Ebikolwa by'Abatume 3:1-26 LGCB2014 - Bible AI

¹Awo Peetero ne Yokaana bwe baali bagenda mu Yeekaalu mu kusaba okwʼessaawa omwenda,

²ne wabaawo omusajja eyazaalibwa nga mulema gwe baasitulanga ne bateekanga bulijjo ku mulyango gwa Yeekaalu oguyitibwa Omulyango Omulungi, okusabiriza.

³Awo bwe yalaba Peetero ne Yokaana nga bagenda okuyingira mu yeekaalu nʼabasaba ensimbi.

⁴Ne bamwekaliriza amaaso, Peetero nʼalyoka amugamba nti, “Tutunuulire!”

⁵Nʼabatunuulira ngʼasuubira okuweebwayo akantu.

⁶Naye Peetero nʼagamba nti, “Effeeza ne zaabu sibirina, naye ka nkuwe ekyo kye nnina. Mu linnya lya Yesu Omunnazaaleesi Golokoka, otambule!”

⁷Awo Peetero nʼakwata omulema ku mukono ogwa ddyo nʼamuyimusa, amangwago ebigere byʼomusajja nʼobukongovvule ne bifuna amaanyi,

⁸nʼabuuka nʼayimirira nʼatandika okutambula! Nʼayingira nabo mu Yeekaalu ngʼatambula era nga bwʼabuuka ngʼatendereza Katonda.

⁹Abantu bonna ne baamulaba ngʼatambula, era ngʼatendereza Katonda,

¹⁰ne bamutegeera nga ye wuuyo eyatuulanga ku mulyango gwa Yeekaalu oguyitibwa Omulyango Omulungi ngʼasabiriza, ne bawuniikirira era ne beewuunya nnyo olwʼekyo ekimutuuseeko.

¹¹Awo omusajja eyali omulema bwe yali ngʼakyekutte ku Peetero ne Yokaana abantu bonna ne badduka okujja we baali ne bakuŋŋaanira mu kisasi kya Sulemaani, nga basamaaliridde.

¹²Awo Peetero bwe yabalaba nʼagamba abantu nti, “Abasajja Abayisirayiri, kiki ekibeewuunyisa? Era lwaki mututunuulira ngʼabagamba nti Obulungi bwaffe nʼobuyinza bwaffe bye bitambuzza omusajja ono?

¹³ⓖ Katonda wa Ibulayimu, ne Isaaka, ne Yakobo, era Katonda wa bajjajjaffe ffenna yagulumiza omuweereza we Yesu, gwe mwawaayo ne mu mwegaanira mu maaso ga Piraato newaakubadde nga ye yali amaliridde okumusumulula,

¹⁴naye mmwe ne mwegaana omutuukirivu era omutukuvu, ne musaba babateere omutemu.

¹⁵Bwe mutyo ne mutta aleeta obulamu; oyo ye Katonda yamuzuukiza mu bafu, era ffe bajulirwa.

¹⁶Olwʼokukkiriza mu linnya lye, omusajja ono, mwenna gwe mulaba era gwe mumanyi aweereddwa amaanyi mu linnya lye, era okukkiriza mu ye kwe kuwadde omusajja ono obulamu obutuukiridde nga mwenna bwe mulaba.”

¹⁷“Kale kaakano, abooluganda, mmanyi nga kye mwakola mwakikola mu butamanya, era nʼabakulembeze bammwe nabo bwe batyo.

¹⁸Kyokka Katonda yali atuukiriza ebyo bannabbi bonna bye baayogera nti Kristo we ateekwa okubonaabona mu ngeri eyo.

¹⁹Noolwekyo mwenenye, mukyuke, mulyoke mugibweko ebibi byammwe,

²⁰mulyoke muwummulire mu maaso ga Mukama, naye abaweereze Yesu, ye Kristo eyalangirirwa gye muli edda,

²¹eyagwanyizibwa okutwalibwa mu ggulu okutuusa ekiseera nga kituuse ebintu byonna ne bizzibwa obuggya Katonda bye yayogerera edda mu bannabbi be abatukuvu.

²²ⓗ Weewaawo Musa yagamba nti, ‘Mukama Katonda wammwe alibayimusiza nnabbi ali nga nze, gwʼaliggya mu baganda bammwe. Muwulirizanga buli kyʼalibagamba.

²³ⓘ Ataliwuliriza nnabbi oyo abantu balimuzikiririza ddala.’

²⁴“Ne bannabbi bonna okuviira ddala ku Samwiri nʼabo abaamuddirira bonna abaayogera nabo baalangirira olunaku luno.

²⁵ⓙ Mmwe bazzukulu ba bannabbi abo, era abʼendagaano Katonda gye yalagaana ne bajjajjammwe ngʼagamba Ibulayimu nti, ‘Mu zzadde lyo abantu bonna abʼoku nsi mwe baliweerwa omukisa.’

²⁶Bwʼatyo Katonda bwe yalondawo okubatumira Omuweereza we abawe omukisa, buli omu ku mmwe ngʼakyuka okuva mu bibi bye.”