Ekyabalamuzi 10:1-18 LGCB2014 - Bible AI

¹Awo oluvannyuma lwa Abimereki, ne wabaawo Toola mutabani wa Puwa, era muzzukulu wa Dodo, omusajja wa Isakaali eyajja okulokola Isirayiri, eyabeeranga mu Samiri mu nsi ya Efulayimu eyʼensozi.

²Nʼakulembera Isirayiri okumala emyaka amakumi abiri mu esatu, nʼaziikibwa mu Samiri.

³Oluvannyuma lwʼoyo ne wabaawo Yayiri Omugireyaadi, eyakulembera Isirayiri okumala emyaka amakumi abiri mu ebiri.

⁴Yalina abaana aboobulenzi amakumi asatu abeebagalanga endogoyi amakumi asatu, era baafuganga ebibuga amakumi asatu, mu nsi ya Gireyaadi ebiyitibwa Kavosuyayiri nʼokutuusa leero.

⁵Yayiri nʼafa nʼaziikibwa mu Kamoni.

⁶Abayisirayiri ne beeyongera okukola ebibi mu maaso ga Mukama, nga baweereza Babaali ne Asutoleesi ne bakatonda abʼe Busuuli, ne bakatonda abʼe Sidoni, ne bakatonda abʼe Mowaabu, ne bakatonda abʼabaana ba Amoni, ne bakatonda bʼAbafirisuuti, ne bava ku Mukama ne batamuweereza.

⁷Mukama Katonda nʼanyiigira Isirayiri, nʼabagabula mu mukono gwʼAbafirisuuti ne mu mukono gwʼabaana ba Amoni,

⁸abaanyigiriza abaana ba Isirayiri, era ne babajooga okumala emyaka kkumi na munaana. Baanyigiriza abaana ba Isirayiri bonna abaali emitala wa Yoludaani ku luuyi olwʼebuvanjuba mu nsi yʼAbamoli eri mu Gireyaadi.

⁹Abaana ba Amoni nabo ne basomoka Yoludaani okulwanyisa Yuda ne Benyamini, nʼennyumba ya Efulayimu. Isirayiri ne yeeraliikirira nnyo.

¹⁰Awo abaana ba Isirayiri ne bakaabira Mukama nga bagamba nti, “Ddala ddala twasobya, ne tuva ku Mukama Katonda waffe, ne tuweereza Babaali.”

¹¹Mukama Katonda nʼaddamu abaana ba Isirayiri nti, “Abamisiri nʼAbamoli, nʼabaana ba Amoni, nʼAbafirisuuti,

¹²nʼAbasidoni, nʼAbamaleki, nʼAbamawoni[10], bwe baabanyigiriza ne munkowoola, sabalokola okuva mu mukono gwabwe?

¹³Naye mwanvaako ne muweereza bakatonda abalala, noolwekyo sigenda kubalokola nate.

¹⁴Mugende mukaabire bakatonda abo be mwasalawo okuweereza, babalokole mu nnaku yammwe.”

¹⁵Naye abaana ba Isirayiri ne bagamba Mukama Katonda nti, “Twayonoona. Tukole kyonna kyʼonoolaba nga kye kitusaanira. Kyokka tulokole kaakano.

¹⁶Ne baggya wakati mu bo bakatonda abalala, ne baweereza Mukama Katonda. Mukama nʼalumwa olwʼennaku ya Isirayiri.”

¹⁷Awo abaana ba Amoni ne basiisira mu Gireyaadi, nʼabaana ba Isirayiri nabo ne basiisira mu Mizupa.

¹⁸Abakulembeze bʼabantu mu Gireyaadi ne bagambagana nti, “Omusajja anaasooka okulumba abaana ba Amoni, ye anaabeera omukulembeze wʼabatuuze bʼomu Gireyaadi.”