Ebyabaleevi 27:1-34 LGCB2014 - Bible AI

¹Awo Mukama nʼagamba Musa nti,

²“Yogera eri abaana ba Isirayiri obagambe nti: Omuntu bwʼanaakolanga obweyamo obwʼenjawulo obwʼokuwaayo abantu eri Mukama naye ngʼasasulayo miwendo egibagyamu, onoobasaliranga bwʼoti:

³omusajja aweza emyaka egyʼobukulu egiri wakati wʼamakumi abiri nʼenkaaga anaaleetanga sekeri za ffeeza amakumi ataano[12], nga sekeri zʼomu watukuvu bwe ziba,

⁴naye bwʼanaabanga omukazi onoomusaliranga sekeri amakumi asatu[13].

⁵Omuntu aweza emyaka egyʼobukulu egiri wakati wʼettaano nʼamakumi abiri, bwʼanaabanga omusajja onoomusaliranga sekeri amakumi abiri[14] naye omukazi sekeri kkumi[15].

⁶Bwʼanaabanga omwana ngʼali wakati wʼomwezi gumu nʼemyaka etaano, onoomusaliranga sekeri ttaano[16] eza ffeeza nga mulenzi, naye omuwala sekeri za ffeeza ssatu[17].

⁷Omuntu bwʼanaabanga owʼemyaka egyʼobukulu nkaaga nʼokusingawo, omusajja onoomusaliranga sekeri kkumi na ttaano[18] nʼomukazi sekeri kkumi.

⁸Omuntu eyakola obweyamo bwʼanaabanga omwavu ennyo atasobola kuleeta miwendo egyo gye wamusalira, anaayanjulwanga eri kabona; kale kabona anaamusaliranga omuwendo ogumugyamu ngʼageraageranya obusobozi bwʼoyo eyeeyama nga bwe bunaabanga.

⁹“Obweyamo bwʼomuntu bwe bunaabeeranga obwʼekisolo ekikkirizibwa ngʼekiweebwayo eri Mukama Katonda, ekisolo ngʼekyo ekiweebwayo eri Mukama Katonda kinaabanga kitukuvu.

¹⁰Tasaaniranga kukikyusaamu oba kukiwaanyisaamu ekibi mu kirungi wadde ekirungi mu kibi; bwʼanaabanga awaanyisizza ekisolo ekimu mu kirala, byombi kino na kiri kyʼawanyisizzaamu binaafuukanga bitukuvu.

¹¹Ensolo omuntu gyʼanaabanga yeeyamye bwʼeneebanga etali nnongoofu[19], etakkirizibwa ngʼekiweebwayo eri Mukama Katonda, ensolo eyo esaanira okuleetebwanga eri kabona,

¹²ye alyokenga asalewo nga bwʼeri, oba nnungi oba mbi. Omuwendo kabona gwʼanaabaliriranga ku nsolo eyo, gwe gunaawebwangayo.

¹³Nannyini nsolo bwʼanaabanga ayagala okuginunulayo, anaasaniranga okugattako ekitundu ekimu ekyokutaano ku muwendo gwayo.

¹⁴“Omusajja bwʼanaawangayo ennyumba ye okubeera entukuvu eri Mukama Katonda kabona anaagirabiranga omuwendo ogugigyamu, oba nnungi oba mbi. Omuwendo ogwo kabona gwʼanaasalanga gwe gunaakolanga.

¹⁵Oyo anaawangayo ennyumba ye eri Mukama bwʼanaabanga ayagala okuginunula, anaayongerangako ekitundu kimu kyakutaano ku muwendo gwayo, olwo ngʼennyumba emuddira.

¹⁶“Omusajja bwʼanaawangayo ekitundu kyʼettaka lye, lye yasikira, eri Mukama Katonda, omuwendo oguligyamu gunaabalirirwanga nga gwesigamizibwa ku bungi bwʼensigo ezeetaagibwa okusiga ku ttaka eryo ne ziggweerako; ensigo za sayiri ezipimibwamu oma zinaabalirirwangamu sekeri[20] za ffeeza amakumi ataano.

¹⁷Singa ennimiro ye, agiwaayo mu biseera byʼOmwaka gwa Jjubiri, omuwendo ogubaliriddwa gunaasigalanga nga bwe guli.

