Ebikolwa by'Abatume 9:1-43 LGCB2014 - Bible AI

¹Mu kiseera ekyo Sawulo yali aswakidde ngʼayigganya abayigirizwa ba Mukama waffe ngʼabatiisatiisa okwagala okubatta, nʼatuukirira Kabona Asinga Obukulu,

²nʼamusaba awandiikire abʼomu makuŋŋaaniro agʼomu Damasiko ebbaluwa, ngʼebasaba bakolagane naye mu kuyigganya abakkiriza bonna abasajja nʼabakazi bʼalisanga eyo, abasibe mu njegere, alyoke abaleete e Yerusaalemi.

³Awo Sawulo bwe yali atambula ngʼanaatera okutuuka e Damasiko, amangwago ekitangaala ekyʼamaanyi ennyo okuva mu ggulu ne kimwakako okumwetooloola.

⁴Nʼagwa wansi, nʼawulira eddoboozi nga limugamba nti, “Sawulo! Sawulo! Onjigganyiza ki?”

⁵Sawulo nʼabuuza nti, “Ggwe ani, Mukama wange?” Eddoboozi ne limuddamu nti, “Nze Yesu gwʼoyigganya!

⁶Kale yimuka ogende mu kibuga onootegeezebwa kyʼosaanidde okukola.”

⁷Abasajja abaali ne Sawulo ne bayimirira nga basobeddwa nʼekyokwogera nga kibabuze kubanga baawulira eddoboozi ngʼeryʼomuntu naye nga tebalaba ayogera.

⁸Sawulo bwe yayimuka wansi nʼagezaako okutunula naye ngʼamaaso ge tegalaba. Era baamukwata bukwasi ku mukono okumuyingiza mu Damasiko.

⁹Nʼamalayo ennaku ssatu nga talaba era nga talya mmere wadde okunywa amazzi okumala ebbanga eryo lyonna.

¹⁰Mu Damasiko mwalimu omuyigirizwa ngʼayitibwa Ananiya. Mukama nʼayogera naye mu kwolesebwa nʼamuyita nti, “Ananiya!” Nʼaddamu nti, “Nze nzuuno, Mukama wange.”

¹¹Mukama nʼamugamba nti, “Genda ku luguudo oluyitibwa Olutereevu, onoonye ennyumba yʼomuntu omu erinnya lye Yuda, omubuuze Sawulo owʼe Taluso. Ali eyo kaakano ngʼasaba, kubanga

¹²mmulaze mu kwolesebwa omuntu ayitibwa Ananiya ngʼajja gyʼali era ngʼamussaako emikono okumusabira amaaso ge galabe.”

¹³Ananiya nʼagamba nti, “Naye Mukama wange, nga mpulidde ebintu ebitali birungi bingi nnyo omuntu oyo byʼakoze abakkiriza abali mu Yerusaalemi.

¹⁴Era tuwulira nti Yafuna nʼebbaluwa okuva eri Kabona Asinga Obukulu, ngʼemuwa obuyinza okukwata buli mukkiriza yenna ali mu Damasiko!”

¹⁵Naye Mukama nʼamugamba nti, “Ggwe genda okole kye ŋŋambye. Kubanga Sawulo mmulonze okutwala erinnya lyange eri Abaamawanga ne bakabaka, era nʼeri abaana ba Isirayiri.”

¹⁶Era nnaamulaga nga bwʼateekwa okubonaabona ku lwʼerinnya lyange.

¹⁷Bwʼatyo Ananiya nʼagenda nʼayingira mu nnyumba Sawulo mwe yali nʼamussaako emikono nʼamugamba nti, “Owooluganda Sawulo, Mukama waffe Yesu eyakulabikira mu kkubo ngʼojja antumye gyʼoli, oddemu okulaba era ojjuzibwe Mwoyo Mutukuvu.”

¹⁸Amangwago ebintu ebyali ngʼamagamba ne bigwa okuva ku maaso ga Sawulo nʼasobola okulaba, nʼayimirira nʼabatizibwa.

¹⁹Nʼalya emmere nʼafuna amaanyi. Nʼabeera wamu nʼabakkiriza mu Damasiko okumala ennaku eziwerako.

²⁰Amangwago Sawulo nʼatandika okubuulira mu makuŋŋaaniro ku Yesu nti Yesu Mwana wa Katonda.

²¹Bonna abaamuwulira ne beewuunya, ne beebuuza nti, “Si yʼono eyayigganyanga ennyo abagoberezi ba Yesu mu Yerusaalemi? Ate twawulira nga yeesonga eyamuleeta abakwate abatwale eri bakabona abakulu.”

