Ebyabaleevi 14:1-57 LGCB2014 - Bible AI

¹Awo Mukama Katonda nʼagamba Musa nti,

²ⓘ “Lino lye tteeka erinaagobererwanga ku lunaku omugenge lwʼanaafuulibwanga omulongoofu mu ngeri entongole ngʼaleeteddwa eri kabona.

³Kabona anaafulumanga nʼagenda ebweru wʼolusiisira nʼakebera omuntu oyo. Awo bwʼanaasanganga ngʼobulwadde bwʼebigenge[5] bumuwonyeeko,

⁴kabona anaalagiranga okuleetera omuntu oyo agenda okufuulibwa omulongoofu, ebinyonyi bibiri ebiramu ebirongoofu, nʼomuti omwerezi, nʼoluwuzi olumyufu, nʼezobu.

⁵Kabona anaalagiranga okuttira emu ku nnyonyi ziri ebbiri waggulu wʼamazzi amalungi agali mu luggyo.

⁶Anaddiranga ennyonyi ennamu, awamu nʼomuti omwerezi, nʼoluwuzi olumyufu, nʼezobu, byonna ebyo nʼabinnyika mu musaayi gwʼennyonyi enettirwanga waggulu wʼamazzi amalungi.

⁷Anaamansiranga omusaayi emirundi musanvu ku oyo omulwadde wʼebigenge agenda okufuulibwa omulongoofu; era anaamulangiriranga nti Mulongoofu. Ekinyonyi kiri ekiramu, kabona anaakirekanga nʼekibuuka nʼekigenda.

⁸Omuntu oyo anaabanga agenda okufuulibwa omulongoofu anaayozanga engoye ze, nʼamwako enviiri ze, nʼanaaba mu mazzi, nʼabeera mulongoofu. Ebyo nga biwedde anaayingiranga mu lusiisira, naye ajjanga kumala ennaku musanvu ngʼasula bweru wa weema ye.

⁹Ku lunaku olwʼomusanvu omuntu oyo anaayongeranga okumwa ku mutwe gwe enviiri ze zonna, anaamwangako nʼebirevu bye, nʼebisige bye, nʼobwoya obulala bwonna obumwebwa. Ate anaayozanga engoye ze, nʼanaaba omubiri gwe gwonna mu mazzi, bwʼatyo nʼafuuka mulongoofu.

¹⁰“Ku lunaku olwʼomunaana anaaleetanga abaana bʼendiga abalume babiri abataliiko kamogo, nʼomwana gwʼendiga omuluusi nga gwa mwaka gumu ogwʼobukulu, nʼaleeterako nʼobuwunga obulungi obwʼemmere eyʼempeke obuweza kilo ssatu obwʼekiweebwayo, ngʼabutabudde mu mafuta, nʼaleeterako nʼebbakuli yʼamafuta agʼomuzeeyituuni eweza desimoolo ssatu eza lita.

¹¹Awo kabona owʼokulangiriranga omuntu oyo okuba omulongoofu, anaamuleetanga, awamu nʼebiweebwayo bye, awali Mukama Katonda mu mulyango gwʼEweema ya Mukama eyʼOkukuŋŋaanirangamu.

¹²Awo kabona anaddiranga omu ku baana bʼendiga omulume nʼaguwaayo awamu nʼepakuli yʼamafuta agʼomuzeeyituuni, ngʼekiweebwayo olwʼomusango, anaabiwuubanga ngʼekiweebwayo eri Mukama Katonda ekiwuubibwawuubibwa.

¹³Omwana gwʼendiga ogwo anaaguttiranga mu kifo ekitukuvu, ekiweebwayo olwʼekibi nʼekiweebwayo ekyokebwa we bittirwa. Okufaanana ngʼekiweebwayo olwʼekibi, ekiweebwayo olwʼomusango nakyo kinaabanga kya kabona; nga kitukuvu nnyo.

¹⁴Awo kabona anaatoolanga ku musaayi ogwʼekiweebwayo olwʼomusango nʼagusiiga ku lukugiro lwʼokutu okwa ddyo okwʼoyo anaabeeranga azze okufuulibwa omulongoofu, ne ku kinkumu ekyʼengalo eyʼomukono gwe ogwa ddyo, ne ku kigere ekisajja ekyʼoku kugulu kwe okwa ddyo.

¹⁵Kabona anaddiranga ku mafuta agʼomuzeeyituuni agʼomu pakuli nʼagafukako mu kibatu kyʼomukono gwe ogwa kkono,

¹⁶anannyikanga olunwe lwe olwa ddyo mu mafuta agʼomuzeeyituuni agali mu kibatu kyʼomukono gwe ogwa kkono, nʼamansira nʼolunwe lwe ku mafuta agʼomuzeeyituuni emirundi musanvu awali Mukama Katonda.