¹⁸Naye bwʼanaawangayo ennimiro ye nga Jjubiri eweddeko, kabona anagibalirirangamu omuwendo ngʼagwesigamya ku myaka eginaabanga gibulayo Omwaka gwa Jjubiri eddirira gulyoke gutandike, nʼomuwendo ogwali gubaliriddwa gunaakendeezebwangako.

¹⁹Era oyo anaabanga awaddeyo ennimiro ye bwʼanaayagalanga okuginunula, kale anaagattangako ekitundu kimu kyakutaano ku muwendo gwayo, olwo ennimiro nʼemuddira.

²⁰Naye bwʼanaabanga tayagala kununula nnimiro eyo, oba bwʼanaabanga agiguzizza omuntu omulala, kale ngʼolwo tekyanunulibwa nʼakamu.

²¹Naye mu Mwaka gwa Jjubiri ennimiro eyo bwʼeneeteebwanga, eneebanga ntukuvu eri Mukama, ngʼennimiro eyawongebwa ewa Mukama; eneebanga ya kabona.

²²“Omusajja bwʼanaawangayo eri Mukama Katonda ennimiro gye yagula, etali ku ttaka lye eryʼobwannannyini,

²³kabona anaabaliriranga omuwendo ogugigyamu okutuuka ku mwaka gwa Jjubiri, omusajja anaasasulanga omuwendo ogwo ku lunaku olwo ngʼekintu ekitukuvu eri Mukama Katonda.

²⁴Mu mwaka gwa Jjubiri, ennimiro eneddizibwanga oyo gwe yagigulako, nga yʼoyo eyali nannyini ttaka.

²⁵Buli muwendo ogubalirirwa guneesigamizibwanga ku sekeri zʼAwatukuvu, nga gera[21] amakumi abiri zivaamu sekeri emu.

²⁶“Tewabanga awaayo omwana gwʼensolo omubereberye eri Mukama, kubanga abaana bʼensolo ababereberye bonna ba Mukama, oba nte oba ndiga zonna za Mukama Katonda.

²⁷Bwʼanaabanga awaddeyo emu ku nsolo ezitali nnongoofu, anagisasuliranga omuwendo gwayo ogwagibalirirwamu, ngʼagattako ekitundu kimu kyakutaano ekyʼomuwendo gwayo. Bwʼataaginunulengayo eneetundwanga omuwendo ogwagibalirirwamu.

²⁸ⓥ “Naye omuntu yenna bwʼanaamalanga okuwongera Mukama Katonda ku bintu bye byʼanaabanga nabyo, gamba oba muntu oba kisolo oba ennimiro ye gye yasikira, tewaabengawo ku bintu ebyo bitundibwa oba okununulibwa; buli kintu ekiwongere ddala mu ngeri eyo kinaabanga kitukuvu nnyo eri Mukama Katonda.

²⁹Omuntu eyawongebwa nga wa kuttibwa, taanunulibwenga kinaamusaaniranga kuttibwa.

³⁰“Buli kitundu ekyʼekkumi ekiva mu nsi, gamba ku mmere eyʼempeke eva mu ttaka, oba ku bibala ebiva ku miti, kya Mukama Katonda, era kitukuvu eri Mukama Katonda.

³¹Omuntu anaayagalanga okununula ku bitundu bye ebyʼekkumi, anaagatangako ekitundu kimu kyakutaano ku muwendo gwakyo.

³²Ebitundu ebyʼekkumi byonna ebyamagana gʼente nʼebyʼebisibo byʼendiga, kwe kugamba nti Buli nsolo omusumba gyʼanaabalanga nga ya kkumi, eneebanga ntukuvu eri Mukama Katonda.

³³Tasaaniranga kulondamu nnungi ngʼalekawo embi, oba okuwaanyisa. Bwʼanaawaanyisanga ngʼolwo ensolo zombi, eri nʼeno ewanyisizibbwa zinaafuukanga ntukuvu teziinunulibwenga.”

³⁴Ago ge mateeka Mukama Katonda ge yawa Musa ku lusozi Sinaayi agategeeze abaana ba Isirayiri.