Ebyabaleevi 9:1-24 LGCB2014 - Bible AI

¹Ku lunaku olwʼomunaana Musa nʼayita Alooni ne batabani be nʼabakulembeze ba Isirayiri.

²Nʼagamba Alooni nti, “Ddira ennyana eya sseddume eweebwayo olwʼekibi, nʼendiga ennume olwʼekiweebwayo ekyokebwa, nga zombi teziriiko kamogo, oziweeyo ngʼekiweebwayo eri Mukama Katonda.

³Ogambe abaana ba Isirayiri nti, ‘Muddire embuzi ennume eweebwayo olwʼekibi, nʼennyana nʼomwana gwʼendiga, nga zino zombi zaakamala omwaka gumu obukulu era nga teziriiko kamogo, nga za kiweebwayo ekyokebwa;

⁴era nʼente eya sseddume nʼendiga ennume ebyʼebiweebwayo olwʼemirembe, nʼekiweebwayo ekyʼemmere eyʼempeke nga mulimu amafuta agʼomuzeeyituuni, byonna mubiweeyo nga kye kiweebwayo eri Mukama Katonda; kubanga ku lunaku lwa leero Mukama Katonda ajja kubalabikira.’ ”

⁵Bwe batyo ne baleeta byonna Musa bye yabalagira okuleeta mu maaso ga Weema ya Mukama eyʼOkukuŋŋaanirangamu. Abantu bonna, kye kibiina ekinene, ne basembera ne bayimirira awali Mukama Katonda.

⁶Musa nʼalyoka abagamba nti, “Kino kye kyo Mukama Katonda kye yabagambye okukola, era ekitiibwa kya Mukama kijja kubalabikira.”

⁷ⓓ Awo Musa nʼagamba Alooni nti, “Sembera ku kyoto oweeyo ekiweebwayo kyo olwʼebyonoono byo, nʼekiweebwayo kyo ekyokebwa, olyoke weetangiririre awamu nʼabantu era oleete ekiweebwayo ekyʼabantu; obatangiririre; nga Mukama Katonda bwe yalagidde.”

⁸Awo Alooni nʼasembera ku kyoto, nʼatta ennyana eyʼekiweebwayo kye olwʼebyonoono bye.

⁹Batabani ba Alooni ne bamuleetera omusaayi, nʼannyika olunwe lwe mu musaayi nʼagusiiga ku mayembe agʼoku kyoto, nʼafuka omusaayi ku ntobo yʼekyoto.

¹⁰Nʼaddira amasavu nʼensigo nʼebibikka ku kibumba ebyʼomu kiweebwayo olwʼekibi, nʼabyokera ku kyoto, nga Mukama Katonda bwe yalagira Musa.

¹¹Ennyama nʼeddiba nʼabyokera mu muliro ebweru wʼolusiisira.

¹²Alooni nʼatta ekiweebwayo ekyokebwa; batabani be ne bamuleetera omusaayi, nʼagumansira ku kyoto okukyebungulula.

¹³Ne bamuleetera ebifi ebyʼekiweebwayo ekyokebwa nga nʼomutwe kweguli; byonna nʼabyokera ku kyoto.

¹⁴Nʼayoza ebyenda nʼamagulu, nʼabyokera wamu nʼekiweebwayo ekyokebwa ku kyoto.

¹⁵Awo Alooni nʼaleeta ekiweebwayo olwʼabantu. Yaddira embuzi eyʼekiweebwayo olwʼebibi byʼabantu nʼagitta, nʼagiwaayo ngʼekiweebwayo kye olwʼekibi, kye yasooka olwʼebibi bye.

¹⁶Nʼaleeta ekiweebwayo ekyokebwa nʼakiwaayo ngʼetteeka bwe liragira.

¹⁷Nʼaleeta ekiweebwayo ekyʼemmere eyʼempeke, nʼayoolamu olubatu, nʼakyokya ku kyoto okuliraana nʼekiweebwayo ekyokebwa ekyʼomu makya.

¹⁸Ente ya sseddume nʼendiga ennume nazo nʼazitta, nga bye biweebwayo olwʼemirembe ebyʼabantu; batabani ba Alooni ne bamuleetera omusaayi, nʼagumansira ku kyoto okukyebungulula enjuuyi zonna.

¹⁹Naye amasavu agʼente eya sseddume nʼago agʼendiga ennume, nʼamasavu agʼoku mukira, nʼago agabikka ku byenda, nʼensigo, nʼagabikka ku kibumba,

²⁰ne bateeka amasavu gaabyo ku bifuba byʼensolo ezo, nʼayokya amasavu ago ku kyoto;

²¹naye ebifuba nʼekisambi ekya ddyo, Alooni nʼabiwuubawuuba mu maaso ga Mukama Katonda nga kye kiweebwayo ekiwuubibwa eri Mukama Katonda, nga Musa bwe yalagira.

²²ⓔ Awo Alooni nʼawanikira abantu emikono gye, nʼabasabira omukisa. Bwʼatyo Alooni ngʼamaze okuwaayo ekiweebwayo olwʼekibi, nʼekiweebwayo ekyokebwa, nʼekiweebwayo olwʼemirembe, nʼavaayo ku kyoto.

²³Musa ne Alooni ne bayingira mu Weema ya Mukama eyʼOkukuŋŋaanirangamu. Bwe baafuluma ne basabira abantu omukisa, era ekitiibwa kya Mukama Katonda ne kirabikira abantu bonna.

²⁴Omuliro ne gujja nga guva eri Mukama Katonda ne gumalirawo ddala ekiweebwayo ekyokebwa nʼamasavu ebyali ku kyoto. Awo abantu bonna bwe baakiraba ne baleekaana ne bagalamira wansi ngʼamaaso gaabwe gali ku ttaka.