¹⁷Kabona anaddiranga agamu ku mafuta agʼomuzeeyituuni aganaabanga gasigadde mu kibatu kye nʼagasiiga ku lukugiro lwʼokutu kwʼoyo anaabeeranga azze okufuulibwa omulongoofu, ne ku kinkumu kyʼengalo eyʼomukono gwe ogwa ddyo, ne ku kigere ekisajja ekyʼoku kugulu kwe okwa ddyo, ngʼagasiiga kungulu ku musaayi ogwʼekiweebwayo olwʼomusango.

¹⁸Kabona anaddiranga amafuta agʼomuzeeyituuni aganaabanga gasigadde mu kibatu kye nʼagasiiga mu mutwe gwʼoyo ajja okufuulibwa omulongoofu, nʼamutangiririra awali Mukama.

¹⁹Kabona anaawangayo ekiweebwayo olwʼekibi, atangiririre oyo atali mulongoofu ajja okufuulibwa omulongoofu. Oluvannyuma kabona anattanga ekiweebwayo ekyokebwa,

²⁰nʼakiwaayo ku kyoto awamu nʼekiweebwayo ekyʼemmere eyʼempeke. Bwʼatyo kabona anaatangiririranga omuntu oyo, nʼafuuka mulongoofu.”

²¹“Naye omuntu oyo bwʼanaabanga omwavu ngʼebyo byonna tabisobola, anaaleetanga omwana gwʼendiga omulume gumu okuba ekiweebwayo olwʼomusango, ne kiwuubibwa okumutangiririranga, okwo nʼagattirako ne kimu kya kkumi ekya efa[6] ekyʼobuwunga obulungi ennyo obutabikiddwa mu mafuta, nga kye kiweebwayo ekyʼemmere yʼempeke, nʼagattako nʼepakuli yʼamafuta agʼomuzeeyituuni;

²²nʼamayiba abiri oba enjiibwa ento bbiri, ngʼokufuna kwe bwe kunaamusobozesanga; emu eneebanga ya kiweebwayo olwʼekibi, endala nga ya kiweebwayo ekyokebwa.

²³Ebyo byonna ebyʼokumufuula omulongoofu anaabireetanga eri kabona ku lunaku olwʼomunaana, ku mulyango gwʼEweema ya Mukama eyʼOkukuŋŋaanirangamu, awali Mukama.

²⁴Kabona anaddiranga omwana gwʼendiga ogwʼekiweebwayo olwʼomusango, nʼepakuli yʼamafuta agʼomuzeeyituuni, nʼabiwuuba nga kye kiweebwayo ekiwuubibwawuubibwa awali Mukama.

²⁵Kabona anattanga omwana gwʼendiga ogwʼekiweebwayo olwʼomusango; nʼaddira ogumu ku musaayi ogwʼekiweebwayo olwʼomusango, nʼagusiiga ku lukugiro lwʼokutu okwa ddyo okwʼoyo anaabanga azze okufuulibwa omulongoofu, era ne ku kinkumu ekyʼengalo eyʼomukono gwe ogwa ddyo, ne ku kigere ekisajja ekyʼoku kugulu kwe okwa ddyo.

²⁶Kabona anaafukanga agamu ku mafuta mu kibatu kyʼomukono gwe ogwa kkono,

²⁷nʼamansira nʼolunwe lwe olwa ddyo agamu ku mafuta ago agali mu kibatu kyʼomukono gwe ogwa kkono, emirundi musanvu awali Mukama.

²⁸Era kabona anaasiiganga agamu ku mafuta agʼomuzeeyituuni agali mu kibatu kyʼomukono gwe ku lukugiro lwʼokutu okwa ddyo okwʼoyo anaabanga azze okufuulibwa omulongoofu, ne ku kinkumu ekyʼengalo eyʼomukono gwe ogwa ddyo, ne ku kigere ekisajja ekyʼoku kugulu kwe okwa ddyo, ngʼagasiiga kungulu ku musaayi ogwʼekiweebwayo olwʼomusango.

²⁹Kabona anaddiranga amafuta agʼomuzeeyituuni aganaabanga gasigadde mu kibatu kye, nʼagasiiga ku mutwe gwʼoyo anaabanga azze okufuulibwa omulongoofu, okumutangiririra eri Mukama.

³⁰Era anaawangayo, ngʼobusobozi bwe gye bunaakomanga, amayiba oba enjiibwa ento,

³¹ekinyonyi ekimu ngʼekiweebwayo olwʼekibi nʼekyokubiri ngʼekiweebwayo ekyokebwa, ngʼagattirako nʼekiweebwayo ekyʼemmere eyʼempeke. Kabona anaamutangiririranga oyo anaabanga azze okufuulibwa omulongoofu eri Mukama.

³²Ago ge mateeka aganaagobererwanga omuntu omugenge anaabanga tasobola biweebwayo ebya bulijjo, alyoke afuuke omulongoofu.”

³³Mukama nʼagamba Musa ne Alooni nti,

³⁴“Bwe muliyingira mu nsi ya Kanani gye mbawadde okugirya, ne musanga nga ntadde ebigenge mu emu ku nnyumba ezʼomu nsi eyo,

³⁵kale, oyo anaabanga nannyini nnyumba eyo anajjanga nʼategeeza kabona nti, ‘Mu nnyumba yange mufaanana ngʼomuli obulwadde.’

