Ebikolwa by'Abatume 5:1-42 LGCB2014 - Bible AI

¹Waaliwo omusajja erinnya lye Ananiya ne mukyala we Safira, nʼatunda ebibye

²ne yeeterekerako ku muwendo, mukazi we naye ngʼamanyi, nʼaleetako kitundu butundu nʼakiteeka ku bigere byʼabatume.

³Naye Peetero nʼagamba Ananiya nti, “Ananiya, lwaki Setaani ajjudde mu mutima gwo, nʼokulimba nʼolimba Mwoyo Mutukuvu ne weeterekerako ku muwendo gwʼennimiro?

⁴Teyali yiyo? Era bwe yamala okutundibwa, teyali mu buyinza bwo? Lwaki ekikolwa ekyo kikujjidde mu mutima gwo? Tolimbye bantu wabula olimbye Katonda.”

⁵Ananiya olwawulira ebigambo ebyo nʼagwa eri nʼafiirawo! Bonna abaawulira ebyo ne bakwatibwa entiisa ya maanyi.

⁶Abavubuka ne bayimuka ne bamuzinga, ne bamutwala ne bamuziika.

⁷Bwe waali wayiseewo essaawa nga ssatu, mukyala we naye nʼayingira, kyokka nga tategedde bibaddewo.

⁸Peetero nʼamubuuza nti, “Mbuulira, omuwendo guno gwe gwo gwe mwaggya mu nnimiro gye mwatunda?” Omukyala nʼaddamu nti, “Yee, gwe guugwo.”

⁹Awo Peetero nʼamugamba nti, “Lwaki mwateesezza okukema Omwoyo wa Mukama? Laba, ebigere byʼabo abaziise balo biri ku mulyango naawe bagenda kukutwala.”

¹⁰Amangwago nʼagwa wansi ku bigere bya Peetero nʼafiirawo. Abavubuka bwe baayingira ne bamusanga ngʼafudde ne bamutwala ne bamuziika okuliraana bba.

¹¹Entiisa eyʼamaanyi nʼebuna Ekkanisa yonna na buli muntu eyawulira ebigambo ebyo.

¹²Abatume ne baba nʼomwoyo gumu ne bakuŋŋaananga mu kisasi kya Sulemaani, ne bakola ebyamagero bingi mu bantu.

¹³So ne wataba nʼomu ku balala eyayaŋŋanga okubeegattako, newaakubadde ngʼabantu bonna baabasiima nnyo.

¹⁴Abakkiriza bangi abasajja nʼabakazi ne beeyongeranga okwegatta ku Mukama waffe.

¹⁵Abantu ne baleeta abalwadde baabwe ku nguudo zʼomu kibuga, ne babagalamizanga ku butanda ne ku bikeeka, ekisiikirize kya Peetero kibatuukeko ngʼazze.

¹⁶Ebibiina ne biva mu bibuga ebiriraanye Yerusaalemi, ne baleeta abalwadde nʼabaaliko baddayimooni, bonna ne bawonyezebwa.

¹⁷Awo Kabona Asinga Obukulu, nʼabo abaali naye abʼomu kibiina kyʼAbasaddukaayo ne bajjula obuggya.

¹⁸Ne bakwata abatume ne babateeka mu kkomera lyʼabantu bonna.

¹⁹Naye mu kiro, malayika wa Mukama nʼajja nʼaggulawo enzigi zʼekkomera nʼabafulumya,

²⁰nʼabagamba nti, “Mugende muyimirire mu Yeekaalu mutegeeze abantu bonna ebigambo ebyʼobulamu buno.”

²¹Bwe baawulira ebyo ne bayingira mu Yeekaalu mu matulutulu, ne bayigiriza. Kabona Asinga Obukulu ne be yali nabo ne bajja ne batuuza Olukiiko Olukulu olwʼabakulu bʼabaana ba Isirayiri, ne balyoka batuma mu kkomera okuleeta abasibe babawozese.

