Ebikolwa by'Abatume 4:1-37 LGCB2014 - Bible AI

¹Awo Peetero ne Yokaana baali bakyayogera eri abantu, bakabona, nʼomukulu wʼabakuumi ba Yeekaalu nʼAbasaddukaayo ne bajja gye bali,

²nga basunguwadde nnyo okuwulira nga Peetero ne Yokaana bayigiriza abantu, ku bwa Yesu, okuzuukira mu bafu.

³Ne bakwata Peetero ne Yokaana, naye olwokubanga obudde bwali buyise ne babaggalira mu kkomera okutuusa enkeera.

⁴Kyokka abantu bangi ku abo abaali bawuliriza abatume ne bakkiriza, era omuwendo gwʼabasajja bokka abakkiriza ne guba ngʼenkumi ttaano!

⁵Enkeera, abafuzi nʼabakulembeze bʼAbayudaaya, nʼabannyonnyozi bʼamateeka ne bakuŋŋaanira mu Yerusaalemi.

⁶Baali ne Ana Kabona Asinga Obukulu, ne Kayaafa, ne Yokaana, ne Alegezanda nʼabalala bangi abaalina oluganda ne Kabona Asinga Obukulu.

⁷Awo abatume bombi ne baleetebwa ne basimbibwa mu maaso gʼOlukiiko. Ne bababuuza nti, “Buyinza ki oba linnya lyʼani kwe musinzidde okukola kino?”

⁸Awo Peetero bwe yajjuzibwa Mwoyo Mutukuvu nʼagamba nti, “Abafuzi, nʼabakulembeze bʼabantu,

⁹obanga tubuuzibwa nsonga eyʼomusajja eyawonyezeddwa,

¹⁰mutegeere mmwe mwenna nʼabantu bonna mu Isirayiri, omusajja ono ayimiridde mu maaso gammwe mu linnya lya Yesu Kristo Omunnazaaleesi, gwe mwakomerera naye Katonda nʼamuzuukiza, era kaakano mulamu.

¹¹ⓚ ‘Oyo lyʼEjjinja abazimbi lye baagaana, eryafuuka ekkulu eryʼoku nsonda.’

¹²Tewali mu mulala yenna bulokozi, era tewali linnya ddala na limu mu mannya gonna agaaweebwa abantu, wansi wʼeggulu, mwetugwanira okulokolebwa.”

¹³Awo abʼOlukiiko bwe baalaba obuvumu bwa Peetero ne Yokaana, ate nʼokutegeera ne bategeera nga tebaasoma, era nga si batendeke, ne beewuunya nnyo, ne bategeera ngʼabasajja abo baabeeranga ne Yesu.

¹⁴Era bwe baalaba omusajja eyawonyezebwa ngʼayimiridde nabo, nʼekyʼokubaddamu ne kibabula.

¹⁵Ne babalagira okugira nga babeera wabweru Olukiiko lubakubaganyeko ebirowoozo.

¹⁶Abʼolukiiko ne beebuuzaganya nti, “Abasajja bano tubakole tutya? Kubanga tetuyinza kwegaana ekyamagero ekyʼamaanyi ekikoleddwa mu bo; buli muntu yenna mu Yerusaalemi akitegedde.

¹⁷Naye engeri gye tunaaziyizaamu ebigambo byabwe okwongera okusaasaana kwe kubalabula nʼamaanyi baleme kuddayo kwogera na muntu yenna ku linnya lya Yesu.”

¹⁸Ne babayita bakomewo mu Lukiiko, ne babalagira baleme kuddayo nate kwogera ku linnya lya Yesu.

¹⁹Naye Peetero ne Yokaana ne baddamu nti, “Mmwe muba musalawo obanga kituufu mu maaso ga Katonda okuwulira mmwe okusinga okuwulira Katonda.

²⁰Tetuyinza butayogera ku bintu bye twalaba, nʼebigambo bye twawulira.”

²¹Awo Olukiiko bwe lwamala okwongera okubatiisatiisa ne lubaleka ne bagenda, kubanga baabulwa kwe banaasinziira okubabonereza ne batasasamaza bantu. Kubanga abantu bonna baali bagulumiza Katonda olwʼekyo ekyabaawo.

²²Omusajja eyawonyezebwa yali assussa mu myaka amakumi ana.

²³Awo Peetero ne Yokaana bwe baateebwa ne baddayo eri bannaabwe ne bababuulira byonna bakabona abakulu nʼabakulembeze bʼAbayudaaya bye baabagamba.

²⁴Bonna bwe baabiwulira ne bayimusiza wamu amaloboozi gaabwe nʼomwoyo gumu eri Katonda ne basaba nti, “Ayi Mukama, Omutonzi wʼeggulu nʼensi nʼennyanja ne byonna ebibirimu,

²⁵ggwe Kitaffe wayogerera ku bwa Mwoyo Mutukuvu mu kamwa kʼomuweereza wo, Dawudi bwe yagamba nti:

²⁵‘Lwaki Abaamawanga banyiigidde, nʼabantu ne balowooza ebitaliimu?

²⁶ⓛ Bakabaka bʼensi nʼabakulembeze, beegatta okulwanyisa Mukama nʼokulwanyisa Kristo we.’

²⁷Kubanga baakuŋŋaanira mu kibuga. Kerode ne Pontiyo Piraato, awamu nʼAbamawanga, nʼAbayisirayiri, beegatta okulwanyisa Omuweereza wo Omutukuvu Yesu gwe wafukako amafuta,

²⁸ne bakola ebyo omukono gwo nʼokuteesa kwo bye kwateekateeka edda okubaawo.

²⁹Ne kaakano, Ayi Mukama, wulira okutiisatiisa kwabwe; owe abaddu bo obuvumu babuulire ekigambo kyo,

³⁰golola omukono gwo owonye, nʼobubonero nʼebyamagero bikolebwenga mu linnya lyʼOmuweereza wo Omutukuvu Yesu.”

³¹Awo bwe baamala okusaba, ekifo mwe baali bakuŋŋaanidde ne kinyeenyezebwa, bonna ne bajjuzibwa Mwoyo Mutukuvu ne babuulira ekigambo kya Katonda nʼobuvumu.

³²Abakkiriza bonna baalina omwoyo gumu nʼomutima gumu; nga tewali agamba nti Kino kye nnina kyange ku bwange, wazira nga bonna bagabanira wamu.

³³Awo abatume ne babuulira nnyo nʼamaanyi mangi ku kuzuukira kwa Mukama waffe Yesu, era bonna ne bajjula ekisa kingi.

³⁴Mu bo temwali baali mu kwetaaga, kubanga abo abaalina ettaka oba amayumba, baabitundanga, ensimbi ezivudde mu bye batunze

³⁵ne bazireeta ku bigere byʼabatume bagabireko buli muntu ngʼokwetaaga kwe bwe kwalinga.

³⁶Awo Yusufu, Omuleevi abatume gwe baatuuma Balunabba (amakulu gaalyo nti Atereeza emitima gyʼabantu) eyazaalibwa e Kupulo,

³⁷nʼatunda ennimiro ye, ensimbi ezaavaamu nʼazireeta ku bigere byʼabatume.