³⁶Kabona anaalagiranga ne bafulumya ebintu byonna ebiri mu nnyumba ne babimalamu, nga tannaba kuyingiramu kukebera obulwadde obwo nga bwe buli, si kulwa nga byonna ebiri mu nnyumba biyitibwa ebitali birongoofu. Ekyo nga kiwedde kabona anaayingiranga mu nnyumba nʼagikebera.

³⁷Anaanoonyanga obulwadde we buli; bwʼanaabusanganga ku bisenge byʼennyumba eyo, nga kuliko amabala aga kiragalalagala oba amamyukirivu, era nga galabika gayingidde munda mu mubiri gwʼekisenge,

³⁸olwo kabona anaafulumanga mu nnyumba eyo, nʼagiggala okumala ennaku musanvu.

³⁹Ku lunaku olwʼomusanvu kabona anaakomangawo nʼakebera ennyumba eyo. Bwʼanaasanganga ngʼobulwadde busaasaanidde ku bisenge byʼennyumba eyo,

⁴⁰kale, anaalagiranga ne basokoola mu bisenge amayinja gonna agaliko obulwadde ne bagasuula ebweru wʼekibuga mu kifo ekitali kirongoofu.

⁴¹Era anaalagiranga ebisenge byonna ebyʼomu nnyumba eyo ne bikalakatibwa, ebintu byonna ebikalakatibbwako ne bisuulibwa ebweru wʼekibuga mu kifo ekitali kirongoofu.

⁴²Era banaddiranga amayinja amalala ne bagazimba mu bifo byʼagali agaggyibwamu, ne batabula bulungi omusenyu, ennyumba yonna nʼekubibwa omusenyu.

⁴³“Singa obulwadde buddamu okuzuuka, oluvannyuma lwʼennyumba okugiggyamu amayinja gali, nʼokugikalakata era nʼokugikubako omusenyu omuggya,

⁴⁴kale, kabona anaagendangayo ne yeetegereza; bwʼanaasanganga ngʼobulwadde busaasaanye mu nnyumba, ngʼebyo bigenge bye biri mu nnyumba, era nga si nnongoofu.

⁴⁵Anaalagiranga ennyumba eyo nʼemenyebwawo, amayinja gaayo nʼembaawo zaayo nʼomusenyu ogwagikubwako, byonna binaasitulwanga ne bisuulibwa ebweru wʼekibuga mu kifo ekitali kirongoofu.

⁴⁶Ennyumba eyo bwʼeneebanga tennamenyebwawo, omuntu yenna anaayingiranga mu nnyumba eyo mu kiseera kyʼeneemalanga nga nzigale anaabanga si mulongoofu okutuusa akawungeezi.

⁴⁷Nʼomuntu yenna anaasulanga mu nnyumba eyo oba anaaliirangamu, anaayozanga engoye ze.

⁴⁸“Naye kabona bwʼanajjanga nʼakebera mu nnyumba eyo ngʼemaze okukubibwako omusenyu, nʼasanga ngʼobulwadde tebwasaasaana; kale, kabona anaalangiriranga ngʼennyumba eyo bwʼeri ennongoofu, kubanga olwo ngʼobulwadde bugenze.

⁴⁹Okufuula ennyumba ennongoofu kabona anaddiranga ebinyonyi bibiri nʼakabaawo kʼomuti omwerezi, nʼekiwero ekimyufu nʼezobu.

⁵⁰Anattiranga ekimu ku binyonyi mu mazzi amalungi mu kibya ekyʼebbumba.

⁵¹Awo anaddiranga akabaawo kʼomuti omwerezi nʼezobu, nʼekiwero ekimyufu, nʼekinyonyi ekikyali ekiramu, nʼabinnyika mu musaayi gwʼekinyonyi ekyattiddwa ne mu mazzi amalungi, nʼalyoka amansira ennyumba yonna emirundi musanvu.

⁵²Ennyumba anaagifuulanga ennongoofu nʼomusaayi gwʼakanyonyi, nʼamazzi amalungi, nʼakanyonyi akalamu, nʼakabaawo kʼomuti omwerezi, nʼezobu nʼekiwero ekimyufu.

⁵³Awo nʼafulumya ekinyonyi ekiramu ebweru wʼekibuga nʼakiteera eyo ne kibuuka ne kigenda. Mu ngeri eyo anaatangiririranga ennyumba eyo era eneebanga nnongoofu.”

⁵⁴Ago ge mateeka aganaagobererwanga ku bulwadde bwʼebigenge, omubiri ogusiiwa,

⁵⁵ebigenge mu ngoye oba mu nnyumba,

⁵⁶oba okubutukabutuka, oba obutulututtu,

⁵⁷okusinziirako okutegeera obanga ekintu kirongoofu oba si kirongoofu. Ago ge mateeka ku bigenge.