Ebikolwa by'Abatume 7:1-60 LGCB2014 - Bible AI

¹Awo Kabona Asinga Obukulu nʼabuuza Suteefano nti, “Ebyo bwe biri bwe bityo?”

²Suteefano nʼaddamu nti, “Baganda bange ne bakadde bange, mumpulirize! Katonda owʼekitiibwa yalabikira jjajjaffe Ibulayimu ngʼakyali mu Mesopotamiya, nga tannaba kulaga mu Kalani.

³ⓜ Nʼamugamba nti, ‘Vva mu nsi yannyo ne mu bantu bo, ogende mu nsi gye ndikulaga.’

⁴“Bwʼatyo nʼava mu nsi yʼAbakuludaaya nʼabeera mu Kalani, okutuusa kitaawe bwe yafa. Awo Katonda nʼamuleeta wano mu nsi eno mwe tuli kaakano,

⁵ⓝ ⓞ Naye nʼatamuwaako ttaka lirye newaakubadde awalinnyibwa ekigere. Kyokka nʼasuubiza okugimuwa okugirya, ye nʼezzadde lye oluvannyuma lwe, newaakubadde nga mu kiseera ekyo lbulayimu teyalina mwana!

⁶ⓟ Katonda nʼamugamba nti ezzadde lye, baliba bagenyi mu nsi yʼabalala, era balibafuula abaddu, ne babayisa bubi okumala emyaka ebikumi bina.

⁷ⓠ Era Katonda nʼagamba nti, ‘Ndibonereza eggwanga eryo eriribafuula abaddu, nʼoluvannyuma balivaayo ne bansinziza mu kifo kino.’

⁸Era nʼamuwa okukomolebwa ngʼakabonero akʼendagaano. Awo lbulayimu nʼazaala lsaaka, nʼamukomola ngʼawezezza ennaku munaana ezʼobukulu. Isaaka nʼazaala Yakobo, ne Yakobo nʼazaala bajjajjaffe ekkumi nʼababiri.

⁹“Bajjajja abo ne bakwatirwa Yusufu obuggya, ne bamutunda mu Misiri. Naye Katonda yali naye,

¹⁰nʼamuwonya mu kubonaabona kwonna era nʼamuwa ekisa nʼamagezi mu maaso ga Falaawo, ye kabaka wʼe Misiri. Falaawo nʼamuwa okufuga Misiri yonna era nʼamukwasa okulabirira byonna ebifa mu lubiri lwe.

¹¹“Awo enjala nʼegwa mu Misiri yonna ne mu nsi ya Kanani, nʼereetera bajjajjaffe okubonaabona ennyo kubanga baali tebalina we baggya mmere.

¹²Yakobo bwe yawulira nga mu Misiri eriyo eŋŋaano nʼatumayo bajjajjaffe, omulundi gwabwe ogwasooka.

¹³Ku mulundi ogwokubiri Yusufu ne yeeyanjulira baganda be era nʼayanjulira Falaawo baganda be.

¹⁴Bwʼatyo Yusufu nʼatumya kitaawe, Yakobo, era nʼabʼennyumba ya kitaawe bonna be bantu nsanvu mu bataano.

¹⁵Bwʼatyo Yakobo nʼajja e Misiri era nʼafiira eyo ne bajjajjaffe.

¹⁶Oluvannyuma baaleetebwa e Sekemu mu ntaana Ibulayimu gye yali aguze omuwendo gwʼeffeeza, ku batabani ba Kamoli mu Sekemu.”

¹⁷“Ekiseera kyʼekisuubizo bwe kyagenda kisembera, Katonda kye yasuubiza Ibulayimu, abantu ne beeyongera ne baala mu Misiri.

¹⁸ⓡ Awo kabaka omulala eyali tamanyi Yusufu nʼatandika okufuga Misiri.

¹⁹Kabaka oyo nʼasalira eggwanga lyaffe amagezi, nʼabonyaabonya bajjajjaffe, ngʼabasuuza abaana baabwe abawere baleme okuba abalamu.”

²⁰“Mu biseera ebyo ne Musa nʼazaalibwa, nʼayagalwa nnyo Katonda. Bakadde be ne bamulabirira mu nnyumba yaabwe okumala emyezi esatu.

