Ebyabaleevi 8:1-36 LGCB2014 - Bible AI

¹Awo Mukama Katonda nʼagamba Musa nti,

²ⓑ “Leeta Alooni ne batabani be, nʼebyambalo, nʼamafuta agʼomuzeeyituuni agʼokwawula, ne seddume yʼente eyʼekiweebwayo olwʼekibi, nʼendiga ennume bbiri, nʼekibbo kyʼemigaati egitali mizimbulukuse;

³okuŋŋaanyize abantu bonna ku mulyango gwa Weema ya Mukama eyʼOkukuŋŋaanirangamu.”

⁴Musa nʼakola nga Mukama Katonda bwe yamulagira; abantu ne bakuŋŋaanira mu kibiina kinene ku mulyango gwa Weema ya Mukama eyʼOkukuŋŋaanirangamu.

⁵Awo Musa nʼagamba ekibiina nti, “Kino Mukama Katonda kyʼatulagidde okukola.”

⁶Bwʼatyo Musa nʼaleeta Alooni ne batabani be nʼabanaaza nʼamazzi.

⁷Nʼayambaza Alooni ekkooti, nʼamusiba olwesibyo, nʼamwambaza omunagiro, nʼamwambaza nʼekyambalo ekya efodi, nʼamusibya olwesibyo lwa efodi olwalukibwa nʼamagezi amangi, nʼamunyweza.

⁸Nʼamuteekako ekyomukifuba, era mu kyomukifuba nʼateekamu Ulimu ne Sumimu.

⁹Nʼamusiba ekitambaala ku mutwe, ne mu maaso ku kitambaala nʼassaako ekipande ekya zaabu, nga ye ngule entukuvu, nga Mukama Katonda bwe yalagira Musa.

¹⁰ⓒ Awo Musa nʼaddira amafuta agʼomuzeeyituuni agʼokwawula, nʼagakozesa okwawula Weema ya Mukama, ne byonna ebibeeramu nabyo nʼabyawula.

¹¹Nʼamansira agamu ku mafuta ku kyoto emirundi musanvu, nʼayawula ekyoto ne byonna ebikozesebwako, nʼebbensani ne mwʼetuula, okubitukuza.

¹²Nʼafuka agamu ku mafuta agʼokwawula ku mutwe gwa Alooni, nʼamwawula, okumutukuza.

¹³Awo Musa nʼaleeta batabani ba Alooni nʼabambaza amakooti, nʼabasiba eneesibyo, nʼabambaza enkuufiira, nga Mukama Katonda bwe yalagira Musa.

¹⁴Awo nʼaleeta seddume eyʼekiweebwayo olwʼekibi; Alooni ne batabani be ne bakwata ku mutwe gwayo.

¹⁵Musa nʼagitta, nʼaddira omusaayi gwayo nʼagusiiga nʼolugalo lwe ku mayembe agʼoku kyoto okukyebungulula, nʼatukuza ekyoto. Omusaayi ogwasigalawo nʼaguyiwa wansi wʼekyoto, nʼakitukuza, okukitangiririra.

¹⁶Musa nʼaddira amasavu gonna agaali ku byenda, nʼagaali gabisse ku kibumba, nʼensigo zombi nʼamasavu gaazo, byonna nʼabyokera ku kyoto.

¹⁷Naye seddume, nʼeddiba lyayo, nʼennyama yaayo, nʼobusa bwayo, nʼabyokera mu muliro ebweru wʼolusiisira, nga Mukama Katonda bwe yalagira Musa.

¹⁸Awo nʼaleeta endiga ennume eyʼekiweebwayo ekyokebwa; Alooni ne batabani be ne bakwata ku mutwe gwayo.

¹⁹Musa nʼagitta, nʼamansira omusaayi gwayo buli wantu ku kyoto.

²⁰Awo endiga ngʼewedde okusalwasalwa mu bifi, Musa nʼayokya ebifi ebyo nʼomutwe gwayo nʼamasavu.

²¹Ebyenda nʼamagulu nga biwedde okunaazibwa nʼamazzi, Musa nʼalyoka ayokya endiga yonna ku kyoto. Ekyo nga kye kiweebwayo ekyokye ekyʼakawoowo akasanyusa, nga kiweerwayo ku muliro eri Mukama, nga Mukama Katonda bwe yalagira Musa.

