Ebyabaleevi 25:1-55 LGCB2014 - Bible AI

¹ⓢ Mukama Kaonda yagamba Musa ku lusozi Sinaayi nti,

²“Tegeeza abaana ba Isirayiri nti Bwe mutuukanga mu nsi gye mbawa, ensi yennyini eneekuumiranga Mukama Katonda ssabbiiti.

³Okumala emyaka mukaaga ennimiro zammwe munaazisigangamu emmere, era mu myaka egyo omukaaga munaasaliranga emizabbibu gyammwe nʼebibala ne mubikungula.

⁴Naye mu mwaka ogwʼomusanvu ettaka lyʼensi eyo linaabanga ne ssabbiiti eyʼokuwummula eri Mukama Katonda. Temusiganga mmere mu nnimiro zammwe wadde okusalira emizabbibu gyammwe.

⁵Ebimera ebyekuzizza byokka, ebimererezi, temubikungulanga wadde okunoga ebibala ku mizabbibu gyammwe egitaasalirwa. Omwaka ogwo ettaka lyʼensi linaaguwummulanga.

⁶Ebyo byonna ebyokulya ebinaavanga mu ttaka mu mwaka ogwa ssabbiiti yaalyo binaabanga mmere yammwe, mmwe bennyini, nʼeri abaddu bammwe abasajja, nʼabakazi, era nʼabaweereza bammwe abʼempeera, nʼabagenyi abanaabanga basula mu maka gammwe;

⁷era nʼente zammwe nʼensolo ezʼomu nsiko ezinaabanga ku ttaka lyammwe. Buli ekyokulya ekinaakuliranga ku ttaka eryo kinaabanga mmere.

⁸“Munaabaliriranga essabbiiti musanvu ezʼomu myaka, kwe kugamba nti Musanvu emirundi emyaka musanvu. Bwe kityo ekiseera kyonna ekya ssabbiiti ezo ne kiba emyaka amakumi ana mu mwenda.

⁹Ekkondeere eryʼokujaguza munaalifuuyiranga wonna wonna ku lunaku olwʼekkumi mu mwezi ogwʼomusanvu ku Lunaku olwʼOkutangiririrwa, ekkondeere munaalifuuyiranga mu nsi yammwe yonna.

¹⁰Munaatukuzanga omwaka ogwʼamakumi ataano, era munaalangiriranga ebiseera ebyʼeddembe eri abatuuze bonna mu ggwanga lyammwe. Omwaka ogwo gunaabanga gwa kujaguza gwa Jjubiri[11] gye muli; buli omu anaddangayo mu kifo kye ekyʼobwannannyini, era buli omu anaddangayo mu kika kye.

¹¹Omwaka ogwʼamakumi ataano gunaabanga gwa kujaguza gwa Jjubiri gye muli; mu mwaka ogwo temuusigenga era temuukungulenga bikuze ku bimererezi newaakubadde okukuŋŋaanya ebibala ebyʼoku mizabbibu egitali misalire.

¹²Kubanga ekiseera ekyo kya kujaguza kya Jjubiri era kinaabanga kitukuvu gye muli; mulyenga ebyo byokka bye munaggyanga mu nnimiro.

¹³“Mu mwaka ogwo ogwʼokujaguza ogwa Jjubiri buli omu anaddangayo mu kifo kye ekyʼobwannannyini.

¹⁴Era bwe munaatunzanga bannammwe ekintu kyonna oba bwe munaagulanga ku bannammwe ekintu kyonna, temuseeragananga.

¹⁵Munnansi munno onoomugulangako ngʼosinziira ku myaka egyakayitawo okuva ku kujaguza ku Jjubiri. Era naye anaakutunzanga ngʼasinziira ku myaka egibulayo okutuuka ku makungula gʼebibala.

¹⁶Emyaka bwe ginaabanga emingi, omuwendo ogulamulwa munaagwongezanga, naye emyaka bwe ginaabanga emitono munaagukendeezanga, kubanga obungi bwʼebikungulwa, bwʼogula ku mutunzi.

¹⁷Temuseeragananga; mutyanga Katonda wammwe, kubanga Nze Mukama Katonda wammwe.

¹⁸“Mugonderenga ebiragiro byange, era mukwatenga amateeka gange, bwe mutyo munaatuulanga nʼemirembe mu nsi yammwe.