²¹Bwe yalekebwa mu mugga, muwala wa Falaawo nʼamulonda nʼamutwala nʼamulera nga mutabani we.

²²Musa nʼayigirizibwa mu magezi gonna agʼAbamisiri, nʼakula nga wʼamaanyi mu bigambo ne mu bikolwa.”

²³“Awo Musa bwe yali awezezza emyaka amakumi ana, nʼasalawo mu mutima gwe okukyalirako baganda be, abaana ba Isirayiri.

²⁴Nʼalaba Omuyisirayiri ngʼanyigirizibwa, nʼamutaasa, nʼatta Omumisiri ngʼawoolera eggwanga olwʼoyo eyali anyigirizibwa.

²⁵Musa nʼalowooza nti baganda be banaategeera nga Katonda amutumye okubalokola, naye ne batakitegeera.

²⁶Olunaku olwaddirira nʼalaba abalwana. Nʼagezaako okubatabaganya ngʼabagamba nti, ‘Abasajja lwaki mulwana nga muli baaluganda?’

²⁷“Naye oli eyali ayiikiriza munne nʼasindika eri Musa ngʼagamba nti ‘Ani eyakufuula omufuzi waffe era omulamuzi waffe?

²⁸ⓢ Oyagala kunzita nga bwe watta Omumisiri jjo?’

²⁹Musa bwe yawulira ebyo, nʼadduka nʼagenda abeera mugenyi mu nsi ya Midiyaani, era eyo nʼazaalirayo abaana aboobulenzi babiri.

³⁰ⓣ “Awo nga wayiseewo emyaka amakumi ana, Musa bwe yali ngʼali mu ddungu lyʼolusozi Sinaayi, malayika nʼamulabikira mu muliro ogwaka, wakati mu kisaka.

³¹Musa bwe yakiraba ne yeewuunya. Nʼagenda ngʼasemberera ekisaka yeetegereze, eddoboozi lya Mukama ne limugamba nti,

³²ⓤ ‘Nze Katonda wa bajjajja bo, Katonda wa Ibulayimu, ne Isaaka ne Yakobo.’ Musa nʼakankana, era nʼatasobola na kwongera kutunulayo.

³³ⓥ “Awo Mukama nʼagamba Musa nti, ‘Gyamu engatto zo, kubanga ekifo wʼoyimiridde kitukuvu.

³⁴ⓦ Ndabye okubonaabona kwʼabantu bange mu Misiri, ne mpulira nʼokusinda kwabwe. Kyenvudde nzika okubalokola. Kaakano jjangu, nkutume e Misiri.’

³⁵ⓧ “Oyo Musa gwe baagaana nga bagamba nti, ‘Ani eyakufuula omufuzi era omulamuzi waffe?’ Oyo Katonda gwe yatuma ngʼayita mu malayika eyamulabikira mu kisaka ekyʼomuliro, abeere omufuzi waabwe era omununuzi waabwe.

³⁶Oyo nʼabaggyayo ngʼamaze okukola ebyamagero nʼebyewuunyisa, mu nsi yʼe Misiri, nʼabayisa mu Nnyanja Emyufu[2], nʼabatambuza mu ddungu okumala emyaka amakumi ana.

³⁷ⓨ “Oyo ye Musa eyategeeza abaana ba Isirayiri nti, ‘Katonda agenda kubayimusiza Nnabbi ngʼamuggya mu baganda bammwe nga nze.’

³⁸Era Musa oyo ye yali ne bajjajjaffe mu ddungu nga bakuŋŋaanye nga malayika ayogera naye ku lusozi Sinaayi, era yaweebwa ebigambo ebyʼobulamu okubitutuusaako.

³⁹“Naye bajjajjaffe baagaana okumugondera, ne bamujeemera, era mu mitima gyabwe ne baddayo e Misiri.

⁴⁰ⓩ Ne bagamba Alooni nti, ‘Tukolere bakatonda abanaatukulembera, kubanga ono Musa eyatuggya mu nsi yʼe Misiri tetumanyi kyabadde.’

