Ebyabaleevi 18:1-30 LGCB2014 - Bible AI

¹Awo Mukama Katonda nʼagamba Musa nti,

²“Tegeeza abaana ba Isirayiri nti, ‘Nze Mukama Katonda wammwe.

³Temusaana kweyisanga mu bikolwa byammwe ngʼabʼomu Misiri, gye mwabeeranga, bwe beeyisa, era temusaana kweyisanga ngʼabʼomu Kanani, gye mbatwala, bwe beeyisa. Temutambuliranga mu mateeka gaabwe.

⁴Munaagonderanga ebiragiro byange, munaakwatanga amateeka gange, era mwe munaatambuliranga. Nze Mukama Katonda wammwe.

⁵ⓛ Mugonderenga ebiragiro byange awamu nʼamateeka gange, kubanga buli muntu anaabikwatanga mu byo mwanaatambulizanga obulamu bwe. Nze Mukama Katonda.

⁶“ ‘Tewabanga omuntu yenna mu mmwe ajja eri munne gwʼalinako oluganda ne yeebaka naye. Nze Mukama.

⁷“ ‘Toleeteranga kitaawo buswavu ngʼokola ebyensonyi ne nnyoko. Oyo ye maama wo eyakuzaala, teweebakanga naye ne mukola ebyensonyi, nʼomuleetako obuswavu.

⁸“ ‘Teweebakanga na muka kitaawo ne mukola ebyensonyi, ekyo kireetera kitaawo obuswavu ne kimumalamu ekitiibwa.

⁹“ ‘Teweebakanga na mwannyoko, azaalibwa kitaawo, oba azaalibwa nnyoko, ne bwe muba nga mwakulira mu maka gamu oba nga temwakulira wamu, tomukolangako bya nsonyi okumuleetera obuswavu.

¹⁰“ ‘Teweebakanga na muwala azaalibwa mutabani wo, oba muwala wʼomwana wo omuwala, nʼokola naye ebyensonyi; ekyo ne kikuleetako obuswavu.

¹¹“ ‘Teweebakanga na mwana wa muka kitaawo owʼobuwala eyazaalibwa kitaawo nʼomukolako ebyensonyi; oyo mwannyoko. Tomuleeteranga bya buswavu.

¹²“ ‘Teweebakanga na mwannyina wa kitaawo nʼokola naye ebyensonyi; oyo ne kitaawo ba musaayi gwe gumu.

¹³“ ‘Teweebakanga na muwala bwe bazaalibwa ne nnyoko nʼokola naye ebyensonyi; kubanga oyo ne nnyoko ba musaayi gwe gumu.

¹⁴“ ‘Toweebuulanga muganda wa kitaawo, ngʼolaga eri mukazi we weebake naye mukole ebyensonyi; oyo maama wo omuto.

¹⁵“ ‘Teweebakanga na muka mutabani wo ne mukola ebyensonyi; kubanga oyo ye mukyala wa mutabani wo; tomuleeteranga bya buswavu.

¹⁶“ ‘Teweebakanga na muka muganda wo ne mukola ebyensonyi, kubanga ekyo kinaaleeteranga muganda wo obuswavu.

¹⁷“ ‘Teweebakanga na mukazi ate ne muwala we nʼokola nabo ebyensonyi. Era teweebakanga na mwana muwala owa mutabani wa mukazi oyo oba na mwana muwala owa muwala we; kubanga abo ba musaayi gwe gumu nʼogwʼomukazi oyo. Ekyo kibi kinene.

¹⁸“ ‘Toleetanga mukazi nga muganda wa mukyala wo ne badda mu kuvuganya, era ne weebaka naye ne mukola ebyensonyi nga mukyala wo akyali mulamu.

¹⁹“ ‘Tosembereranga mukazi ngʼoyagala weebake naye omukoleko ebyensonyi ngʼali mu kiseera kye ekya buli mwezi ekyʼokuvaamu omusaayi mwʼabeerera atali mulongoofu.

²⁰“ ‘Teweebakanga na mukyala wa munnansi yammwe okumukolako ebyensonyi, nʼakuleetera obutali bulongoofu.

²¹“ ‘Mu baana bo towangayo nʼomu ngʼekiweebwayo ekyokeddwa mu muliro eri Moleki, kubanga erinnya lya Katonda wo tosaanira kuliweebuulanga. Nze Mukama.

²²ⓜ “ ‘Teweebakanga na musajja nga bwe wandyebase nʼomukazi, ekyo kibi ekikyayibwa ennyo.

²³“ ‘Tokolanga byansonyi ku nsolo kubanga ekyo kinaakufuulanga atali mulongoofu. Omukazi teyeewangayo eri ensolo emukoleko ebyensonyi, okwo kwe kuwabira ddala.

²⁴“ ‘Temwereetangako obutali bulongoofu nga mugoberera amayisa ago amabi; kubanga nʼamawanga ge ŋŋenda okugoba mu nsi mwe mujja okuyingira bwe geefuula bwe gatyo agatali malongoofu;

²⁵nʼensi nʼefuuka etali nnongoofu, ne ngibonereza olwʼebyonoono byayo, nʼabantu baamu abagibeeramu nʼebasesema.

²⁶Naye mmwe mukuumenga ebiragiro byange nʼamateeka gange. Abazaaliranwa ne bannamawanga abali mu mmwe tewabanga nʼomu anaakolanga ku bintu ebyo nʼakatono ebikyayibwa ennyo bwe bityo.

²⁷Kubanga ebintu ebyo byonna byakolebwanga abantu abaabasooka mmwe okubeera mu nsi omwo, ensi nʼefuuka etali nnongoofu.

²⁸Ensi eyo bwe muligifuula etali nnongoofu, egenda kubasesema nga bwe yasesema amawanga agaabasooka okugibeeramu.

²⁹“ ‘Abantu bonna abanaakolanga ebintu ebyo ebibi ebikyayibwa ennyo, abantu ngʼabo banaagobwanga ne bagaanibwa okukolagana ne bannaabwe.

³⁰Mukwatenga amateeka gange, nga mwewalanga okukola ebyonoono ebyo ebikyayibwa ebyʼamayisa amabi, abo abaabasooka ge beeyisanga si kulwa nga gabafuula abatali balongoofu. Nze Mukama Katonda wammwe.’ ”