¹⁹Ensi eneebaleeteranga ebibala byayo, ne mulya ne mukkuta ne mutuulamu nʼemirembe.

²⁰Muyinza okubuuza nti, ‘Bwe tutaasigenga era ne tutakungulanga, kale mu mwaka ogwʼomusanvu tunaalyanga ki?’

²¹Mu mwaka ogwʼomukaaga ndibayiwako omukisa gwange ogulireetera ensi yammwe ebibala ebirimala emyaka esatu.

²²Bwe munaabanga musiga mu mwaka ogwʼomunaana, munaabanga mulya ku bibala ebikadde bye mwatereka, okutuusa nga mukungudde ebibala ebyʼomwaka ogwʼomwenda.

²³Ettaka teriitundibwenga kagenderere, kubanga ensi yange; mwe muli bayise era abasuze obusuze.

²⁴Buli kitundu kya nsi kye munaalyanga, bwe mutundanga ettaka mwerekerangawo omwagaanya ogwʼokulinunulayo gye mulitunze.

²⁵“Munnansi munnammwe bwʼanaayavuwalanga, nʼatunda ebimu ku bintu bye, muganda we owʼokumpi mu luganda anajjanga nʼanunula ebyo munnansi munne byʼatunze.

²⁶Omuntu bwʼanaabanga talina anaabimununulira, naye ye ku bubwe ngʼagaggawadde, era ngʼafunye obusobozi obwʼokubinunula,

²⁷anaabaliriranga omuwendo gwʼensimbi oguli mu myaka kasookedde abitunda, nʼabala nʼomuwendo ogugya mu myaka egisigaddeyo okutuuka ku Jjubiri, nʼagusasula omuntu gwe yaguza ebintu ebyo, olwo eyatunda aneddirangayo mu bintu bye.

²⁸Naye singa alemwa okufuna obusobozi okumusasula, kale ebyo bye yatunda binaasigalanga mu mukono gwʼeyabigula nga ye nannyini byo okutuusa mu Mwaka gwa Jjubiri. Binamuddizibwanga mu Jjubiri, era anaayinzanga okweddirayo mu bintu bye.

²⁹“Omuntu bwʼanaatundanga ennyumba esulwamu eri mu kibuga ekyetooloddwa bbugwe, anaayinzanga okuginunula mu mwaka nga tegunaggwaako. Mu bbanga eryo eryʼomwaka omulamba mwʼanaabeereranga nʼobuyinza obwʼokuginunula.

³⁰Ennyumba eyo eri mu kibuga ekyetooloddwa bbugwe bwʼeteenunulibwenga mu bbanga eryʼomwaka ogumu, kale eneebeereranga ddala yʼoyo eyagigula nʼezzadde lye. Eyagitunda teemuddizibwenga mu Jjubiri.

³¹Naye amayumba agʼomu bubuga obutono obwʼomu byalo obuteetooloddwako bisenge, ganaabalirwanga mu ttuluba lye limu nʼeryʼennimiro eziri mu byalo. Ganaanunulibwanga era ne gaddira bannyinigo mu Jjubiri.

³²“Bulijjo Abaleevi banaabanga ba ddembe okununula amayumba gaabwe agali mu bibuga byabwe ebyʼAbaleevi bye balinako obwannannyini.

³³Era Omuleevi bwʼanaabanga takozesezza ddembe lye eryʼokununula, kale ennyumba eyatundirwa mu kibuga Abaleevi kye balinako obwannannyini, eneemuddiranga mu Jjubiri; kubanga mu bantu ba Isirayiri ennyumba eziri mu bibuga byʼAbaleevi za Baleevi.

³⁴Naye ennimiro eziri ku ttaka lya wamu eryʼebibuga byabwe teziitundibwenga; kubanga ezo zaabwe za bwannannyini obwʼolubeerera.

³⁵ⓣ “Munnansi munnammwe bwʼanaayavuwalanga ngʼali wamu nammwe, nga takyasobola kwefunira buyambi, mubeerenga naye nga mumulabirira nga bwe mwandirabiridde omunnaggwanga oba omusuze obusuze ali mu mmwe.