⁴¹Mu nnaku ezo, ne beekolera ennyana, ne bawaayo ssaddaaka eri ekifaananyi, ne basanyukira ekyo kye beekoledde nʼemikono gyabwe.

⁴²Awo Katonda nʼabavaako, nʼabawaayo okusinzanga eggye eryʼomu ggulu, nga bwe kyawandiikibwa mu kitabo kya bannabbi nti,

⁴²‘Mwandeeteranga ssaddaaka nʼebiweebwayo mu ddungu emyaka gyonna amakumi ana, ggwʼennyumba ya Isirayiri?

⁴³ⓐ Muzimbye essabo lya Moloki, ne mugulumiza emmunyeenye ya katonda wammwe Lefani, nga be bakatonda abalala be mwekolera mubasinze. Kyendiva mbawaŋŋangusa okusukka Babulooni.’

⁴⁴“Bajjajjaffe baatambula mu ddungu nga beetisse Eweema eyʼEndagaano, eyakolebwa nga Katonda bwe yalagirira Musa ngʼefaanana nga bwe yagimulaga.

⁴⁵Bajjajjaffe bajja bagisituzza abaana baabwe, okutuusa Yoswa lwe yajja nayo okulya ensi yʼabamawanga Katonda be yagobanga mu maaso ga bajjajjaffe. Eweema nʼebeerawo okutuusa ku mirembe gya Dawudi.

⁴⁶Dawudi nʼasiimibwa Katonda, era nʼasaba azimbire Katonda wa Yakobo ennyumba.

⁴⁷Naye Sulemaani ye yagizimba.

⁴⁸“Naye oyo Ali Waggulu Ennyo tabeera mu nnyumba zizimbiddwa bantu. Nga nnabbi bwʼagamba nti,

⁴⁹‘Eggulu yʼentebe yange eyʼobwakabaka. Nʼensi ke katebe kwe nteeka ebigere byange. Mukama nʼagamba nti, Ononzimbira nnyumba ya ngeri ki? Oba kifo ki mwe ndiwummulira?

⁵⁰ⓑ Omukono gwange si gwe gwakola ebyo byonna!’

⁵¹“Mmwe abalina ensingo enkakanyavu, abatakomolebwanga mu mutima wadde amatu, muwakanya Mwoyo Mutukuvu bulijjo; era bajjajjammwe nga bwe baali, nammwe bwe mutyo bwe muli.

⁵²Nnabbi ki bajjajjammwe gwe bataayigganya? Batta nʼabo abaalangirira okujja kwʼOmutuukirivu, gwe mwalyamu olukwe ne mumutta.

⁵³Mmwe mwaweebwa amateeka nga bwe gaalagirwa bamalayika naye ne mutagagondera.”

⁵⁴Awo abakulembeze bʼAbayudaaya bwe baawulira ebigambo ebyo byonna Suteefano bye yayogera, ne bajjula obusungu bungi ne bamulumira obujiji.

⁵⁵Naye Suteefano ngʼajjudde Mwoyo Mutukuvu, nʼatunuulira eggulu enkaliriza, nʼalaba ekitiibwa kya Katonda, ne Yesu ngʼayimiridde ku mukono gwa Katonda ogwa ddyo.

⁵⁶Nʼabagamba nti, “Laba, ndaba eggulu nga libikkuse, nga nʼOmwana wʼOmuntu ayimiridde ku mukono ogwa ddyo ogwa Katonda.”

⁵⁷Ne baleekaanira waggulu nga bazibikidde amatu gaabwe ne bamweyiwako.

⁵⁸Ne bamusindiikiriza ebweru wʼekibuga, ne bamukuba amayinja. Abaamukuba ne bassa eminagiro gyabwe ku bigere byʼomuvubuka erinnya lye Sawulo.

⁵⁹Awo bwe baali bakuba Suteefano amayinja, nʼakoowoola Katonda ngʼagamba nti, “Mukama wange Yesu, twala omwoyo gwange.”

⁶⁰Nʼagwa wansi ku maviivi nʼakaaba mu ddoboozi eryʼomwanguka nti, “Mukama wange, tobavunaana olwʼekibi kino.” Bwe yamala okwogera ekyo, nʼafa.