²²Awo Musa nʼaleeta endiga ennume eyookubiri, nga yʼendiga eyʼekiweebwayo olwʼokwawulibwa; Alooni ne batabani be ne bagikwata ku mutwe gwayo.

²³Musa nʼalyoka agitta, nʼaddira ku musaayi gwayo nʼagusiiga ku kasongezo kʼokutu kwa Alooni okwa ddyo, ne ku kinkumu ekyʼengalo ye eyʼomukono ogwa ddyo, ne ku kigere ekisajja ekyʼokugulu okwa ddyo.

²⁴Batabani ba Alooni nabo ne baleetebwa, Musa nʼasiiga omusaayi ku busongezo bwʼamatu gaabwe aga ddyo, ne ku binkumu ebyʼengalo zaabwe ezʼemikono gyabwe egya ddyo, ne ku bigere ebisajja ebyʼamagulu gaabwe aga ddyo. Musa nʼaddira omusaayi nʼagumansira buli wantu ku kyoto okukyebungulula.

²⁵Nʼaddira amasavu nʼomukira ogwo omusava, nʼamasavu gonna agaali ku byenda, nʼagaali gabisse ku kibumba, nʼensigo zombi nʼamasavu gaazo, nʼekisambi ekya ddyo;

²⁶nʼalaba mu kibbo omubeera emigaati egitali mizimbulukuse egibeera mu maaso ga Mukama Katonda, nʼaggyamu akagaati kamu akatali kazimbulukuse, nʼakagaati akaakolebwa nʼamafuta agʼomuzeeyituuni, nʼakasukuuti akʼoluwewere kamu, nʼabiteeka ku masavu ne ku kisambi ekya ddyo;

²⁷ebyo byonna nʼabikwasa Alooni ne batabani be mu ngalo zaabwe, ne babiwuubawuuba mu maaso ga Mukama Katonda, nga kye kiweebwayo ekiwuubibwa.

²⁸Awo Musa ebyo byonna nʼabibaggyako, nʼabyokera ku kyoto awamu nʼekiweebwayo ekyokebwa, nga kye kiweebwayo eri Mukama Katonda ekyʼokwawulibwa, ekyokebwa mu muliro ne muvaamu akawoowo akalungi akasanyusa.

²⁹Era Musa nʼaddira ekifuba nʼakiwuubawuuba, nga kye kiweebwayo eri Mukama ekiwuubibwa. Guno nga gwe mugabo gwa Musa ku ndiga ennume eyʼokwawulibwa, nga Mukama Katonda bwe yalagira Musa.

³⁰Awo Musa nʼaddira ku mafuta agʼokwawula ne ku musaayi ogwali ku kyoto, nʼamansira ku Alooni ne ku byambalo bye, ne ku batabani be awamu ne ku byambalo byabwe. Bwʼatyo nʼatukuza Alooni nʼebyambalo bye awamu ne batabani be nʼebyambalo byabwe.

³¹Musa nʼagamba Alooni ne batabani be nti, “Ennyama mugifumbire awo ku mulyango gwʼEweema ya Mukama eyʼOkukuŋŋaanirangamu, era awo we muba mugiriira awamu nʼemigaati egiri mu kibbo omuli ebiweebwayo olwʼokwawulibwa, nga bwe nabalagira nga ŋŋamba nti, ‘Alooni ne batabani be baligirya.’

³²Ebifisseewo ku nnyama ne ku migaati mujja kubyokya mu muliro.

³³Era temufulumanga okuva ku mulyango gwa Weema ya Mukama eyʼOkukuŋŋaanirangamu okumala ennaku musanvu, okutuusa ngʼennaku zammwe ezʼokwawulibwa zituukiridde, kubanga okubaawula kugenda kumala ennaku musanvu.

³⁴Mukama Katonda alagidde nti Nga bwe kikoleddwa leero bwe kinaakolebwanga bwe kityo okubatangiririra.

³⁵Mujja kubeera ku mulyango gwa Weema ya Mukama eyʼOkukuŋŋaanirangamu emisana nʼekiro okumala ennaku musanvu, nga mukola ebyo Mukama byʼabalagidde, si kulwa nga mufa; bwe ntyo bwe ndagiddwa.”

³⁶Bwe batyo Alooni ne batabani be ne bakola ebyo byonna Mukama Katonda bye yalagira ngʼabiyisa mu Musa.