Ekyabalamuzi 1:1-36 LGCB2014 - Bible AI

¹Oluvannyuma lwʼokufa kwa Yoswa, Abayisirayiri ne babuuza Mukama Katonda nti, “Ani mu ffe alisooka okwaŋŋanga Abakanani okubalwanyisa?”

²Mukama Katonda nʼabaddamu nti Yuda yalisooka, era laba mbawadde obuwanguzi ku Bakanani.

³Abasajja ba Yuda ne bagamba baganda baabwe abasajja ba Simyoni[1] nti Tugende ffenna mu kitundu kyaffe ekyatuweebwa tulwanyise Abakanani, era naffe tuligenda nammwe mu kitundu ekyabaweebwa. Awo ne bagenda bonna.

⁴Yuda nʼalumba Abakanani nʼAbaperezi e Bezeki era Mukama nʼamuwa obuwanguzi nʼabattamu abasajja omutwalo mulamba.

⁵Ne bagwikiriza Adonibezeki mu Bezeki; ne bamulwanyisa era ne batta abasajja be.

⁶Naye Adonibezeki ne yeemulula, ne bamuwondera, ne bamukwata era ne bamusalako engalo ze ensajja nʼebigere ebisajja[2].

⁷Adonibezeki ne yejjusa nʼagamba nti, “Nga bakabaka ensanvu abaasalibwako engalo zaabwe ensajja nʼebigere ebisajja, bwe baalondalondanga obukunkumuka wansi wʼemmeeza yange, nange bwe ŋŋenda okuba. Kye nakola bannange Katonda nange akintusizzaako.” Ne bamutwala e Yerusaalemi nʼafiira eyo.

⁸Abasajja ba Yuda ne balumba ekibuga Yerusaalemi ne bakiwamba ne batta abantu baamu nʼekitala, oluvannyuma ne bakyokya.

⁹Awo abasajja ba Yuda ne balumba Abakanani abaabeeranga mu nsozi ne mu biwonvu ne mu bukiika obwa ddyo.

¹⁰Ate Yuda nʼalumba Abakanani abaabeeranga e Kebbulooni (edda ekyayitibwanga Kiriasualuba), mu lutalo olwali eyo mwe battira Sesayi, Akimaani ne Talumaayi.

¹¹Ate nʼavaayo nʼalumba abaabeeranga e Debiri edda ekyayitibwanga Kiriasuseferi.

¹²ⓐ Awo Kalebu nʼagamba nti oyo alirumba Kiriasuseferi nʼakiwamba ndimuwa muwala wange Akusa okumuwasa.

¹³Osunieri, omwana wa Kenazi muto wa Kalebu nʼakiwamba bwʼatyo nʼaweebwa Akusa okumuwasa.

¹⁴Awo Osunieri bwe yamala okuwasa Akusa nʼamufukuutirira asabe kitaawe ennimiro; Akusa nʼaddayo eri kitaawe, bwe yali ava ku ndogoyi, Kalebe nʼamubuuza nti oyagala ki?

¹⁵Nʼamuddamu nti, “Wampa ensi nkalu eyʼobukiikaddyo naye kaakano nnyongera ekitundu ekirimu nʼenzizi ezʼamazzi.” Kalebu nʼamuwa ekitundu ekirimu enzizi ekyengulu nʼekyemmanga.

¹⁶Abazzukulu bʼOmukeeni, mukoddomi wa Musa ne bava mu kibuga ekyʼenkindu ne bagendera wamu nʼabasajja ba Yuda ne batuuka mu ddungu lya Yuda eryali mu bukiikaddyo obwa Aladi ne babeera wamu nʼabantu baayo.

¹⁷Awo Yuda nʼagenda ne muganda we Simyoni ne balumba Abakanani abaabeeranga e Zefasi, ne babazikiririza ddala era ne bakituuma erinnya Koluma.

¹⁸Era Yuda nʼawamba Gaza, Asukulooni ne Ekuloni nʼebitundu ebyetoolodde ebibuga bino.

¹⁹Mukama yali wamu ne Yuda nʼawangula abantu abaabeeranga mu nsozi okuggyako yalemwa okuwangula abantu abaabeeranga mu kiwonvu kubanga baalina amagaali agʼekyuma.

²⁰Kebbulooni nʼekiweebwa Kalebu, nga Musa bwe yalagira, nʼakifuumulamu batabani ba Anaki abasatu.

²¹ⓑ Naye abasajja ba Benyamini tebaagoba Bayebusi abaabeeranga mu Yerusaalemi noolwekyo Abayebusi babeera wamu nʼabasajja ba Benyamini mu Yerusaalemi nʼokutuusa kaakano.

²²Nʼabasajja ba Yusufu ne balumba Beseri era Mukama yali wamu nabo.

²³Abasajja ba Yusufu ne batuma abakessi okuketta ekibuga kyʼe Beseri edda ekyayitibwanga Luzi.

²⁴Abakessi bwe baalaba omusajja ngʼava mu kibuga ne bamugamba nti tukwegayiridde tulage omulyango oguyingira mu kibuga naffe tunaakuyisa bulungi.

²⁵Awo bwe yabalaga awayingirirwa, ne bazikiriza nʼekitala abantu bʼomu kibuga ekyo; ne batakola kabi konna ku musajja oyo nʼabʼomu nnyumba ye bonna.

²⁶Omusajja oyo nʼasengukira mu nsi yʼAbakiiti, nʼazimbayo nʼekibuga nʼakituuma Luzi, nʼokutuusa kaakano bwe kiyitibwa.

²⁷Ye Manase teyagoba bantu abaabeeranga mu Besuseani, ne mu Taanaki ne mu Poliyadde abaabeeranga mu Ibuleamu, ne mu Megiddo, nʼebyalo ebiriraanye ebibuga ebyo. Naye Abakanani ne bagaanira ddala okuva mu nsi eyo.

²⁸Awo Abayisirayiri bwe beeyongera amaanyi ne bawaliriza Abakanani okubakoleranga emirimu mu kifo kyʼokugobwa mu nsi eyo.

²⁹ⓒ Era ne Efulayimu teyagoba Bakanani naye yabakkiriza okubeera awamu naye mu Gezeri.

³⁰Era ne Zebbulooni teyagoba abantu abaabeeranga mu Kitulooni yadde abaabeeranga mu Nakaloli, naye Abakanani bano nʼabakkiriza okubeeranga awamu naye nga bwe bamusasula omusolo.

³¹Aseri teyagoba bantu abaabeeranga mu Akko yadde abʼomu Sidoni nʼabʼomu Alaba nʼabʼomu Akuziba nʼabʼomu Keruba nʼabʼomu Afiki yadde abʼomu Lekobu,

³²naye Abakanani ne bakkirizibwa okubeera awamu nʼabantu ba Aseri.

³³Nafutaali teyagoba bantu abaabeeranga mu Besusemesi ne mu Besuanasi naye nʼabakkirizanga okubeeranga awamu nʼabantu be nga bwe bamusasula omusolo.

³⁴Bo abasajja ba Ddaani tebaasobola kuwamba nsi yʼAbamoli eyʼomu kiwonvu era Abamoli ne babafuumuula ne baabazaayo mu nsozi.

³⁵Newaakubadde Abamoli baalwanirira nnyo okubeera ku lusozi Keresi, mu Ayalooni ne Saalubimu naye abʼomu kika kya Yusufu ne babafufuggaza era ne babawaliriza okubawanga omusolo.

³⁶Ensalo yʼAbamoli yayitanga awo ngʼoyambuka Akulabbimu nʼokweyongerayo.