kya bulijjo, ne bakuma omuliro ne twota, kubanga obudde bwali bwa butiti nga nʼenkuba etandise okutonnya.

³Pawulo yali akuŋŋaanyizza akaganda kʼobuku, naye yali akassa ku muliro, omusota ogwʼobutwa ennyo ne guva mu buku obwo ne gweripa ku mukono gwe.

⁴Bwe baalaba ekintu ekireebeeta ku mukono gwa Pawulo ne bagambagana nti, “Ddala oyo mutemu. Newaakubadde ngʼennyanja yagiwonye, naye era omusango gukyamulondoola teguumuganye kulama!”

⁵Naye Pawulo omusota nʼagukunkumulira mu muliro nʼatabaako kabi konna.

⁶Abantu ne balindirira balabe bwʼatandika okuzimba oba okugwa eri afiirewo, naye bwe baalindiririra ebbanga eddene nga tebamulabako kamogo, ne baddamu okwerowooza, ne bagamba nti, “Oyo katonda!”

⁷Waaliwo ennimiro okuliraana nʼolubalama lwʼennyanja we twali, nga ya Pabuliyo eyali omukulu wʼekizinga ekyo. Awo nʼatwaniriza mu maka ge nʼatusembeza nʼatulabirira okumala ennaku ssatu.

⁸Mu kiseera ekyo kitaawe yali mulwadde omusujja ngʼalimu ekiddukano kyʼomusaayi. Pawulo nʼagenda gyʼali nʼamusabira, nʼamussaako emikono nʼamuwonya!

⁹Ekyo bwe kyabaawo, nʼabalwadde abalala bonna ku kizinga abaalina endwadde ne bajja gyʼali ne bawonyezebwa.

¹⁰Ne batuwa ebirabo bingi, era ekiseera kyaffe ekyʼokusaabala ku nnyanja bwe kyatuuka, ne batuleetera ebintu bingi ku kyombo bye twali twetaaga okukozesa mu lugendo lwaffe.

¹¹Oluvannyuma lwʼemyezi esatu ne tulyoka tusitula. Twagendera mu kyombo ekyʼe Alegezanderiya ekiyitibwa Abooluganda Abalongo. Kyali kyewogomye awo ku kizinga okumala obudde bwonna olwʼobutiti.

¹²Ne tusooka okugoba mu Sirakusi, ne tumalawo ennaku ssatu.

¹³Bwe twava awo ne twetooloola ne tutuuka e Regio. Oluvannyuma lwʼolunaku lumu ne tujjirwa empewo eva obukiikaddyo bwa bugwanjuba, olunaku olwaddirira ne tutuuka e Putiyooli.

¹⁴Wano twasangawo abooluganda, ne batusaba tubeere nabo ennaku musanvu. Bwe twava awo ne tutuuka e Ruumi.

¹⁵Abooluganda abaali eyo bwe baawulira ebyatutuukako, ne bajja okutusisinkana mu Katale ka Apiya ne ku Bisulo Ebisatu. Pawulo bwe yabalaba ne yeebaza Katonda era nʼaguma omwoyo.

¹⁶Bwe twatuuka mu Ruumi Pawulo nʼakkirizibwa okubeera yekka, kyokka ngʼabeera nʼomuserikale amukuuma.

¹⁷Awo nga wayiseewo ennaku ssatu, Pawulo nʼayita abakulembeze bʼAbayudaaya. Bwe baakuŋŋaana nʼayogera nabo nti, “Abasajja baganda bange, Abayudaaya bankwatira bwereere mu Yerusaalemi, ne bampaayo mu Baruumi, so nga sirina kyʼensobezza ku bantu, wadde ku mpisa zʼabajjajjaffe wadde obulombolombo.

¹⁸Abaruumi ne bampozesa, era ne baagala okunta, kubanga tebaalabawo musango gwe nzizizza gunsaanyiza kufa.

¹⁹Naye Abayudaaya bwe baagaana okukkiriza ensala eyo, ne mpalirizibwa okujulira ewa Kayisaali, newaakubadde nga saaliko kye mpawaabira bantu ba ggwanga lyange.

²⁰Noolwekyo mbayise wano tumanyagane era twogeraganye. Olwʼessuubi lya Isirayiri, kyenvudde nsibibwa nʼolujegere luno.”

²¹Ne bamuddamu nti, “Tetufunanga ku bbaluwa ziva mu Buyudaaya nga zikwogerako, wadde baganda baffe okubaako bye batutegeeza ku ggwe nga bibi.

²²Kyokka twagala okuwulira ebirowoozo byo ku kibiina ekyo, kubanga tumanyi nti Buli wamu teriiyo gwʼowulira ngʼakyogerako bulungi.”

²³Awo ne bategeka olunaku, era ku olwo abantu ne bajja bangi, mu kifo we yasulanga. Nʼabannyonnyola ngʼajulira obwakabaka bwa Katonda, nʼabategeeza ku Yesu, nga byonna abyesigamya ku mateeka ga Musa ne ku bannabbi. Yatandika ku nkya nʼamala akawungeezi.

²⁴Abamu ne bakkiriza bye yayogera, naye abalala ne batakkiriza.

²⁵Awo nga balemeddwa okukkiriziganya, Pawulo nʼabasiibuza ebigambo bino nti, “Mwoyo Mutukuvu yali mutuufu bwe yayogera eri bajjajjammwe ngʼayita mu nnabbi Isaaya nti,

²⁶‘Genda eri abantu bano obagambe nti, Okuwulira muliwulira, naye temulitegeera nʼokulaba muliraba naye temulyetegereza.

²⁷ⓜ Kubanga omutima gwʼabantu bano gugubye. Nʼamatu gaabwe gazibikidde, nʼamaaso gaabwe gazibiridde. Si kulwa nga balaba nʼamaaso gaabwe, ne bawulira nʼamatu gaabwe, ne bategeera nʼemitima gyabwe, ne bakyuka okudda gye ndi, ne mbawonya.’

²⁸“Noolwekyo mumanye nti Obulokozi obuva eri Katonda buweereddwa Abaamawanga era bajja kubuwuliriza.”

²⁹Pawulo bwe yamala okwogera ebyo, Abayudaaya ne bagenda nga bawakana nnyo bokka na bokka.

³⁰Awo Pawulo nʼamala emyaka ebiri miramba ngʼasula mu nnyumba ye gye yeepangisiza, era nʼayanirizanga buli eyajjanga okumulaba.

³¹Nʼabuuliranga obwakabaka bwa Katonda, era nʼayigirizanga ebigambo bya Mukama waffe Yesu Kristo mu lwatu nga tewali amuziyiza.