²²Sawulo ne yeeyongera okubuulira nʼamaanyi nʼasirisa Abayudaaya abaali mu Damasiko ngʼakakasa nti Yesu ye Kristo.

²³Bwe waayitawo ebbanga, abakulembeze bʼAbayudaaya ne basala olukwe okumutta.

²⁴Sawulo nʼabaako amubuulira ku lukwe lwabwe nga bwe baali bamuteega ku miryango gyʼekibuga emisana nʼekiro bamutemule.

²⁵Awo abayigirizwa ne bamufulumya ebweru wʼekibuga mu kiro nga bamuyisa mu bbugwe, nga bamusizza mu kisero.

²⁶Bwe yatuuka e Yerusaalemi nʼagezaako okwegatta ku bayigirizwa naye bonna nga bamutya, nga tebakkiriza nti mukkiriza.

²⁷Naye Balunabba nʼamuleeta eri abatume nʼabategeeza nga Sawulo bwe yalaba Mukama mu kkubo era nʼayogera nga bwe yabuulira nʼobuvumu mu Damasiko mu linnya lya Yesu.

²⁸Ne balyoka bamukkiriza nʼabeeranga nabo, nʼayitanga nabo era ngʼalya nabo mu Yerusaalemi. Nʼabuuliranga nʼobuvumu erinnya lya Mukama waffe.

²⁹Naye ne wabaawo okuwakana nʼokukubaganya ebirowoozo wakati we nʼAbakerenisiti, ne bagezaako okumutta.

³⁰Kyokka abooluganda bwe baawulira nga Sawulo ali mu kabi bwe katyo ne bamutwala e Kayisaliya ne bamuweereza e Taluso.

³¹Mu kiseera ekyo Ekkanisa nʼeba nʼemirembe mu Buyudaaya, ne mu Ggaliraaya ne mu Samaliya; ne yeeyongera mu maanyi ne mu muwendo gwʼabantu abakkiriza. Ne bayiga okutya Mukama, era Mwoyo Mutukuvu nʼabasanyusanga.

³²Peetero nʼatambulanga mu bifo bingi; era bwe yali ngʼatambula nʼasanga abakkiriza mu kibuga ekiyitibwa Luda.

³³Eyo yasangayo omuntu erinnya lye Ayineya eyali akoozimbye ngʼamaze ku kitanda emyaka munaana nga mulwadde.

³⁴Peetero nʼamugamba nti “Ayineya! Yesu Kristo akuwonya. Golokoka weeyalire!” Amangwago nʼawonyezebwa.

³⁵Awo abantu bonna abaabeeranga mu Luda ne mu Saloni ne bakyukira Mukama, bwe baalaba nga Ayineya atambula.

³⁶Mu kibuga Yopa mwalimu omuyigirizwa ayitibwa Tabbiisa, mu Luyonaani ngʼayitibwa Doluka. Yali mukkiriza, bulijjo eyakoleranga abalala ebyekisa nʼokusingira ddala abaavu.

³⁷Mu kiseera ekyo nʼalwala nnyo era nʼafa. Ne bateekateeka omulambo gwe ne bagugalamiza mu kisenge ekya waggulu.

³⁸Naye bwe baawulira nga Peetero ali kumpi awo mu kibuga Luda ne bamutumira abasajja babiri ne bamwegayirira ajje e Yopa.

³⁹Nʼakkiriza. Amangu ddala nga yaakatuuka ne bamutwala mu kisenge ekya waggulu omulambo gwa Doluka gye gwali gugalamizibbwa. Ekisenge kyali kijjudde bannamwandu abaali bakaaba nga bwe balagaŋŋana ebyambalo Doluka bye yali abakoledde.

⁴⁰Peetero nʼabasaba bonna bafulume, nʼafukamira nʼasaba. Nʼakyukira omulambo nʼayogera nti, “Tabbiisa golokoka.” Tabbiisa nʼazibula amaaso, era bwe yalaba Peetero nʼatuula.

⁴¹Peetero nʼamukwata ku mukono amuyambe okuyimuka, nʼalyoka ayita abakkiriza ne bannamwandu, nʼabamukwasa nga mulamu.

⁴²Amawulire ago ne gayitiŋŋana mu kibuga Yopa kyonna era bangi ne bakkiriza Mukama.

⁴³Peetero nʼabeera e Yopa okumala ebbanga ddene, ngʼasula ewa Simooni omuwazi wʼamaliba.