Ebyabaleevi 2:1-16 LGCB2014 - Bible AI

¹“Omuntu yenna bwʼanaaleetanga eri Mukama ekiweebwayo ekyʼemmere eyʼempeke; empeke anaamalanga kuzisa, nʼaleeta obuwunga obulungi. Anaabufukangako amafuta agʼomuzeeyituuni, nʼateekako nʼobubaane,

²nʼalyoka abuleetera batabani ba Alooni, bakabona. Kabona anaayoolanga olubatu lwʼobuwunga obulimu amafuta agʼomuzeeyituuni nʼobubaane, nʼabwokya mu kyoto ngʼekijjukizo, nga kye kiweebwayo ekyokeddwa mu muliro ne kivaamu evvumbe eddungi erisanyusa Mukama.

³Obuwunga obunaasigalangawo ku kiweebwayo, bunaatwalibwanga Alooni ne batabani be, nga kye kitundu ekitukuvu ennyo ekyʼekiweebwayo eri Mukama ekyokeddwa mu muliro.

⁴“Bwʼonooleetanga emigaati egifumbiddwa mu oveni nga kye kiweebwayo, ginaabanga emigaati egikoleddwa mu buwunga obulungi nga mutabuddwamu nʼamafuta agʼomuzeeyituuni nga tegiriimu kizimbulukusa, oba bunaabanga obusukuuti obwʼoluwewere obutaliimu kizimbulukusa nga busiigiddwako amafuta agʼomuzeeyituuni.

⁵Ekiweebwayo kyo bwe kinaabanga ekyʼemmere eyʼempeke nga kitegekeddwa ku lukalango, kinaakolebwanga mu buwunga obulungi obutaliimu kizimbulukusa nga butabuddwamu amafuta agʼomuzeeyituuni.

⁶Onookimenyaamenyanga mu butundutundu, nʼokifukako amafuta agʼomuzeeyituuni. Ekyo kye kiweebwayo ekyʼemmere eyʼempeke.

⁷Ekiweebwayo kyo bwe kinaabanga ekyʼemmere eyʼempeke nga kyakufumbirwa mu fulampeni, kinaateekebwateekebwanga mu buwunga obulungi nʼamafuta agʼomuzeeyituuni.

⁸Onooleeteranga Mukama ekiweebwayo ekyo ekyʼemmere eyʼempeke ekitabuddwa mu bintu ebyo; bwe kinaakwasibwanga kabona, ye anaakireetanga ku kyoto.

⁹Awo kabona anaggyanga ku kiweebwayo ekyʼemmere eyʼempeke, ekitundu ekyʼekijjukizo kyakyo, nʼakyokya ku kyoto, nga kye kiweebwayo ekyokeddwa mu muliro ne kivaamu evvumbe eddungi erisanyusa Mukama.

¹⁰Era ekinaafikkanga ku kiweebwayo ekyʼemmere eyʼempeke, Alooni ne batabani be, be banaakitwalanga; nga kye kitundu ekitukuvu ennyo ekibalirwa ku biweebwayo eri Mukama ekyokeddwa mu muliro.”

¹¹“ ‘Temuleeteranga Mukama ekiweebwayo ekyʼemmere eyʼempeke nga kiteekeddwamu nʼekizimbulukusa; kubanga temuuyokyenga kizimbulukusa wadde omubisi gwʼenjuki ngʼekiweebwayo eri Mukama ekyokeddwa mu muliro.

¹²Munaabireetanga eri Mukama ngʼebiweebwayo ebyʼebibala ebibereberye, naye tebiiweerwengayo ku kyoto okubeera evvumbe eddungi erisanyusa Mukama.

¹³Ebiweebwayo byo byonna ebyʼemmere eyʼempeke onoobirungangamu omunnyo[2]: tokkirizanga munnyo ogwʼendagaano ne Katonda wo okubula mu biweebwayo byo ebyʼemmere eyʼempeke; mu biweebwayo byo byonna ossangamu omunnyo.

¹⁴“ ‘Bwʼonooleetanga eri Mukama ebiweebwayo ebyʼebibala ebibereberye ebyʼemmere eyʼempeke, binaabanga ebirimba ebibisi ebibereberye ebyʼemmere eyʼempeke nga bibetenteddwa era nga byokeddwako mu muliro.

¹⁵Onoobifukangako amafuta agʼomuzeeyituuni, nʼobiteekangako nʼobubaane; ekyo nga kye kiweebwayo ekyʼemmere eyʼempeke.

¹⁶Awo kabona anaggyanga ku kiweebwayo ekyʼemmere eyʼempeke, ekimaze okubetentebwa nga mulimu amafuta agʼomuzeeyituuni nʼobubaane, ekitundu ekyʼekijjukizo kyakyo, nʼakyokya; ekyo nga kye kiweebwayo eri Mukama ekyokeddwa mu muliro.