²²Naye abaweereza bwe baatuuka mu kkomera tebaabasangamu. Ne bakomawo ne bategeeza Olukiiko Olukulu

²³nga bagamba nti, “Tusanze enzigi zʼekkomera nga nsibe nʼabakuumi bonna nʼabaserikale nga bayimiridde ku nzigi; naye bwe tuziggudde, tetusanzeemu muntu nʼomu.”

²⁴Awo omukulu wʼabaserikale ba Yeekaalu awamu ne bakabona abakulu bwe baawulira ebyo ne basamaalirira nga beewuunya ebintu ebyo gye binaakoma.

²⁵Omuntu omu nʼajja nʼabategeeza nti, “Abasajja be mwasibye mu kkomera bali eri mu Yeekaalu bayigiriza bantu.”

²⁶Awo omukulu wʼabaserikale ba Yeekaalu, nʼagenda nʼabaserikale ne babaleeta, si lwa maanyi, nga batya abantu okwegugunga nʼokukuba abaserikale amayinja.

²⁷Awo abatume bwe baaleetebwa, ne bayimirira mu maaso gʼOlukiiko Olukulu, Kabona Asinga Obukulu nʼababuuza

²⁸ngʼagamba nti, “Tetwabalagira obutayigirizanga mu linnya eryo; naye laba mujjuzizza Yerusaalemi okuyigiriza kwammwe, era mumaliridde okutuleetako omusaayi gwʼomuntu oyo.”

²⁹Naye Peetero nʼabatume ne baddamu nti, “Kitugwanira okugondera Katonda okusinga okugondera abantu.

³⁰Katonda wa bajjajjaffe yazuukiza Yesu, gwe mwatta nga mumuwanise ku muti.

³¹Oyo Katonda nʼamugulumiza okubeera Omulangira era Omulokozi, abeerenga ku mukono gwe ogwa ddyo, okuwa Isirayiri omukisa ogwʼokwenenya nʼokusonyiyibwa ebibi.

³²Ffe ne Mwoyo Mutukuvu Katonda gwʼawa abo abamugondera tuli bajulira ba bigambo ebyo.”

³³Awo abʼOlukiiko bwe baawulira ebigambo ebyo ne bajjula obusungu bungi nʼokwagala ne baagala okubatta.

³⁴Naye omu ku abo abaali mu Lukiiko Olukulu, Omufalisaayo erinnya lye Gamalyeri, eyali omuyigiriza wʼamateeka era nga nʼabantu bamussaamu nnyo ekitiibwa, nʼalagira abatume bagira bafulumizibwa ebweru.

³⁵Nʼalyoka agamba banne abʼomu Lukiiko nti: “Abasajja Abayisirayiri, mwegendereze nnyo abasajja abo ne kye mugenda okubakolako.

³⁶Emabegako waaliwo omusajja erinnya lye Syuda, yasituka era nʼalowoozesa abantu nti Muntu mukulu, era abantu ngʼebikumi bina ne bamugoberera; naye yattibwa abaali bamugoberera ne basaasaana ne bikoma awo.

³⁷Oyo bwe yavaawo ne wasituka Yuda Omugaliraaya mu biseera ebyʼokubala abantu. Abantu bangi ne bamugoberera, kyokka bwe yattibwa, abagoberezi be ne basaasaana ne bataddayo kuwulikikako.

³⁸Noolwekyo kye ŋŋamba kye kino nti, Abasajja bano mubaleke bagende! Kubanga, obanga enteekateeka eno yʼabantu ejja kukoma.

³⁹Naye obanga biva eri Katonda, temuyinza kubaziyiza, kubanga mujja kuba nga mulwanyisa Katonda.” Ne bamuwulira.

⁴⁰Abatume ne bayitibwa, bwe baamala okukubibwa ne balabulwa obutaddayo kwogera mu linnya lya Yesu, ne babata.

⁴¹Abatume ne bava mu Lukiiko nga basanyuka kubanga baasaanyizibwa okukwatibwa ensonyi nʼokubonaabona olwʼErinnya.

⁴²Awo ne bayigirizanga mu Yeekaalu buli lunaku ne mu maka gʼabantu, nga babuulira Yesu.