³⁶Mutyenga Katonda wammwe. Munnammwe temumuggyangako magoba ku kintu kyonna kye munaabanga mumuwoze, bwʼatyo munnammwe oyo alyoke abeerenga mu mmwe.

³⁷Bwʼomuwolanga ensimbi azzengawo omuwendo gwennyini gwʼomuwoze so tasukkirizangamu. Era bwʼomuguzanga emmere tossangamu magoba.

³⁸Nze Mukama Katonda wammwe eyabaggya mu nsi eyʼe Misiri okubawa ensi ya Kanani nʼokubeera Katonda wammwe.

³⁹“Era munnansi munnammwe bwʼanaayavuwalanga ngʼali nammwe, ne yeetunda gye muli, temumukozesanga nga muddu.

⁴⁰Munaamukozesanga ngʼomupakasi owʼempeera oba ngʼomusuze obusuze, ngʼali nammwe. Anaabaweerezanga okutuusa mu Mwaka gwa Jjubiri.

⁴¹Kale nno, olwo anaalekebwanga nʼaddayo ewaabwe, ye nʼabaana be, mu kika kye ku butaka bwa bakadde be.

⁴²Kubanga baweereza bange be naggya mu nsi yʼe Misiri; tebaatundibwenga ngʼabaddu.

⁴³Temubafugisanga bukambwe, naye mutyenga Katonda wammwe.

⁴⁴Abaddu bammwe abasajja nʼabaddu bammwe abakazi munaabaggyanga mu mawanga agabeetoolodde, mu mawanga ago mwe muneeguliranga abaddu abasajja nʼabaddu abakazi.

⁴⁵Era munaayinzanga okwegulira ku bannamawanga abali nammwe abasuze obusuze, ne ku baana baabwe abanaazaalirwanga mu nsi yammwe; abo banaabanga nvuma zammwe.

⁴⁶Munaayinzanga okulaamira batabani bammwe abalibagoberera envuma ezo ngʼobusika bwabwe obwʼemirembe gyonna. Naye Bayisirayiri bannammwe temubafugisanga bukambwe.

⁴⁷“Omunnaggwanga oba omusuze obusuze ali nammwe bwʼanaagaggawalanga, naye munnansi munnammwe bwe babeera nʼayavuwala, ne yeetunda eri munnaggwanga oba eri omusuze obusuze ali nammwe, oba eri omu ku bʼomu luggya lwa munnaggwanga,

⁴⁸anaayinzanga okununulibwa, ngʼamaze okwetunda. Omu ku baganda be anayinzanga okumununula:

⁴⁹Taata we oba mutabani wa taata we, oba owooluganda omulala owʼokumpi mu buzaale owʼomu kika kye anaayinzanga okumununula. Oba ye bwʼanaagaggawalanga anaayinzanga okwenunula.

⁵⁰Ye nʼoli eyamugula bajjanga kubalirira ebbanga okuva mu mwaka gwe yeetundiramu okutuuka ku Mwaka gwa Jjubiri. Omuwendo ogwʼokununulibwa guneesigamizibwanga ku muwendo gwʼemyaka egibaliriddwa; ebbanga lye yamala nʼeyamugula linaageraageranyizibwanga nʼebbanga eryʼomupakasi asasulwa empeera.

⁵¹Mu kubalirira kwabwe bwe kinaazuukanga ngʼekyasigaddeyo emyaka mingi okutuuka ku Jjubiri, ku muwendo gwe yeetunda anaasasulangako omuwendo munene olwʼokwenunula.

⁵²Naye bwʼeneebanga esigaddeyo emyaka mitono, egyo gyʼanaabalirirangamu ensimbi zaamu nʼasasula ezo nga bwe kyetaagisa olwʼokwenunula.

⁵³Oyo eyagula munne anaamuyisanga ngʼomupakasi amukolera mu kupatana okwa buli mwaka. Temulekanga oyo eyagula munne okumutuntuzanga nga nammwe mulaba.

⁵⁴Bwʼanaabanga tanunulibbwa mu zimu ku ngeri ezo, ye nʼabaana be banaanunulibwanga mu Mwaka gwa Jjubiri.

⁵⁵Kubanga abaana ba Isirayiri bantu bange, abaweereza bange be naggya mu nsi eyʼe Misiri. Nze Mukama Katonda wammwe.